ଭୁବନେଶ୍ୱର: ବିଶ୍ୱ ପର୍ଯ୍ୟଟନ ଦିବସ ପାଳନର ଅବ୍ୟବହତି ପୂର୍ବରୁ ଆଜି ପର୍ଯ୍ୟଟନ ବିଭାଗର ସାଂସ୍କୃତିକ ପରିଷଦ ପକ୍ଷରୁ ଭୁବନେଶ୍ୱରସ୍ଥିତ ପର୍ଯ୍ୟଟନ ଭବନରେ ରକ୍ତଦାନ ଶିବିର ଆୟୋଜିତ ହୋଇଛି। ଏହି ରକ୍ତଦାନ ଶିବିର ରେଡ୍କ୍ରସ୍ ସୋସାଇଟି ସହଯୋଗରେ ଆୟୋଜନ କରାଯାଇଥିବାବେଳେ ବିଭାଗର କର୍ମଚାରୀ ଓ ଅଧିକାରୀମାନେ ଅଂଶଗ୍ରହଣ କରିଥିଲେ।
ବିଶ୍ୱ ପର୍ୟ୍ୟଟନ ଦିବସ ପ୍ରତିବର୍ଷ ସେପେଫମ୍ବର ୨୭ ତାରିଖରେ ସର୍ବଭାରତୀୟ ସ୍ତରରେ ପାଳନ କରାଯାଏ। ପର୍ଯ୍ୟଟନର ସାମାଜିକ, ଅର୍ଥନୈତିକ ଏବଂ ସାଂସ୍କୃତିକ ପ୍ରଭାବକୁ ପରିଚିତ କରାଇବାରେ ଏହି ଦିବସ ମହତ୍ୱପୂର୍ଣ୍ଣ ଭୂମିକା ଗ୍ରହଣ କରିଥାଏ। ଚଳିତ ବର୍ଷର ବିଷୟବସ୍ତୁ ‘ପର୍ଯ୍ୟଟନ ଏବଂ ସବୁଜ ନିବେଶ’ ଶୀର୍ଷକ ଉପରେ ଏହି ଦିବସ ବିଶ୍ୱବ୍ୟାପୀ ପାଳିତ ହେଉଛି। ଏହି ମର୍ମରେ ପର୍ଯ୍ୟଟନ ବିଭାଗର ସାଂସ୍କୃତିକ ପରିଷଦ ଏକ ରକ୍ତଦାନ ଶିବିର ଆୟୋଜନ କରି ସମାଜକୁ ସଚେତନ କରିବା ପାଇଁ ପଦକ୍ଷେପ ନେଇଥିଲା।
ପର୍ଯ୍ୟଟନ ମନ୍ତ୍ରୀ ଅଶ୍ୱିନୀ କୁମାର ପାତ୍ର କହିଛନ୍ତି ଯେ ଆମ ବିଭାଗ ବିଶ୍ୱ ପର୍ଯ୍ୟଟନ ଦିବସକୁ ଏକ ଅଭିନବ ଏବଂ ସ୍ୱତନ୍ତ୍ର ଭାବେ ପାଳନ କରିଥିବାରୁ ଏହା ଅତ୍ୟନ୍ତ ପ୍ରଶଂସନୀୟ।
ପର୍ଯ୍ୟଟନ ବିଭାଗ ନିର୍ଦ୍ଦେଶକ ସଚିନ୍ ଆର. ଯାଦବ ଏହି କାର୍ଯ୍ୟକ୍ରମ ଆୟୋଜନ କରିବାରେ ସହଯୋଗ କରିଥିବାରୁ ଅଧିକାରୀ ଓ କର୍ମଚାରୀମାନଙ୍କୁ କୃତଜ୍ଞତା ଜ୍ଞାପନ କରିଥିଲେ। ସ୍ୱାସ୍ଥ୍ୟ ଏବଂ ସୁସ୍ଥତା ପାଇଁ ରକ୍ତଦାନ ହେଉଛି ଏକ ଗୁରୁତ୍ୱପୂର୍ଣ୍ଣ ମାଧ୍ୟମ ଏବଂ ଏହା ସାମାଜିକ ଦାୟିତ୍ୱବୋଧ ପାଇଁ ବିଭାଗର ପ୍ରତିବଦ୍ଧତାକୁ ସୂଚାଉଛି ବୋଲି ସେ ଉଲ୍ଲେଖ କରିଥିଲେ।
ଏହି କାର୍ଯ୍ୟକ୍ରମରେ ଓଡ଼ିଶା ପର୍ଯ୍ୟଟନ ଉନ୍ନୟନ ନିଗମର ଅଧ୍ୟକ୍ଷ ଡକଫର ଲେନିନ୍ ମହାନ୍ତି, ବିଏନ୍ଟିୱାଇୱାଇ ଉପଦେଷ୍ଟା ଦୁର୍ଗା ପ୍ରସାଦ ସାମନ୍ତରାୟ, ପର୍ଯ୍ୟଟନ ବିଭାଗ ତଥା ଓଟିଡିସିର ଅନ୍ୟ ବରିଷ୍ଠ ଅଧିକାରୀମାନେ ଉପସ୍ଥିତ ଥିଲେ। ରକ୍ତଦାନ ଶିବିରରେ ବହୁ ସଂଖ୍ୟାରେ ରକ୍ତଦାତା ଯୋଗଦାନ କରିବା ସହ ୪୫ ପ୍ଲସ୍ ୟୁନିଟ୍ ରକ୍ତ ସଂଗ୍ରହ କରାଯାଇଥିଲା।