ଭୁବନେଶ୍ବର: ବିଶିଷ୍ଠ ସାହିତ୍ୟିକ ବିଜୟ ନାୟକଙ୍କ ଗଳ୍ପ ସଙ୍କଳନ ‘ମାୟାବର୍ତ୍ତ’ ଉନମୋଚିତ ହୋଇଯାଇଛି। ରାଜଭବନରେ ଆୟୋଜିତ ଏକ ଉତ୍ସବରେ ଏହାକୁ ଉନମୋଚନ କରିଛନ୍ତି ରାଜ୍ୟପାଳ ପ୍ରଫେସର ଗଣେଶୀ ଲାଲ। ଏହି ଉତ୍ସବରେ ପ୍ରତିଷ୍ଠିତ ସାହିତ୍ୟିକା ଡ ପ୍ରତିଭା ରାୟ ଏବଂ କାଦମ୍ବିନୀର ସଂପାଦିକା ଇତି ସାମନ୍ତ ଯୋଗ ଦେଇଥିଲେ।
‘ମାୟାବର୍ତ୍ତ’ ରେ ବିଜୟ ନାୟକଙ୍କ ବଛା ବଛା 22 ଟି ଗଳ୍ପ ସ୍ଥାନିତ ହୋଇଛି। ଏଥିରେ ମୁଖ୍ୟତଃ ସମାଜର ତଳ ପାହଚରେ ଥିବା ମଣିଷର ସଂଘର୍ଷର କାହାଣୀ ଲିପିବଦ୍ଧ ହୋଇଛି। ଭାବର ସାନ୍ଧ୍ରତା ତଥା ଶଦ୍ଦର ଲାଳିତ୍ୟ ଯୋଗୁଁ ଏହା ପାଠକୀୟ ଆଦୃତି ଲାଭ କରିବ ବୋଲି ଆଶା କରାଯାଇଛି। ଏହି ପୁସ୍ତକର ପ୍ରଚ୍ଛଦ ପ୍ରଖ୍ୟାତ ଚିତ୍ରଶିଳ୍ପୀ ବଳଦେବ ମହାରଥା କରିଥିବା ବେଳେ ବିଦ୍ୟାପୁରୀ ପ୍ରକାଶନରେ ମୁଦ୍ରଣ ହୋଇଛି।
ଏହି ଉତ୍ସବରେ ଲେଖକ ତଥା ରାଷ୍ଟ୍ରପତିଙ୍କ ମିଡିଆ ସଚିବ ବିଜୟ ନାୟକ, ପ୍ରକାଶିକା ତପସ୍ବନୀ ନାୟକ, ପ୍ରକାଶକ ଜୀବାନନ୍ଦ ମିଶ୍ର, କବି ରକ୍ଷକ ନାୟକ ଏବଂ ଅମିତାଭ ଖିଲାର ପ୍ରମୁଖ ଯୋଗ ଦେଇଥିଲେ।