ନୂଆଦିଲ୍ଲୀ: ମଧ୍ୟ ପ୍ରଦେଶର ଜବଲପୁର ଠାରେ ୨୧ ଜୁନ୍ ଦିନ ଆନ୍ତର୍ଜାତିକ ଯୋଗ ଦିବସ ୨୦୨୩ ପାଳନ କାଳରେ ଉପରାଷ୍ଟ୍ରପତି ଜଗଦୀପ ଧନଖଡ଼ ଜାତୀୟ ସମାରୋହର ନେତୃତ୍ୱ ନେବେ। ଏହି ଅବସରରେ ମଧ୍ୟ ପ୍ରଦେଶ ରାଜ୍ୟପାଳ ମଙ୍ଗୁଭାଇ ଛଗନଭାଇ ପଟେଲ, ମୁଖ୍ୟମନ୍ତ୍ରୀ ଶିବରାଜ ସିଂହ ଚୌହାନ, କେନ୍ଦ୍ର ଆୟୁଷ ଏବଂ ବନ୍ଦର, ଯାହାଜ ଚଳାଚଳ ଓ ଜଳପଥ ମନ୍ତ୍ରୀ ସର୍ବାନନ୍ଦ ସୋନୱାଲ, ଆୟୁଷ ରାଷ୍ଟ୍ରମନ୍ତ୍ରୀ ଡକ୍ଟର ମୁଞ୍ଜପାରା ମହେନ୍ଦ୍ର ଭାଇ ଏବଂ ରାଜ୍ୟର ଅନେକ ଗଣ୍ୟମାନ୍ୟ ଅତିଥି ଏଥିରେ ଉପସ୍ଥିତ ରହି ସାଧାରଣ ଯୋଗ ମାର୍ଗଦର୍ଶିକା ପାଳନ କରିବେ।
ଏହି ମୁଖ୍ୟ କାର୍ଯ୍ୟକ୍ରମରେ ପ୍ରାୟ ୧୫ ହଜାର ବ୍ୟକ୍ତି ଅଂଶଗ୍ରହଣ କରିବାର କାର୍ଯ୍ୟକ୍ରମ ରହିଛି। ଚଳିତ ବର୍ଷ ଆଇଡିୱାଇର ବାର୍ତ୍ତା ହେଉଛି ‘ବସୁଧୈବ କୁଟୁମ୍ବକମ୍ ନିମନ୍ତେ ଯୋଗ’, ଯେଉଁଥିରେ କି ଭାରତର ସାମାଜିକ – ସାଂସ୍କୃତିକ ଐତିହ୍ୟ ନିହିତ ରହିଛି।
ପ୍ରଧାନମନ୍ତ୍ରୀଙ୍କ ପଦକ୍ଷେପ ଯୋଗୁ ଗତ ନଅ ବର୍ଷ ମଧ୍ୟରେ ଯୋଗ ପୃଥିବୀର କୋଣ ଅନୁକୋଣରେ ପହଂଚି ପାରିଛି। ଚଳିତ ବର୍ଷ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ନୁ୍ୟର୍କର ଜାତିସଂଘ ମୁଖ୍ୟାଳୟରେ ଯୋଗ ଦିବସ ପାଳନର ନେତୃତ୍ୱ ନେବେ। ଏଥିରେ ଯୋଗ ପ୍ରତି ଅଙ୍ଗୀକାରବଦ୍ଧତା ସ୍ୱରୂପ ୧୮୦ରୁ ଅଧିକ ଦେଶର ପ୍ରତିନିଧି ଯୋଗ ଦେବାର କାର୍ଯ୍ୟକ୍ରମ ରହିଛି। ଦୁଇଟି ଦେଶ ଗସ୍ତର ଅବ୍ୟବହିତ ପୂର୍ବରୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ କହିଛନ୍ତି