କୌଣସି ରାଜ୍ୟ ଉପରେ ହିନ୍ଦି ଭାଷାକୁ ଲଦା ଯାଇ ପାରିବ ନାହିଁ ବୋଲି ରବିବାର ବିଭିନ୍ନ ନେତା ମତ ଦେଇଛନ୍ତି । ଜାତୀୟ ଶିକ୍ଷାନୀତି ୨୦୧୯କୁ ବିଭିନ୍ନ ମହଲରେ ସମାଲୋଚନା କରାଯିବା ପରେ ବିଜେପିର ବିଭିନ୍ନ ନେତା ମାନେ ମନ୍ତବ୍ୟ ଦେଇଛନ୍ତି । ବିଭିନ୍ନ ଦକ୍ଷିଣ ଭାରତୀୟ ନେତୃବୃନ୍ଦ ଏହାକୁ ନେଇ ପୁନଃସମୀକ୍ଷା ଆବଶ୍ୟକ ବୋଲି କହିଛନ୍ତି । ମୋଦିଙ୍କ କ୍ୟାବିନେଟ୍ରେ ରହିଥିବା ଦୁଇ କ୍ୟାବିନେଟ୍ ମନ୍ତ୍ରୀ ନିର୍ମଳା ସୀତାରମଣ ଏବଂ ଏସ୍ ଜୟଶଙ୍କର ଏହି ମାମଲା ନେଇ ଟ୍ବିଟ୍ଟର ଜରିଆରେ ମତ ଦେଇଛନ୍ତି । ଏମାନଙ୍କ ବ୍ୟତୀତ ଉପ ରାଷ୍ଟ୍ରପତି ଏମ୍ ଭେଙ୍କିଆ ନାଇଡୁ ମଧ୍ୟ ସରକାରଙ୍କ ସମାଲୋଚନାକୁ ନିନ୍ଦା କରିଛନ୍ତି । ତାମିଲନାଡୁରୁ ଆସିଥିବା ଦୁଇ ନେତା ଜୟଶଙ୍କର ଏବଂ ସୀତାରମଣ ତାମିଲରେ ନିଜ ନିଜର ଟ୍ବିଟ୍ କରିଥିଲେ । ସାଧାରଣ ଜନତାଙ୍କ ମତାମତ ପରେ ଏହା ଉପରେ ସମ୍ପୂର୍ଣ୍ଣ ନିଷ୍ପତ୍ତି ନିଆଯିବ ବୋଲି ନିର୍ମଳା ସୀତାରମଣ କହିଛନ୍ତି । ଏକ ଭାରତ ଶ୍ରେଷ୍ଠ ଭାରତ ପ୍ରଧାନମନ୍ତ୍ରୀ ମୋଦିଙ୍କ ସ୍ବପ୍ନ ଏବଂ ଦେଶର ଅନ୍ୟତମ ପୁରାତନ ଭାଷାକୁ ରକ୍ଷା କରିବା ତାଙ୍କର ଦାୟିତ୍ବ ବୋଲି ସୀତାରମଣ କହିଛନ୍ତି । ସେହିପରି ବୈଦେଶିକ ମନ୍ତ୍ରୀ ଏସ୍ ଜୟଶଙ୍କର କହିଛନ୍ତି ସରକାର ଏହି ନୂତନ ଶିକ୍ଷା ନିୟମ ଲାଗୁ କରିବା ପୂର୍ବରୁ ଏହାର ସମୀକ୍ଷା କରିବେ । ଉଭୟ ନେତା ତାମିଲ ଭାଷାରେ ନିଜର ଟ୍ବିଟ୍ କରିଛନ୍ତି । ଉପରାଷ୍ଟ୍ରପତି ଭେଙ୍କିଆ ନାଇଡୁ ମଧ୍ୟ ଏହି ନୂତନ ଶିକ୍ଷା ନୀତିକୁ ପସନ୍ଦ କରିଛନ୍ତି । ନାଇଡୁ କହିଛନ୍ତି, ପ୍ରଥମେ ଏହି ନୀତିକୁ ଲାଗୁ କରାଯିବା ଉଚିତ୍ ପରେ ଏହାର ଆଲୋଚନା ଏବଂ ସମାଲୋଚନା ସଠିକ୍ ପଦକ୍ଷେପ । ଅନ୍ୟ ନେତା ମାନଙ୍କ ମଧ୍ୟରେ କର୍ଣ୍ଣାଟକ ମୁଖ୍ୟମନ୍ତ୍ରୀ ଏଚ୍ ଡି କୁମାରସ୍ବାମୀ, ପୂର୍ବତନ ଅର୍ଥ ମନ୍ତ୍ରୀ ପି ଚିଦାମ୍ବରମ୍ ଏବଂ ଏମ୍ କେ ଷ୍ଟାଲିନ୍ ମଧ୍ୟ ଏହାକୁ ସମାଲୋଚନା କରିଛନ୍ତି ।
statement on new education guideline