ନୂଆଦିଲ୍ଲୀ: ଜନ୍ତର ମନ୍ତରକୁ ଦିଲ୍ଲୀ ପୋଲିସ ସମ୍ପୂର୍ଣ୍ଣ ଭାବେ ଖାଲି କରିଛି। କୁସ୍ତିଯୋଦ୍ଧାମାନଙ୍କ ବ୍ୟତୀତ ସମସ୍ତ ବିକ୍ଷୋଭକାରୀଙ୍କୁ ଜନ୍ତର ମନ୍ତରରୁ ହଟାଇ ଦିଆଯାଇଛି। କୁସ୍ତିଯୋଦ୍ଧାମାନଙ୍କ ତମ୍ବୁ ଏବଂ ଅନ୍ୟାନ୍ୟ ଜିନିଷ ଜନ୍ତର ମନ୍ତରରୁ ସଫା କରାଯାଇଛି। ଏହାପୂର୍ବରୁ ନୂତନ ଭାବେ ନିର୍ମିତ ସଂସଦ ଭବନ ବାହାରେ ବିରୋଧ କରିବାକୁ ଚେଷ୍ଟା କରୁଥିବା ବେଳେ ଅଲିମ୍ପିଆନ୍ ତଥା କମନୱେଲଥ୍ ଗେମ୍ସ ଚାମ୍ପିଅନ୍ ସମେତ ଶୀର୍ଷ ଭାରତୀୟ ରେସଲରଙ୍କୁ ହେପାଜତଙ୍କୁ ନିଆଯାଇଛି।
ଯୌନ ଉତ୍ପୀଡ଼ନ ଏବଂ ଭୟଭୀତ କରିବା ଅଭିଯୋଗରେ ଆଥଲେଟମାନେ ରେସଲିଂ ଫେଡେରେସନ୍ ଅଫ୍ ଇଣ୍ଡିଆର ସଭାପତି ବ୍ରିଜ ଭୂଷଣ ସିଂଙ୍କୁ ଗିରଫ କରିବାକୁ ଦାବି କରୁଛନ୍ତି। WFI ସଭାପତି ବ୍ରିଜ ଭୂଷଣ ଶରଣ ସିଂଙ୍କ ବିରୋଧରେ ବିରୋଧ କରିବାକୁ କୁସ୍ତିଯୋଦ୍ଧାମାନେ ଆଜି ଦିଲ୍ଲୀରେ ଏକ ‘ମହିଳା ସମ୍ମାନ ମହାପଞ୍ଚାୟତ’ ଡକାଇଥିଲେ। ଯେଉଁଥିପାଇଁ ଦିଲ୍ଲୀରେ କଡା ସୁରକ୍ଷା ବ୍ୟବସ୍ଥା କରାଯାଇଥିଲା। ଦିଲ୍ଲୀ ପୋଲିସର ସ୍ୱତନ୍ତ୍ର ସିପି କହିଛନ୍ତି ଯେ, ଆମେ ପୂର୍ବରୁ କୁସ୍ତିଯୋଦ୍ଧାମାନଙ୍କୁ ଆଜି କୌଣସି ଜାତୀୟ ବିରୋଧୀ କାର୍ଯ୍ୟ ନକରିବାକୁ କହିଥିଲୁ, କିନ୍ତୁ ସେମାନେ ଆମ କଥା ଶୁଣିଲେ ନାହିଁ। ଆମେ ସମସ୍ତଙ୍କୁ ଅଟକ ରଖି ଜନ୍ତର ମନ୍ତର ଖାଲି କରିଛୁ।
ଏହାପୂର୍ବରୁ ଆଜି ଦିଲ୍ଲୀର କୁସ୍ତିଯୋଦ୍ଧାଙ୍କ ଦ୍ଵାରା ‘ମହିଳା ସମ୍ମାନ ମହାପଞ୍ଚାୟତ’ର ଆହ୍ଵାନରେ ରେସଲର ବଜରଙ୍ଗ ପୁନିଆ କହିଥିଲେ ଯେ ‘ମହିଳା ସମ୍ମାନ ମହାପାଞ୍ଚାୟତ’ ପାଇଁ ଦିଆଯାଇଥିବା ସମୟରେ ଆମେ ସଂସଦ ଆଡକୁ ଯିବୁ। ମୁଁ ପୋଲିସ ପ୍ରଶାସନକୁ ନିବେଦନ କରିବି ଯେ, ଆମେ ଶାନ୍ତିରେ ଯିବୁ, ଆମକୁ ହଇରାଣ କରାନଯାଉ। ସମସ୍ତଙ୍କୁ ଶାନ୍ତି ବଜାୟ ରଖିବାକୁ ଅନୁରୋଧ କରାଯାଇଛି।