ଯେ “ମୁଁ ଜୁନ୍ ୨୧ ତାରିଖ ଦିନ ଜାତିସଂଘର ମୁଖ୍ୟାଳୟ ଠାରେ ଜାତିସଂଘର ନେତୃତ୍ୱ ଓ ଆନ୍ତର୍ଜାତିକ ଗୋଷ୍ଠୀର ସଦସ୍ୟଙ୍କ ସହ ଆନ୍ତର୍ଜାତିକ ଯୋଗ ଦିବସ ୨୦୨୩ ପାଳନ କରିବି। ମୁଁ ଏହି ସ୍ୱତନ୍ତ୍ର ସମାରୋହ ପାଳନ ପାଇଁ ଅପେକ୍ଷା କରୁଛି ଯେଉଁଠି ଡିସେମ୍ବର ୨୦୧୪ରେ ଆନ୍ତର୍ଜାତିକ ଯୋଗ ଦିବସ ପାଳନ ପ୍ରସ୍ତାବକୁ ସମର୍ଥନ ମିଳିଥିଲା ”
ଆଇଡିୱାଇ ୨୦୨୩ ପାଳନ ପ୍ରସ୍ତୁତି ୩ ମାର୍ଚ୍ଚ ୨୦୨୩ ଦିନ ୧୦୦ ଦିନର ଅବଗଣନା ସହ ଆୟୁଷ ମନ୍ତ୍ରୀଙ୍କ ଦ୍ୱାରା ଆରମ୍ଭ ହୋଇଥିଲା। ସେହିଦିନ ଠାରୁ ପ୍ରତିଦିନ ଅବଗଣନା ପାଳନ କରାଯାଇଛି। ସରକାରୀ ସଂସ୍ଥା ସହ ଅନ୍ୟାନ୍ୟ ଅଂଶଗ୍ରହଣକାରୀଙ୍କ ସହ ଆରମ୍ଭ ହୋଇଥିବା ଏହି ଅଭିଯାନ ୨୧ ଜୁନ, ୨୦୨୩ ଦିନ ଉଦଯାପିତ ହେବ। ଚଳିତ ବର୍ଷ ଆନ୍ତର୍ଜାତିକ ଯୋଗ ଦିବସ ଯୋଗର ମହାସାଗର ମୁଦ୍ରିକା ଭଳି ଅନନ୍ୟ ବୈଶିଷ୍ଟ୍ୟ ରହିବ। ଭାରତୀୟ ନୌସେନା ବନ୍ଧୁ ଭାବାପନ୍ନ ଦେଶଗୁଡ଼ିକର ମହାସାଗର ବକ୍ଷରେ ଭାରତୀୟ ନୌସେନା ଓ ମର୍ଚ୍ଚାଣ୍ଟ ଜାହାଜ ସହ ସେମାନଙ୍କ ବନ୍ଦର ଓ ନୌବହରରେ ସିୱାଇପିର ପରୀକ୍ଷାମଳକ ପ୍ରଦର୍ଶନ କରିବେ।
ସୁମେରୁ ଠାରୁ ଆଣ୍ଟାର୍କଟିକା ପର୍ଯ୍ୟନ୍ତ ଯୋଗ ଆଉ ଏକ ବୈଶିଷ୍ଟ ଥିବାବେଳେ, ଏଥିରେ ବୈଦେଶିକ ବ୍ୟାପାର ମନ୍ତ୍ରଣାଳୟ ଆୟୁଷ ମନ୍ତ୍ରଣାଳୟର ସହଯୋଗରେ ଜାତିସଂଘ ସଦସ୍ୟ ଦେଶର ପ୍ରମୁଖ ଦ୍ରାଘିମା ରେଖା ଅଞ୍ଚଳରେ ସିୱାଇପି ଆୟୋଜନ କରିବେ। ବୈଦେଶିକ ମନ୍ତ୍ରଣାଳୟ ଜରିଆରେ ଉତ୍ତର ଓ ଦକ୍ଷିଣ ଗୋଲାର୍ଦ୍ଧ ଅଞ୍ଚଳରେ ଯୋଗାଭ୍ୟାସ କରାଯିବ। ସୁମେରୁର ଭାରତୀୟ ଗବେଷଣା ଘାଟି ହିମାଦ୍ରୀ ଓ ଆଣ୍ଟାର୍କଟିକାର ଗବେଷଣା ଘାଟି ଭାରତୀ ଠାରେ ଏହା ଆୟୋଜିତ ହେବ। ଯୋଗ ଭାରତମାଳାର ମଧ୍ୟ ପରିକଳ୍ପନା କରାଯାଇଛି, ଯେଉଁଠି ଭାରତୀୟ ସଶସ୍ତ୍ର ସେନା ଆଇଟିବିପି, ବିଏସଏଫ, ବିଆରଓ ସହ ମିଶି ଯୋଗର ପରୀକ୍ଷାମୂଳକ ପ୍ରଦର୍ଶନ କରିବେ। ସେହିପରି ଯୋଗ ସାଗରମାଳାରେ ଭାରତୀୟ ତଟରେଖାରେ ଯୋଗ ପ୍ରଦର୍ଶିତ ହେବ । ଆଇଏନଏସ ବିକ୍ରାନ୍ତର ବିମାନ ଉଡ଼ାଣ ଡେକରେ ପ୍ରତରିକ୍ଷା ମନ୍ତ୍ରୀଙ୍କ ନେତୃତ୍ୱରେ ଯୋଗ ପ୍ରଦର୍ଶିତ ହେବ।
ଜାତୀୟ ସ୍ତରରେ ଚଳିତବର୍ଷ ଆନ୍ତର୍ଜାତିକ ଯୋଗ ଦିବସ ‘ହର ଆଙ୍ଗନ ଯୋଗ’ ସଫଳତା ହାସଲ କରିବାକୁ ଲକ୍ଷ୍ୟ ରଖିଛି। ଗ୍ରାମୀଣ ସ୍ତରରେ ଯୋଗାଭ୍ୟାସ ହେଉଛି ଏହାର ମୂଳ ଲକ୍ଷ୍ୟ। ପ୍ରଧାନମନ୍ତ୍ରୀ ମୋଦୀ ଗାଁ ସରପଞ୍ଚମାନଙ୍କୁ ଲେଖିଥିବା ତାଙ୍କ ପତ୍ରରେ ଜୁନ୍ ୨୧ରେ ଆନ୍ତର୍ଜାତିକ ଯୋଗ ଦିବସ ନିଜ ଗ୍ରାମବାସୀଙ୍କ ସହ ପୁରା ଦମରେ ପାଳନ କରିବାକୁ ନିବେଦନ କରିଛନ୍ତି। ଯେକୌଣସି ଗ୍ରାମବାସୀ ସେମାନଙ୍କ ନିକଟସ୍ଥ ଅଙ୍ଗନବାଡ଼ି, ସ୍ୱାସ୍ଥ୍ୟ ଓ ସୁଧାର କେନ୍ଦ୍ର ଏବଂ ବିଦ୍ୟାଳୟରେ ଯୋଗ ଦିବସ ପାଳନ କରିପାରିବେ। ଦୁଇ ଲକ୍ଷ ସାଧାରଣ ସେବା କେନ୍ଦ୍ର, ଜାତୀୟ ଆୟୁଷ ମିଶନ ଅଧୀନସ୍ଥ ସ୍ୱାସ୍ଥ୍ୟ ଓ ସୁଧାର କେନ୍ଦ୍ର, ଆୟୁଷ ଗ୍ରାମ ମଧ୍ୟ ଆନ୍ତର୍ଜାତିକ ଯୋଗ ଦିବସ ପାଳନ କରିବେ। ଜନସାଧାରଣ ପ୍ରାୟ ୫୦ ହଜାର ଅମୃତ ସରୋବର ନିକଟରେ ଏକାଠି ହୋଇ ଯୋଗାଭ୍ୟାସ କରିପାରିବେ।
