ଭୋପାଳ: ଆଜି ମଧ୍ୟପ୍ରଦେଶର ଛତ୍ରପୁରର ବାଗେଶ୍ୱର ଧାମରେ ସାମୁହିକ କନ୍ୟା ବିବାହ ଆୟୋଜନ କରାଯାଉଛି। ଏହି କାର୍ଯ୍ୟକ୍ରମରେ ଦେଶର ବିଭିନ୍ନ ସ୍ଥାନରୁ ସାଧୁସନ୍ଥଙ୍କ ବ୍ୟତୀତ ରାଜ୍ୟର ମୁଖ୍ୟମନ୍ତ୍ରୀ ଶିବରାଜ ସିଂ ଚୌହାନ ଏବଂ ତାଙ୍କର ଅନେକ ମନ୍ତ୍ରୀ ଅଂଶଗ୍ରହଣ କରିଛନ୍ତି। ବର୍ତ୍ତମାନ ବାଗେଶ୍ୱର ଧାମରେ ଆସ୍ଥାର ମହାକୁମ୍ଭ ଆୟୋଜିତ ହେଉଛି ଏବଂ ମହାଶିବରାତ୍ରୀ ଅବସରରେ ୧୨୫ କନ୍ୟାଙ୍କର ବିବାହ କରିବେ। ଧିରେନ୍ଦ୍ର ଶାସ୍ତ୍ରୀଙ୍କ ସହ ମୁଖ୍ୟମନ୍ତ୍ରୀ ଶିବରାଜ ମଧ୍ୟ ଏହି ଅବସରରେ ଲୋକଙ୍କୁ ସମ୍ବୋଧିତ କରିଛନ୍ତି।
ଧିରେନ୍ଦ୍ର ଶାସ୍ତ୍ରୀ କହିଛନ୍ତି ଯେ, ଆଜି ସମସ୍ତ ତୀର୍ଥ ବାଗେଶ୍ୱର ଧାମରେ ଏକାଠି ହୋଇଛନ୍ତି। ସେ ସ୍ପଷ୍ଟ ଭାବରେ କହିଛନ୍ତି ଯେ, ଆମେ କୌଣସି ଦଳର ନୁହେଁ, କିନ୍ତୁ ଏହି ଅବସରରେ ଧିରେନ୍ଦ୍ର ଶାସ୍ତ୍ରୀ ମୁଖ୍ୟମନ୍ତ୍ରୀ ଶିବରାଜଙ୍କୁ ତୀବ୍ର ପ୍ରଶଂସା କରୁଥିବା ଦେଖିବାକୁ ମିଳିଛି। ତେଣୁ ସେଠାରେ ସେ ଶିବରାଜ ସିଂଙ୍କୁ କନ୍ୟାମାନଙ୍କୁ ପ୍ରଣାମ କରିବାକୁ କହିଛନ୍ତି। ଏହା ସହ ଧିରେନ୍ଦ୍ର କୃଷ୍ଣ ଶାସ୍ତ୍ରୀ ତାଙ୍କ ହିନ୍ଦୁ ରାଷ୍ଟ୍ର ବିଷୟରେ କହିଛନ୍ତି ଯେ, ସମସ୍ତ ହିନ୍ଦୁଙ୍କୁ ଏକଜୁଟ ହେବାକୁ ପଡିବ।
ସେହିଭଳି ମୁଖ୍ୟମନ୍ତ୍ରୀ ଶିବରାଜ ସିଂ ଚୌହାନ ନିଜର ଭାଷଣ ଆରମ୍ଭ କରିବା ପୂର୍ବରୁ ଜୟ ଶ୍ରୀ ରାମ, ହର ହର ମହାଦେବ ଏବଂ ଜୟ ବଜରଙ୍ଗବାଲିଙ୍କ ସ୍ଲୋଗାନ ଦେଇଛନ୍ତି। ଏହା ବ୍ୟତୀତ ସେ ରାମାୟଣର ଚୌପାଇ ମଧ୍ୟ ପାଠ କରିଛନ୍ତି। ଏହି କାର୍ଯ୍ୟକ୍ରମକୁ ସମ୍ବୋଧିତ କରିବାବେଳେ ମୁଖ୍ୟମନ୍ତ୍ରୀ ଶିବରାଜ ତାଙ୍କ ସରକାରଙ୍କ କାର୍ଯ୍ୟକୁ ପ୍ରଶଂସା କରିବା ସହ ବାବା ବାଗେଶ୍ୱର ଧାମଙ୍କୁ ମଧ୍ୟ ପ୍ରଶଂସା କରିଛନ୍ତି। ଅନ୍ୟପକ୍ଷରେ ଶିବରାଜ ସିଂ ଧିରେନ୍ଦ୍ର କୃଷ୍ଣ ଶାସ୍ତ୍ରୀଙ୍କୁ ମହାରାଜ ଜୀ ବୋଲି ସମ୍ବୋଧନ କରିଛନ୍ତି।