ଦୁଷ୍ମନ୍ତ କୁମାର ପଣ୍ଡା
କଳାହାଣ୍ଡି: କଳାହାଣ୍ଡି ଗ୍ରାମ୍ୟ ଉନ୍ନୟନ ବିଭାଗ ଦ୍ବାରା ଜୁନାଗଡ ବ୍ଲକ ଅନ୍ତର୍ଗତ ବନ୍ଦୋଗୁଡା ଠାରୁ ସୋରିଷମାଳ ରାସ୍ତା ଓ ପୋଲ ନିର୍ମାଣ କାର୍ଯ୍ୟ ସୂଚନା ଫଳକ ଅନୁସାରେ ଗତ ୩୦.୧୨.୨୦୨୧ ରେ ଆରମ୍ଭ ହୋଇ ୨୯.୦୯.୨୦୨୨ ରେ ଶେଷ ହୋଇ ଯାଇଥିବା ବେଳେ ବାସ୍ତବରେ ଅଦ୍ୟାବଧି କାର୍ଯ୍ୟ ଚାଲିଥିବାର ଦେଖା ଯାଉଛି। କାର୍ଯ୍ୟ ସ୍ଥଳରେ କୌଣସି ଯନ୍ତ୍ରୀ ଉପସ୍ଥିତ ରହୁ ନ ଥିବା ହେତୁ ସମ୍ପୃକ୍ତ ଠିକାଦାର ନିଜ ମନ ଇଚ୍ଛା କାମ କରୁଥିବାର ସ୍ଥାନୀୟ ଜନ ସାଧାରଣ ଅଭିଯୋଗ କରୁଛନ୍ତି।
ରାସ୍ତାରେ ଥିବା ପୋଲରେ ଅଟକଳ ଅନୁସାରେ ବିନା କୌଣସି ବୈଷୟିକ କୌଶଳରେ ଆବଶ୍ୟକ ପରିମାଣର ଲୁହ ଛଡ, ସିମେଣ୍ଟ, ଗେଟି ପଥର, ବାଲି ଇତ୍ୟାଦିର ମିଶ୍ରଣ କରାଯାଇ ନ ଥିବା ସନ୍ଦେହ ପ୍ରକାଶ ପାଉଛି। ଯାହା ଫଳରେ ଉକ୍ତ ପୋଲର ସ୍ଥାୟିତ୍ବ ଉପରେ ପ୍ରଶ୍ନବାଚୀ ସୃଷ୍ଟି ହେଉଛି। ପୋଲ ସଂଳଗ୍ନ ରାସ୍ତା ର ସ୍ଥାୟିତ୍ବ ଉପରେ ମଧ୍ୟ ପ୍ରଶ୍ନବାଚି ସୃଷ୍ଟି ହେଉଥିବା ବେଳେ ପାର୍ଶସ୍ଥ ଖମ୍ବ ସବୁ ଭାଙ୍ଗି ତଳେ ପଡି ଯାଇଥିବା ଦେଖା ଯାଉଛି। ସେଥିରୁ ଉକ୍ତ ରାସ୍ତା ଓ ଖମ୍ବ ର ଗୁଣବତ୍ତା ଉପରେ ମଧ୍ୟ ପ୍ରଶ୍ନବାଚୀ ସୃଷ୍ଟି ହେଉଛି। ରାସ୍ତା ର ନିର୍ମାଣ ନିମ୍ନ ମାନର ହୋଇଥିବା ସାଧାରଣରେ ଅଭିଯୋଗ ହେଉଛି। ରାସ୍ତା ଉପରେ ପକାଯାଇଥିବା ପିଚୁ ହାତରେ ଘଷି ଦେଲେ ଉଠି ଯାଉଥିବା ବେଳେ ତାହା ମଧ୍ୟ ନିମ୍ନ ମାନର ନିର୍ମାଣ କରାଯାଇଥିବା ଅଭିଯୋଗ ହେବା ସହିତ ଏହାର ଗୁଣ ବତ୍ତା ଉପରେ ସନ୍ଦେହ ପ୍ରକାଶ ପାଉଛି।
ଏହି ବନ୍ଦୋଗୁଡା ଠାରୁ ସୋରିଷମାଳ ରାସ୍ତା ଓ ପୋଲ ନିର୍ମାଣ କାର୍ଯ୍ୟ ସମ୍ପର୍କରେ ଏକ ଉଚ୍ଚ ସ୍ତରୀୟ ତଦନ୍ତ କରାଗଲେ ଏହାର ସତ୍ୟାସତ୍ୟ ଲୋକ ଲୋଚନକୁ ଆସିପାରିବ ବୋଲି ଜନ ସାଧାରଣରେ ଦୃଢ ଦାବି ହେଉଛି। ଏହି କାର୍ଯ୍ୟ ରେ ସରକାରୀ ପାଣ୍ଠି ର ବାଟ ମାରଣା ହୋଇଥିବାର ସମ୍ଭାବନାକୁ ଏଡାଇ ଡିଆ ଯାଇ ନ ପାରେ। ତେଣୁ ସେସମ୍ପର୍କରେ ଭିଜିଲାନ୍ସ ତଦନ୍ତ କରାଯିବାକୁ ଦାବି ହେଉଛି।