ଭୁବନେଶ୍ଵର: ଭାରତର କୋଇଲା କ୍ଷେତ୍ରକୁ ଭବିଷ୍ୟତ ପାଇଁ ପ୍ରସ୍ତୁତ କରିବା ସକାଶେ କୋଇଲା ମନ୍ତ୍ରଣାଳୟ ସକ୍ରିୟ ଭାବରେ ସିପିଏସ୍ଇ ଗୁଡ଼ିକ ମଧ୍ୟରେ ବଡ ଧରଣର ବିବିଧକରଣକୁ ପ୍ରୋତ୍ସାହିତ କରୁଛି। ଏହା ସହିତ, ଏନଏଲସିଆଇଏଲ ଦ୍ୱାରା ଦୁଇଟି ତାପଜ ବିଦ୍ୟୁତ କେନ୍ଦ୍ର ପ୍ରତିଷ୍ଠା କରିବାକୁ ସ୍ଥିର ହୋଇଛି। ଗୋଟିଏ କାନପୁର ନିକଟ ଘାଟମପୁର ଠାରେ ପ୍ରତିଷ୍ଠା ହେଉଛି ଯାହା ୧୯,୪୦୬ କୋଟି ଟଙ୍କା ବ୍ୟୟରେ ୩ x ୬୬୦ ମୋଗାୱାଟ ବିଜୁଳି ଉତ୍ପାଦନ କରିବ। ଏନଏଲସିଆଇଏଲ ଏବଂ ଉତ୍ତରପ୍ରଦେଶ ସରକାରଙ୍କ ମିଳିତ ଉଦ୍ୟମରେ ଏହି ପ୍ରକଳ୍ପ ଉତ୍ତରପ୍ରଦେଶକୁ ୧୪୭୮.୨୮ ମେଗାୱାଟ ଏବଂ ଆସାମକୁ ୪୯୨.୭୨ ମେଗାୱାଟ ବିଜୁଳି ଯୋଗାଇବ। ଏହି ପ୍ରକଳ୍ପ ନିର୍ମାଣ ପର୍ଯ୍ୟାୟରେ ଅଛି ଏବଂ ଏହି କାରଖାନାର ପ୍ରଥମ ପର୍ଯ୍ୟାୟ ଚଳିତ ବର୍ଷ ଶେଷ ସୁଦ୍ଧା ବିଦ୍ୟୁତ୍ ଉତ୍ପାଦନ ଆରମ୍ଭ କରିବ ବୋଲି ଆଶା କରାଯାଉଛି।
ଏଥିସହ, ଏଲସିଆଇଏଲ ଓଡିଶାର ତଲାବିରାରେ ୩ x ୮୦୦ ମେଗାୱାଟ ପିଟହେଡ ତାପଜ ବିଦ୍ୟୁତ୍ କେନ୍ଦ୍ର ର୍ନିମାଣ ପାଇଁ ଯୋଜନା ପ୍ରସ୍ତୁତ କରିଛି। ଏହି ପ୍ରକଳ୍ପର ମୂଲ୍ୟ ୧୯,୪୨୨ କୋଟି ଟଙ୍କା ଆକଳନ କରାଯାଇଛି ଏବଂ ଏହା ତାମିଲନାଡୁକୁ ୧୪୫୦ ମେଗାୱାଟ ବିଦ୍ୟୁତ୍ ପୁଡୁଚେରୀକୁ ୧୦୦ ମେଗାୱାଟ ଏବଂ କେରଳକୁ ୪୦୦ ମେଗାୱାଟ ବିଦ୍ୟୁତ୍ ଯୋଗାଇବ। ଏହି ପ୍ରକଳ୍ପ ଚଳିତ ବର୍ଷ ଶେଷ ସୁଦ୍ଧା ଆରମ୍ଭ ହେବ ଏବଂ ୨୦୨୮-୨୯ ସୁଦ୍ଧା ଶେଷ ହେବାର ସମ୍ଭାବନା ରହିଛି।
