ସୀତାରାମ ଅଗ୍ରୱାଲ
ବାଣପୁର: ଛାତ୍ରଛାତ୍ରୀଙ୍କୁ ବିଦ୍ୟାଳୟ ମୁହାଁ କରିବା ପାଇଁ ରାଜ୍ୟ ଓ କେନ୍ଦ୍ର ସରକାର ଅନେକ ଯୋଜନା ଲାଗୁ କରିଥିଲେ ସୁଦ୍ଧା ପ୍ରତିବର୍ଷ ବହୁ ଛାତ୍ରଛାତ୍ରୀ ଅଧାରୁ ବିଦ୍ୟାଳୟ ଛାଡୁଥିବାର ଦେଖାଯାଉଛି। ତେବେ ସେମାନଙ୍କ ବିଦ୍ୟାଳୟ ଛାଡିବାର କାରଣ ଖୋଜି ତାହାକୁ କିପରି ସମାଧାନ କରାଯାଇ ପୁନଶ୍ଚ ସେମାନଙ୍କୁ ବିଦ୍ୟାଳୟ ମୁହାଁ କରାଯାଇପାରିବ ସେ ଦିଗରେ କାର୍ଯ୍ୟ କରିବାକୁ ଶିକ୍ଷକ/ଶିକ୍ଷୟିତ୍ରୀ ମାନେ କୁଣ୍ଠାବୋଧ କରୁଛନ୍ତି। ଖୋର୍ଦ୍ଧା ଜିଲ୍ଲା ବାଣପୁର ବ୍ଲକରେ ଏହାର ଦୃଷ୍ଟାନ୍ତ ଦେଖିବାକୁ ମିଳିଛି।
ବିଇଓ ସନାତନ ଜାଲିଙ୍କ ତଥ୍ୟ ଅନୁଯାୟୀ ଗତବର୍ଷ ପ୍ରଥମରୁ ଅଷ୍ଟମ ଶ୍ରେଣୀ ମଧ୍ୟରେ ୨୭୧ ଛାତ୍ରଛାତ୍ରୀ ଅଧାରୁ ବିଦ୍ୟାଳୟ ଛାଡିଥିବା ବେଳେ ୩୧ ଜଣ ଛାତ୍ରଛାତ୍ରୀ ଦଶମ ଶ୍ରେଣୀ ଅଧାରୁ ବିଦ୍ୟାଳୟ ଛାଡିଛନ୍ତି। ସେହିପରି ଭାବେ ଚଳିତ ବର୍ଷ ମାଟ୍ରିକ ପରୀକ୍ଷାରେ ୨୧ ଜଣ ଛାତ୍ରଛାତ୍ରୀ ଅନୁପସ୍ଥିତ ରହିଛନ୍ତି।
ଏଠି ପ୍ରଶ୍ନ ଉଠୁଛି ରାଜ୍ୟ ଓ କେନ୍ଦ୍ର ସରକାର ପିଲାଙ୍କ ପାଠ ପଢା ପାଇଁ ମାଳ ମାଳ ଯୋଜନା ଓ କୋଟି କୋଟି ଟଙ୍କା ଖର୍ଚ୍ଚ କରୁଥିବା ବେଳେ ଶିକ୍ଷକ ଶିକ୍ଷୟିତ୍ରୀମାନେ ତାହାକୁ ହାଲୁକାରେ ନେଉଛନ୍ତି। ନିୟମ ମୁତାବକ ଯଦି କୌଣସି ଛାତ୍ରଛାତ୍ରୀଙ୍କୁ ୧୪ ବର୍ଷ ହୋଇଥିବ ଏବଂ ସେମାନେ ଚତୁର୍ଥ ଶ୍ରେଣୀ ପାସ କରିଥିବେ ତେବେ ସେମାନେ ସରକାରଙ୍କ ମୁକ୍ତ ବିଦ୍ୟାଳୟରେ ନାମ ଲେଖାଇ ପଢ଼ିପାରିବେ।
ଅନୁରୂପ ଭାବେ ଚତୁର୍ଥ ପାସ କରିନଥିବା ବ୍ୟକ୍ତିଙ୍କୁ ସର୍ବ ଶିକ୍ଷା ଅଭିଯାନ ଅନ୍ତର୍ଗତ ମାଗଣାରେ ଶିକ୍ଷାଦାନ ଦିଆଯିବ। ତେବେ ଏଥିନିମନ୍ତେ ସମ୍ପୃକ୍ତ ବିଦ୍ୟାଳୟର ପ୍ରଧାନଶିକ୍ଷକ ସେହି ଛାତ୍ରଛାତ୍ରୀଙ୍କ ଘରକୁ ଯାଇ ଅଭିଭାବକଙ୍କ ସହ କଥାବାର୍ତ୍ତା କରି ମୁକ୍ତ ବିଦ୍ୟାଳୟରେ ନାମ ଲେଖାଇବା ପାଇଁ ପ୍ରୋତ୍ସାହିତ କରିବା କଥା। କିନ୍ତୁ ବାଣପୁର ବ୍ଲକରେ ଏହାର ବ୍ୟତିକ୍ରମ ଦେଖିବାକୁ ମିଳିଛି।
