![](https://thesamikhsya.com/odia/wp-content/uploads/2021/11/supreme-court.jpg)
ନୂଆଦିଲ୍ଲୀ: ରାଜନୈତିକ ଦଳଗୁଡ଼ିକ ଧାର୍ମିକ ଚିହ୍ନ ଏବଂ ଧାର୍ମିକ ନାମ ବ୍ୟବହାର କରି ନିର୍ବାଚନରେ ପ୍ରତିଦ୍ୱନ୍ଦ୍ୱିତା କରିବା ଏବଂ ସେମାନଙ୍କର ସ୍ୱୀକୃତି ବାତିଲ କରିବା ଉପରେ ଏକ ଆବେଦନ କରାଯାଇଥିଲା। ଆଜି ସୁପ୍ରିମକୋର୍ଟରେ ଏହାର ଶୁଣାଣି ହୋଇଥିଲା। ଏହି ମାମଲା ସହ ଜଡିତ ବିଚାରାଧୀନ ଆବେଦନ ସମ୍ପର୍କରେ ୪ ସପ୍ତାହ ମଧ୍ୟରେ ହାଇକୋର୍ଟରେ ସୂଚନା ଦେବାକୁ ସୁପ୍ରିମକୋର୍ଟ କହିଛନ୍ତି। ଆଡଭୋକେଟ୍ ଦୂଷ୍ୟନ୍ତ ଦେଭ୍ କୋର୍ଟଙ୍କୁ କହିଛନ୍ତି ଯେ, ଭାରତୀୟ ଜନତା ପାର୍ଟିର ନିର୍ବାଚନ ପ୍ରତୀକ ଏକ ପଦ୍ମ ଫୁଲ, ଯାହା ହିନ୍ଦୁ ଧର୍ମ ଏବଂ ବୌଦ୍ଧ ଧର୍ମର ପ୍ରତୀକ ଅଟେ। ଏହା ବ୍ୟତୀତ ସେ ଶିବସେନା, ଶିରୋମଣି ଅକାଳୀ ଦଳ, ହିନ୍ଦୁ ସେନା, ହିନ୍ଦୁ ମହାସଭା, ଖ୍ରୀଷ୍ଟିଆନ ଡେମୋକ୍ରାଟିକ୍ ଫ୍ରଣ୍ଟ, ଇସଲାମ ପାର୍ଟି ହିନ୍ଦ ଇତ୍ୟାଦି ୨୬ ଟି ଦଳକୁ ମଧ୍ୟ ଅନ୍ତର୍ଭୁକ୍ତ କରିବାକୁ ଦାବି କରିଛନ୍ତି।
ଅନ୍ୟପକ୍ଷରେ ଏହି ଆବେଦନ ଶୁଣାଣି ଯୋଗ୍ୟ ଉପରେ ଏଆଇଏମ୍ଆଇଏମ୍ ପକ୍ଷରୁ ବରିଷ୍ଠ ଓକିଲ କେ.କେ ଭେନୁଗୋପାଲ ପ୍ରଶ୍ନ ଉଠାଇଥିଲେ ଏବଂ ଆବେଦନକୁ ଖାରଜ କରିବାକୁ ଦାବି କରିଥିଲେ। କେ.କେ ଭେନୁଗୋପାଲ କହିଛନ୍ତି ଯେ, ଏଥିରେ କୌଣସି ମୌଳିକ ଅଧିକାର ଉଲ୍ଲଂଘନ କରାଯାଉନାହିଁ। ଆବେଦନକାରୀଙ୍କ ଓକିଲ ଗୌରବ ଭାଟିଆ କହିଛନ୍ତି ଯେ, ଦେଶରେ ଦୁଇ ପ୍ରକାରର ରାଜନୈତିକ ଦଳ, ଜାତୀୟ ତଥା ରାଜ୍ୟ ସ୍ତରୀୟ ଦଳ ଅଛନ୍ତି। ନିର୍ବାଚନ ଆୟୋଗ ତାଙ୍କ ଆଫିଡେଭିଟରେ କହିଛନ୍ତି ଯେ, ହାଇକୋର୍ଟରେ ଦାଖଲ ହୋଇଥିବା ଆବେଦନକୁ ସମାଧାନ କରାଯାଇଛି।
ଏହାପୂର୍ବରୁ ଅସଦୁଦ୍ଦିନ ଓୱାଇସିଙ୍କ ନେତୃତ୍ୱାଧୀନ ଏଆଇଏମଆଇଏମ ଏବଂ ଇଣ୍ଡିଆନ ୟୁନିଅନ ମୁସଲିମ ଲିଗ (ଆଇୟୁଏମଏଲ) ଆବେଦନକାରୀ ୱାସିମ ରିଜଭିଙ୍କ ଉପରେ ପ୍ରଶ୍ନ ଉଠାଇଥିଲେ ଯେ, କେବଳ ମୁସଲମାନ ଦଳକୁ ଟାର୍ଗେଟ କରାଯାଇଛି। ସୁପ୍ରିମକୋର୍ଟ କହିଥିଲେ ଯେ, ଆବେଦନକାରୀ ଧର୍ମନିରପେକ୍ଷ ହେବା ଉଚିତ। କେବଳ ଗୋଟିଏ ସମ୍ପ୍ରଦାୟକୁ ଟାର୍ଗେଟ କରାଯିବା ଉଚିତ ନୁହେଁ। ଏଥିରେ ସମସ୍ତ ପକ୍ଷଙ୍କୁ ଅନ୍ତର୍ଭୁକ୍ତ କରାଯିବା ଉଚିତ।
ଏହି ମାମଲାକୁ ସାମ୍ବିଧାନିକ ବେଞ୍ଚକୁ ପଠାଇବାକୁ AIMIM ଦାବି କରିଛି। ବରିଷ୍ଠ ଓକିଲ ତଥା ପୂର୍ବତନ ଏଜି କେ କେ ଭେନୁଗୋପାଲ ଏହି ମାମଲାକୁ ସାମ୍ବିଧାନିକ ଖଣ୍ଡପୀଠକୁ ପଠାଇବାକୁ ଦାବି କରିଛନ୍ତି। ଏହାର ଦୂରଗାମୀ ପରିଣାମ ହେବ ବୋଲି ସେ କହିଛନ୍ତି। ଅନେକ ରାଜନୈତିକ ଦଳ ପ୍ରଭାବିତ ହେବେ। ୭୫ ବର୍ଷର ସମଗ୍ର ଗଣତାନ୍ତ୍ରିକ ପ୍ରକ୍ରିୟା ପ୍ରଭାବିତ ହେବ। ଆବେଦନକାରୀ ଏକ ଅପରାଧିକ ମାମଲାରେ ଜାମିନରେ ଅଛନ୍ତି, ସେ ନିଜେ ଇସଲାମ ଧର୍ମରୁ ହିନ୍ଦୁ ଧର୍ମ ଗ୍ରହଣ କରିଛନ୍ତି।