ନୂଆଦିଲ୍ଲୀ: ଆସାମରେ ବାଲ୍ୟ ବିବାହ ସଂପର୍କରେ ଗିରଫଦାରୀକୁ ନେଇ ଅଲ ଇଣ୍ଡିଆ ୟୁନାଇଟେଡ୍ ଡେମୋକ୍ରାଟିକ୍ ଫ୍ରଣ୍ଟ (AIUDF) ର ସଭାପତି ମୌଲାନା ବଦ୍ରୁଦ୍ଦିନ ଅଜମଲ ମୁଖ୍ୟମନ୍ତ୍ରୀ ହିମନ୍ତ ବିଶ୍ଵ ସର୍ମାଙ୍କୁ ଟାର୍ଗେଟ କରିଛନ୍ତି। ମୁସଲମାନମାନଙ୍କୁ ହଇରାଣ କରିବା ପାଇଁ ଏସବୁ କରାଯାଉଛି ବୋଲି ସେ କହିଛନ୍ତି।
ଗଣମାଧ୍ୟମ ଅନୁଯାୟୀ ଆସାମର ଧୁବ୍ରିର ସାଂସଦ ଅଜମଲ କହିଛନ୍ତି ଯେ, “ଆମର ମୁଖ୍ୟମନ୍ତ୍ରୀ ହିମନ୍ତା ବିଶ୍ୱ ସରମା ସାହେବ ବେଳେବେଳେ ହଠାତ୍ ସ୍ୱପ୍ନ ଦେଖନ୍ତି ଯେ, ବହୁତ ଦିନ ହେଲାଣି ମୁଁ ମୁସଲମାନମାନଙ୍କୁ ହଇରାଣ କରିନାହିଁ। ସେ ନିଦରୁ ଉଠନ୍ତି। ଏହା ପରେ ମୁସଲମାନମାନଙ୍କୁ ହଇରାଣ କରିବା ଭଳି ଯୋଜନା ଆରମ୍ଭ କରିଦିଅନ୍ତି।
ବାଲ୍ୟ ବିବାହ ବିରୋଧରେ ଏକ ବିଶାଳ ଅଭିଯାନର ଅଂଶ ଭାବରେ ଆସାମ ପୋଲିସ ଆଜି ପର୍ଯ୍ୟନ୍ତ ୧୮୦୦ ଲୋକଙ୍କୁ ଗିରଫ କରିଛି। ଏପର୍ଯ୍ୟନ୍ତ ସର୍ବାଧିକ ୩୭୦ ଟି ମାମଲା ରୁଜୁ ହୋଇଥିବା ବେଳେ ଧୁବ୍ରିରୁ ସର୍ବାଧିକ ୧୩୬ ଜଣଙ୍କୁ ଗିରଫ କରାଯାଇଛି। ଏହା ପରେ ବାରପେଟାରେ ୧୧୦ ଜଣ ଏବଂ ନାଗାଓଁରେ ୧୦୦ ଜଣଙ୍କୁ ଗିରଫ କରାଯାଇଛି। ଅଜମଲ କହିଛନ୍ତି ଯେ, ବାଲ୍ୟ ବିବାହ ଅଧିନିୟମ ଅନୁଯାୟୀ ୨୦୦୭ ରେ ବାଲ୍ୟ ବିବାହ ଏକ ଦଣ୍ଡନୀୟ ଅପରାଧ ହୋଇଥିଲା, କିନ୍ତୁ ଆସାମ ସରକାର ଗୋଟିଏ ଦିନ ମଧ୍ୟ ଏ ସମ୍ପର୍କରେ କୌଣସି ଅଭିଯାନ ଚଳାଇ ନଥିଲେ।
AIUDF ସଭାପତି ଅଜମଲ କହିଛନ୍ତି ଯେ, ବର୍ତ୍ତମାନ ସରକାର ଗିରଫ କରୁଛନ୍ତି। ଏଥିରେ ୯୦ ପ୍ରତିଶତ ମୁସଲମାନ ପୁଅ ଓ ଝିଅଙ୍କୁ ଗିରଫ କରାଯାଉଥିବା ଜଣାପଡିବ। ସେମାନେ ଏକପାଖିଆ ଗିରଫ କରିବେ। ଆମେ ଏହା ଜାଣୁ। ସେମାନଙ୍କର ଚିନ୍ତା ମୁସଲମାନ ବିରୋଧୀ। ଏହି ଉପାୟରେ ଗିରଫ କରାଯିବା ଉଚିତ ନୁହେଁ ବୋଲି ସେ କହିଛନ୍ତି।
ସାଂସଦ ଅଜମଲ କହିଛନ୍ତି ଯେ, ସମଗ୍ର ଆସାମରେ ଅତି କମରେ ୩୦-୪୦ ଦିନ ପର୍ଯ୍ୟନ୍ତ ରାଜ୍ୟ ସରକାର ଏକ ଅଭିଯାନ ଚଳାଇବା ଉଚିତ୍। ଲୋକଙ୍କୁ ଗଣମାଧ୍ୟମ ମାଧ୍ୟମରେ ଜଣାଇବାକୁ ପଡିବ ଏବଂ ସଚେତନତା ବିସ୍ତାର କରିବାକୁ ପଡିବ। ପ୍ରଥମେ “ଲୋକଙ୍କୁ ଚେତାବନୀ ଏବଂ ପରେ ଆପଣ କାର୍ଯ୍ୟାନୁଷ୍ଠାନ ଗ୍ରହଣ କରିପାରନ୍ତି। ଯେଉଁମାନେ ପୂର୍ବରୁ ବିବାହ କରିଛନ୍ତି, ସେହି ଲୋକମାନଙ୍କ ପ୍ରତି କ’ଣ କରାଯିବ? ଯଦି ଆମେ ଏହିପରି ଗିରଫ ଜାରି ରଖୁ, ତେବେ ଲକ୍ଷ ଲକ୍ଷ ଲୋକଙ୍କୁ ଗିରଫ କରାଯିବ। ଏହା ଏକ ଭୁଲ କଥା।