କୋଲ ଇଣ୍ଡିଆ ଲିମିଟେଡ୍ (ସିଆଇଏଲ୍) ମଧ୍ୟ ଦୁଇଟି ତାପଜ ବିଦ୍ୟୁତ କେନ୍ଦ୍ର ପ୍ରତିଷ୍ଠା କରିବା ପ୍ରକ୍ରିୟାରେ ଅଛି। ଗୋଟିଏ ଅମରକଣ୍ଟକ ନିକଟରେ ଅବସ୍ଥିତ ଯାହା ମଧ୍ୟପ୍ରଦେଶ ସରକାରଙ୍କ ମିଳିତ ଉଦ୍ୟମରେ ହେବ।
ଏହି କାରଖାନାର ପ୍ରସ୍ତାବିତ କ୍ଷମତା ୧ x ୬୬୦ ମେଗାୱାଟ ହେବ, ଯାହାର ଆନୁମାନିକ ମୂଲ୍ୟ ୫୬୦୦ କୋଟି ଟଙ୍କା ହେବ। ସମ୍ପ୍ରତି ଏହି ପ୍ରକଳ୍ପ ଅନୁମୋଦନ ପାଇଁ ଚୂଡାନ୍ତ ପର୍ଯ୍ୟାୟରେ ଅଛି ଏବଂ ଏସଇସିଏଲ୍ ର ଏକ ସହାୟକ କମ୍ପାନୀ ସିଆଇଏଲ୍ ଏଥିରେ ଅଂଶଧନ ଭାବେ ୮୫୭ କୋଟି ଟଙ୍କା ବିନିଯୋଗ କରିବ। ଏସ୍ଇସିଏଲ୍ ଏବଂ ମଧ୍ୟପ୍ରଦେଶ ପାୱାର୍ ଜେନେରେଟିଂ କମ୍ପାନୀ ଲିମିଟେଡ୍ ମଧ୍ୟରେ ମିଳିତ ଉଦ୍ୟମରେ ଏହି ପ୍ରକଳ୍ପ କାର୍ଯ୍ୟକାରୀ ହେବ । ଏହି ପ୍ରକଳ୍ପର କାର୍ଯ୍ୟ ଚଳିତ ଆର୍ଥିକ ବର୍ଷ ଶେଷ ସୁଦ୍ଧା ଆରମ୍ଭ ହେବବୋଲି ଆଶା କରାଯାଉଛି ଏବଂ ଏହାକୁ ୨୦୨୮ରେ ଶେଷ କରିବାପାଇଁ ଲକ୍ଷ୍ୟ ଧାର୍ଯ୍ୟ ହୋଇଛି । ଏହି ପ୍ରକଳ୍ପ ପାଇଁ ଆବଶ୍ୟକ ଜମିର ବ୍ୟବସ୍ଥା ହୋଇ ସାରିଛି।
ଅଧିକନ୍ତୁ, ମହାନଦୀ କୋଲ ଫିଲ୍ଡସ୍ ଲିମିଟେଡ୍ (ଏମସିଏଲ୍), ସିଆଇଏଲ ର ଅନ୍ୟ ଏକ ସହାୟକ କମ୍ପାନୀ, ମହାନଦୀ ବେସିନ୍ ପାୱାର୍ ଲିମିଟେଡ୍ କୁ ଏକ ସମ୍ପୂର୍ଣ୍ଣ ନିଜସ୍ୱ ସହାୟକ କମ୍ପାନୀ ଭାବରେ ସ୍ଥାପନ କରିଛି। ଏମସିଏଲ୍ ଏହାର ବସୁନ୍ଧରା ଖଣି ନିକଟରେ ୨ x ୮୦୦ ମେଗାୱାଟ ତାପଜ ବିଦ୍ୟୁତ କେନ୍ଦ୍ର ପ୍ରତିଷ୍ଠା କରିବାକୁ ଯୋଜନା କରିଛି। ଆନୁମାନିକ ୧୫,୯୪୭ କୋଟି ଟଙ୍କା ମୂଲ୍ୟଣ ଏହି ପିଟହେଡ୍ ପ୍ଲାଣ୍ଟ ପାଇଁ ୪୦୦୦ ମେଗାୱାଟରୁ ଅଧିକ ଶକ୍ତି କ୍ରୟ ଚୁକ୍ତିନାମା (ପିପିଏଏସ୍) ଲାଗି ବିଭିନ୍ନ ରାଜ୍ୟରୁ ଆଗ୍ରହ ପ୍ରକାଶ ପାଇଛି। ଏହି ପ୍ରକଳ୍ପର କାର୍ଯ୍ୟ ଆସନ୍ତା ବର୍ଷର ମଧ୍ୟଭାଗରେ ଆରମ୍ଭ ହେବ ଏବଂ ୨୦୨୮ ରେ ସମାପ୍ତ ପାଇଁ ଲକ୍ଷ୍ୟ ଧାର୍ଯ୍ୟ କରାଯାଇଛି।
କୋଇଲା ମନ୍ତ୍ରଣାଳୟ ନୂତନ ପିଟହେଡ୍ ତାପଜ ବିଦ୍ୟୁତ୍ କେନ୍ଦ୍ର ପ୍ରତିଷ୍ଠା ପାଇଁ ଉପଯୁକ୍ତ ଅଣ କୋଇଲା ଜମି ଖୋଜିବା ପାଇଁ ସିଆଇଏଲ ର ସମସ୍ତ ସହାୟକ କମ୍ପାନୀମାନଙ୍କୁ ପରାମର୍ଶ ଦେଇଛି। ପିଟହେଡରେ ତାପଜ କେନ୍ଦ୍ର ସ୍ଥାପନ କରିବା ଅଧିକ ଶସ୍ତା ଅଟେ, ଯାହାର ୟୁନିଟ୍ ପିଛା ସ୍ଥିର ମୂଲ୍ୟ ହାରାହାରି ୨.୫ ଟଙ୍କା ଏବଂ ଏକ ପରିବର୍ତ୍ତନଶୀଳ ମୂଲ୍ୟ ପ୍ରାୟ ୧.୨୫ ଟଙ୍କା ରହିବ ଏବଂ ୟୁନିଟ୍ ପିଛା ୪ଟଙ୍କାରୁ କମ୍ ଦରରେ ବିଦ୍ୟୁତ୍ ଉତ୍ପାଦନ କରିବା ସମ୍ଭବ ଅଟେ। ଭବିଷ୍ୟତରେ କୋଇଲା ବଳକା ହେବ ବୋଲି ଆକଳନ କରାଯାଉଥିବାରୁ ଏହି ନିଷ୍ପତ୍ତି ନିଆଯାଇଛି ଏବଂ ଏହା ନୂତନ ତାପଜ ବିଦ୍ୟୁତ୍ ଉତ୍ପାଦନ କେନ୍ଦ୍ର ସ୍ଥାପନ ସହିତ ସିଆଏଲ୍ ଏବଂ ଏନଏଲସିଆଇଏଲ ପାଇଁ ପରିଚାଳନାରେ ସ୍ଥିରତା ନିଶ୍ଚିତ କରିବାକୁ ଲକ୍ଷ୍ୟ ରଖାଯାଇଛି।
ଶକ୍ତି ମନ୍ତ୍ରଣାଳୟର ନୀତି ଅନୁଯାୟୀ, ତାପଜ ବିଦ୍ୟୁତ୍ ଉତ୍ପାଦନ କେନ୍ଦ୍ର ସହିତ ଆବଶ୍ୟକ ଅକ୍ଷୟ ଶକ୍ତି ଉତ୍ପାଦନ ସମ୍ଭାବନା ମଧ୍ୟ ସୃଷ୍ଟି ହୋଇଛି ଯାହା ଦ୍ୱାରା ତାପଜ ଏବଂ ସୌର ଶକ୍ତି ମିଶ୍ରଣରେ ବିଦ୍ୟୁତ୍ ଉତ୍ପାଦନ ବୃଦ୍ଧି ହୋଇପାରିବ। ଏହା ଉପଭୋକ୍ତାଙ୍କୁ ଶସ୍ତାରେ ବିଦ୍ୟୁତ୍ ଯୋଗାଇବାରେ ସାହାଯ୍ୟ କରିବ।