କନ୍ଦର୍ପ ବେହେରା
ରେଢ଼ାଖୋଲ: ରେଢ଼ାଖୋଲ ବନଖଣ୍ଡ ବଡବାହାଳ ରେଞ୍ଜ ଅଞ୍ଚଳରେ ବାଘ ଆତଙ୍କରେ ଲୋକେ ଭୟଭୀତ ହୋଇପଡ଼ିଛନ୍ତି।
ସୂଚନାଯୋଗ୍ୟ ଯେ, ରେଢ଼ାଖୋଲ ବନଖଣ୍ଡ ବଡବାହାଳ ରେଞ୍ଜର କଦଳୀଗଡ ପଞ୍ଚାୟତ ବଘାରପାଲି ଗ୍ରାମ ନିକଟରେ ଶନିବାର ସକାଳୁ ଏକ ଗାଈର ମୃତ ଦେହକୁ ଦେଖି ସ୍ଥାନୀୟ ଲୋକେ ବନବିଭାଗକୁ ଖବର ଦେଇଥିଲେ। ଖବର ପାଇ ବନକର୍ମଚାରୀ ଫରେଷ୍ଟର ସଞ୍ଜୟ କୁମାର ସାହୁ, ଫରେଷ୍ଟ ଗାର୍ଡ ବଳରାମ ପ୍ରଧାନ, ପ୍ରାଣିଧନ ଚିକିତ୍ସକ ଦେବଦତ୍ତ ବିଶ୍ବାଳ ଓ ଅନ୍ୟ ବନ କର୍ମଚାରୀ ମାନେ ଘଟଣାସ୍ଥଳରେ ପହଞ୍ଚି ଗାଈର ଖଣ୍ଡ ବିଖଣ୍ଡିତ ମୃତ ଦେହକୁ ଦେଖିବା ସହ ବାଘର ପାଦ ଚିହ୍ନରୁ ବନବିଭାଗ ଚିହ୍ନଟ କରି ପାରିଥିଲା। ଏହା କଲରା ପତରିଆ ବାଘ ବୋଲି ବନବିଭାଗ ଜାଣିପାରିଥିଲା।
ପ୍ରୀାଣୀଧନ ଡାକ୍ତର ଶବକୁ ଜବତ କରି ବ୍ୟବଚ୍ଛେଦ କରିଥିଲା। ସ୍ଥାନୀୟ ଅଂଚଳରେ ଲୋକେ ଭୟଭୀତ ହୋଇ ପଡ଼ିଛନ୍ତି। ବାଘ ଯେମିତି ସାଧାରଣ ଲୋକଙ୍କ କିଛି କ୍ଷତି ନ କରୁ ସେଥିପ୍ରତି ବନବିଭାଗ ପକ୍ଷରୁ ଦୃଢ ପଦକ୍ଷେପ ନେବାପାଇଁ ଅଞ୍ଚଳବାସୀ ଦାବୀ କରୁଛନ୍ତି।
