ନୂଆଦିଲ୍ଲୀ: ଭାରତୀୟ ଦଳ ଚଳିତ ବର୍ଷ ଶେଷରେ ଦକ୍ଷିଣ ଆଫ୍ରିକା ଗସ୍ତ କରିବ, ଯେଉଁଠାରେ ଦଳକୁ ତିନୋଟି ଫର୍ମାଟରେ ସିରିଜ୍ ଖେଳିବାକୁ ପଡିବ। ଏହି ଯାତ୍ରା ସମ୍ପର୍କରେ ବିସିସିଆଇ ଦ୍ୱାରା ସମ୍ପୂର୍ଣ୍ଣ କାର୍ଯ୍ୟସୂଚୀ ଘୋଷଣା କରାଯାଇଛି। ଟିମ୍ ଇଣ୍ଡିଆର ଏହି ଯାତ୍ରା ଡିସେମ୍ବର ୧୦ ତାରିଖରୁ ୩ ମ୍ୟାଚ୍ ବିଶିଷ୍ଟ ଟି -୨୦ ସିରିଜ୍ ସହିତ ଆରମ୍ଭ ହେବ। ଏହା ପରେ ୩ ଟି ଦିନିକିଆ ଏବଂ ତା’ପରେ ୨ ଟି ଟେଷ୍ଟ ମ୍ୟାଚ୍ ଖେଳାଯିବ।
ଭାରତରେ ଖେଳାଯିବାକୁ ଥିବା ଆଗାମୀ ଦିନିକିଆ ବିଶ୍ୱକପ୍ ଅକ୍ଟୋବର ୫ ତାରିଖରୁ ଆରମ୍ଭ ହୋଇଥିବାବେଳେ ଫାଇନାଲ୍ ମ୍ୟାଚ୍ ନଭେମ୍ବର ୧୯ ତାରିଖରେ ଖେଳାଯିବ। ଏହା ପରେ ତୁରନ୍ତ ଭାରତୀୟ ଦଳ ଦକ୍ଷିଣ ଆଫ୍ରିକା ଗସ୍ତକୁ ଯିବେ। ଦଳ ଡିସେମ୍ବର ୧୦ ତାରିଖରେ ଡର୍ବାନରେ ଟି -୨୦ ସିରିଜର ପ୍ରଥମ ମ୍ୟାଚ୍ ଖେଳିବାକୁଥିବାବେଳେ ଡିସେମ୍ବର ୧୨ ତାରିଖରେ କୁବେରାରେ ଖେଳିବ। ସିରିଜର ଶେଷ ଟି -୨୦ ମ୍ୟାଚ୍ ଡିସେମ୍ବର ୧୪ ତାରିଖରେ ଜୋହାନ୍ସବର୍ଗ ଗ୍ରାଉଣ୍ଡରେ ଖେଳାଯିବ।
ଦିନିକିଆ ସିରିଜ୍ ଡିସେମ୍ବର ୧୭ ତାରିଖରୁ ଆରମ୍ଭ ହେବ ଯେଉଁଥିରେ ଜୋହାନ୍ସବର୍ଗରେ ପ୍ରଥମ ମ୍ୟାଚ୍ ଖେଳାଯିବ। ଦ୍ୱିତୀୟ ଦିନିକିଆ ଡିସେମ୍ବର ୧୯ ତାରିଖରେ କୁବେରାରେ ଖେଳାଯିବ, ସିରିଜର ଶେଷ ଦିନିକିଆ ଡିସେମ୍ବର ୨୧ ତାରିଖରେ ପର୍ଲ ଗ୍ରାଉଣ୍ଡରେ ଖେଳାଯିବ।
ସେହିଭଳି ବିଶ୍ୱ ଟେଷ୍ଟ ଚାମ୍ପିଅନସିପ୍ ର ଏହି ଚକ୍ରରେ ଭାରତୀୟ ଦଳକୁ ଦକ୍ଷିଣ ଆଫ୍ରିକାରେ ଦ୍ୱିତୀୟ ବିଦେଶ ଟେଷ୍ଟ ସିରିଜ୍ ଖେଳିବାକୁ ପଡିବ। ଦୁଇ ଦଳ ମଧ୍ୟରେ ସିରିଜର ପ୍ରଥମ ଟେଷ୍ଟ ମ୍ୟାଚ୍ ଡିସେମ୍ବର ୨୬ ତାରିଖରେ ବକ୍ସିଂ ଡେରେ ସେଞ୍ଚୁରିଅନ୍ ଗ୍ରାଉଣ୍ଡରେ ଆରମ୍ଭ ହେବ। ଏଥି ସହିତ, ଏହି ୨ ମ୍ୟାଚ୍ ବିଶିଷ୍ଟ ଟେଷ୍ଟ ସିରିଜର ଦ୍ୱିତୀୟ ମ୍ୟାଚ୍ ୨୦୨୪ ବର୍ଷ ଆରମ୍ଭରେ ଜାନୁୟାରୀ ୩ ରୁ ୭ ତାରିଖ ପର୍ଯ୍ୟନ୍ତ କେପଟାଉନ୍ ଗ୍ରାଉଣ୍ଡରେ ଖେଳାଯିବ। ଏହାପୂର୍ବରୁ, ଯେତେବେଳେ ୨୦୨୧-୨୨ ବର୍ଷରେ ଶେଷ ଥର ପାଇଁ ଭାରତୀୟ ଦଳ ଦକ୍ଷିଣ ଆଫ୍ରିକା ଗସ୍ତ କରିଥିଲା, ସେତେବେଳେ ସେମାନଙ୍କୁ ୩ ମ୍ୟାଚ୍ ଟେଷ୍ଟ ସିରିଜରେ ୨-୧ ପରାଜୟର ସାମ୍ନା କରିବାକୁ ପଡିଥିଲା।