ବିଇଓଙ୍କ କହିବା କଥା ବାଣପୁର ବ୍ଲକରେ ବିଦ୍ୟାଳୟ ଛାଡିଥିବା ଏକାଧିକ ପିଲା ବାହାର ରାଜ୍ୟକୁ କାମ କରିବା ପାଇଁ ପଳାଉଥିବା ବେଳେ ଆଉ କିଛି ପିଲା ପ୍ରାପ୍ତ ବୟସ୍କ ପୁର୍ବରୁ ବିବାହ କରିଦେଉଛନ୍ତି। ତେବେ ଯଦି ବାଣପୁର ବ୍ଲକରେ ଏପରି କିଛି ଘଟୁଛି ତାହାଲେ ବିଇଓ ତୁରନ୍ତ ଏ ନେଇ ଉପରିସ୍ଥ ଅଧିକାରୀ କିମ୍ୱା ସ୍ଥାନୀୟ ପ୍ରଶାସନକୁ ଅବଗତ କରି ଏହା ଉପରେ କାର୍ଯ୍ୟାନୁଷ୍ଠାନ ନେବା କଥା। କାରଣ ବାଲ୍ୟ ବିବାହ ଓ ବାଲ୍ୟ ଶ୍ରମିକ ଉଭୟ ବେଆଇନ। କିନ୍ତୁ ସେପରି କିଛି ହେଉନାହିଁ। ବିଇଓଙ୍କ କହିବା ଅନୁଯାୟୀ ସେ ବିଦ୍ୟାଳୟ ଡ୍ରପ ଆଉଟ ପିଲାଙ୍କ ପାଖକୁ ଯାଇ ତାଙ୍କ ଅଭିଭାବକଙ୍କ ସହ ଆଲୋଚନା କରିବା ଏବଂ କାଉନସେଲିଙ୍ଗ କରିବା ପାଇଁ ସମ୍ପୃକ୍ତ ବିଦ୍ୟାଳୟର ପ୍ରଧାନ ଶିକ୍ଷକ/ଶିକ୍ଷୟିତ୍ରୀଙ୍କୁ ନିର୍ଦ୍ଦେଶ ଦେଇଥିଲେ ମଧ୍ୟ ପ୍ରଧାନ ଶିକ୍ଷକ/ଶିକ୍ଷୟିତ୍ରୀ ଙ୍କ ଉଦାସୀନତା ମନୋଭାବ ଲାଗି ଏହାର ସୁଫଳ ମିଳୁପାରିନାହିଁ।
ଯଦି ପ୍ରତ୍ୟେକ ପ୍ରଧାନ ଶିକ୍ଷକ/ଶିକ୍ଷୟିତ୍ରୀ ଉକ୍ତ ସମସ୍ୟାକୁ ଗୁରୁତର ସହ ନେଇ ଛାତ୍ରଛାତ୍ରୀଙ୍କୁ ପୁଣି ବିଦ୍ୟାଳୟକୁ ଆଣିବାରେ ସଫଳ ହୁଅନ୍ତି, ତେବେ ବ୍ଲକରେ ସ୍ଵାକ୍ଷର ହାର ବଢିବା ସହ କୁନି ବୟସରୁ ଛାତ୍ରଛାତ୍ରୀ ମାନେ ବିପଥଗାମୀ ହେବେ ନାଇଁ। ତେବେ ଗତ ବର୍ଷ ଡ୍ରପ ଆଉଟ ହୋଇଥିବା ପ୍ରଥମରୁ ଅଷ୍ଟମ ଶ୍ରେଣୀ ମଧ୍ୟରେ ୨୭୧ ଛାତ୍ରଛାତ୍ରୀଙ୍କ ଡାଟା ବିଭାଗ ପାଖରେ ନଥିବା ବେଳେ, ଦଶମ ଶ୍ରେଣୀ ଅଧାରୁ ଛାଡିଥିବା ୩୧ ଜଣ ଛାତ୍ରଛାତ୍ରୀଙ୍କ ମଧ୍ୟରୁ ୨୭ ଜଣ ମୁକ୍ତ ବିଦ୍ୟାଳୟରେ ନାମ ଲେଖାଇଥିବା ସଫେଇ ଦେଇଛନ୍ତି ବିଇଓ ଶ୍ରୀ ଜାଲି।
ତେବେ ପ୍ରତିବର୍ଷ ବାଣପୁର ବ୍ଲକରେ ଡ୍ରପ ଆଉଟଙ୍କ ସଂଖ୍ୟା ପ୍ରାୟତଃ ସମାନ ରହୁଥିବା ବେଳେ ଏହା କିପରି ଶୂନ ହେବ ସେ ଦିଗରେ କାମ କରିବା ଏକାନ୍ତ ଜରୁରୀ ହୋଇପଡିଛି। ଏ ନେଇ ଜିଲ୍ଲା ଶିକ୍ଷା ଅଧିକାରୀ ବିଶ୍ୱନାଥ ତରାଇଙ୍କୁ ଆମ ପ୍ରତିନିଧି ପଚାରିବାରୁ ସେ ଉକ୍ତ ସମସ୍ୟାକୁ ଗୁରୁତର ସହ ନେଇଥିବା ବେଳେ ଏ ବାବଦରେ ରିପୋର୍ଟ ଦେବା ପାଇଁ ଚିଠି ମଧ୍ୟ କରିସାରିଛନ୍ତି। ଏବଂ ଯେଉଁଠି ଡ୍ରପ ଆଉଟ ସଂଖ୍ୟା ଅଧିକ ହେବ ସେହି ବିଦ୍ୟାଳୟ ପ୍ରଧାନ ଶିକ୍ଷକ/ଶିକ୍ଷୟିତ୍ରୀଙ୍କ ଦରମା ଓ ଇନ୍କ୍ରିମେଣ୍ଟ ତୁରନ୍ତ ବନ୍ଦ ହେବ ବୋଲି ଶ୍ରୀ ତରେଇ ରୋକଠୋକ କହିଛନ୍ତି।