ଆୟୁଷ ମନ୍ତ୍ରଣାଳୟ ପକ୍ଷରୁ ଭାରତୀୟ ବୈଦେଶିକ ମନ୍ତ୍ରଣାଳୟ ଅଧୀନସ୍ଥ ଭାରତୀୟ ସାଂସ୍କୃତିକ ସମ୍ପର୍କ ପରିଷଦ ସହ ମିଶି ‘ଯୋଗ ମାଇଁ ପ୍ରାଇଡ୍’ ଶୀର୍ଷକ ଏକ ଫଟୋ ଉତ୍ତୋଳନ ପ୍ରତିଯୋଗିତା ମାଇଁ ଗଭ୍ ପ୍ଲାଟଫର୍ମରେ ଆୟୋଜନ କରୁଛି। ଜାତୀୟ ଓ ଆନ୍ତର୍ଜାତିକ ଅଂଶଗ୍ରହଣକାରୀମାନେ ଯୋଗାସନ କରୁଥିବା ଚିତ୍ର ଶିରୋନାମା ସହ ପଠାଇପାରିବେ। ଏହିସବୁ ଶ୍ରେଣୀରେ ଜାତୀୟ ଓ ଆନ୍ତର୍ଜାତିକ ପ୍ରତିଯୋଗୀମାନଙ୍କ ପାଇଁ ପୁରସ୍କାର ପାଇବାର ମଧ୍ୟ ସମ୍ଭାବନା ରହିଛି।
ଆୟୁଷ ମନ୍ତ୍ରଣାଳୟ ପକ୍ଷରୁ କାର୍ଯ୍ୟସ୍ଥଳୀରେ ୱାଇ-ବ୍ରେକ ବ୍ୟବସ୍ଥା ମଧ୍ୟ ଚଳିତ ବର୍ଷ ପ୍ରବର୍ତ୍ତିତ ହୋଇଛି। ଚାପମୁକ୍ତ ହୋଇ ପ୍ରଫୁଲ୍ଲ ମନରେ କାମରେ ମନଦେବା ଏହାର ଉଦେଶ୍ୟ। କାର୍ଯ୍ୟସ୍ଥଳୀରେ ଚୌକିରେ ବସି ଚଳିତ ବର୍ଷ ୱାଇ-ବ୍ରେକଇୱାର୍କପ୍ଲେସ-ୟୋଗା ଇନ୍ ଚେୟାର ମଧ୍ୟ କରିହେବ । ସମସ୍ତ ମନ୍ତ୍ରଣାଳୟ ଓ ବିଭାଗଗୁଡ଼ିକୁ ସେମାନଙ୍କ କର୍ମଚାରୀମାନେ ଚୌକିରେ ବସି ଯୋଗ କରିବାକୁ ଅନୁରୋଧ କରାଯାଇଛି।
ସମ୍ପୂର୍ଣ୍ଣ ସରକାରୀ ସହଯୋଗରେ ଚଳିତ ବର୍ଷ ଆନ୍ତର୍ଜାତିକ ଯୋଗ ଦିବସ ପାଳନ କରାଯାଉଛି। ଭାରତ ସରକାରଙ୍କ ସମସ୍ତ ପ୍ରମୁଖ ମନ୍ତ୍ରଣାଳୟ, ରାଜ୍ୟ ସରକାର, ଜାତୀୟ ଓ ଆନ୍ତର୍ଜାତିକ ପ୍ରମୁଖ ଯୋଗ ପ୍ରତିଷ୍ଠାନ ଓ ସଂଗଠନ, ବିଶ୍ୱବିଦ୍ୟାଳୟ, ସଶସ୍ତ୍ର ସେନା, ଏନଏସଏସ ଓ ଏନୱାଇକେ ସ୍ୱେଚ୍ଛାସେବୀ ଓ ଅନ୍ୟାନ୍ୟ ଅଂଶଗ୍ରହଣକାରୀ ୨୦୨୩ ଆନ୍ତର୍ଜାତିକ ଯୋଗ ଦିବସର ବିଭିନ୍ନ କାର୍ଯ୍ୟକଳାପରେ ଭାଗ ନେଇ ସାରିଛନ୍ତି। ଏଥିସହ ଭାରତୀୟ ଦୂତାବାସ, ଜାତିସଂଘ ସଦସ୍ୟ ରାଷ୍ଟ୍ର ମଧ୍ୟ ୨୧ ଜୁନ ୨୦୨୩ରେ ଆନ୍ତର୍ଜାତିକ ଯୋଗ ଦିବସ ପାଳନ କରିବେ।