ନୂଆଦିଲ୍ଲୀ: କାନାଡା ଏବଂ ଭାରତ ମଧ୍ୟରେ ଚାଲିଥିବା ତିକ୍ତତା ମଧ୍ୟରେ ଆମେରିକାର ବୈଦେଶିକ ବିଭାଗ ମୁଖପାତ୍ର ମାଥ୍ୟୁ ମିଲର କହିଛନ୍ତି ଯେ, କାନାଡାର ପରିସ୍ଥିତିକୁ ନେଇ ଆମେ ଚିନ୍ତିତ। ଆମେ କାନାଡା ସହିତ ସମ୍ପୂର୍ଣ୍ଣ ସହଯୋଗ କରିଛୁ। ଅନୁସନ୍ଧାନରେ ସହାୟତା କରିବାକୁ ଆମେ ଭାରତକୁ ମଧ୍ୟ ନିବେଦନ କରିଛୁ ଏବଂ ଆମେ ଏହି ନିବେଦନ ଜାରି ରଖିବୁ। ଭାରତ ଆମେରିକାର ଏକ ଗୁରୁତ୍ୱପୂର୍ଣ୍ଣ ଅଂଶୀଦାର ଏବଂ ଆମେ ଅନେକ ପ୍ରସଙ୍ଗରେ ଭାରତ ସହିତ କାମ କରୁ। କିନ୍ତୁ ଏହି ପ୍ରସଙ୍ଗରେ ଆମେ କାନାଡାର ଅନୁସନ୍ଧାନରେ ସହଯୋଗ କରିବାକୁ ସେମାନଙ୍କୁ ନିବେଦନ କରୁଛୁ।
ଭାରତ ବିରୋଧରେ ଆସିଥିବା ଅଭିଯୋଗ ଆଦୌ ସତ୍ୟ ନୁହେଁ:
ଏଠାରେ କାନାଡା ସରକାର ଭାରତ ବିରୋଧରେ ଆସିଥିବା ଅଭିଯୋଗ ଉପରେ ବୈଦେଶିକ ମନ୍ତ୍ରୀ ଏସ ଜୟଶଙ୍କର ନିଜର ମତ ପ୍ରକାଶ କରିଛନ୍ତି। ସେ କହିଛନ୍ତି ଯେ, ଆତଙ୍କବାଦୀ ନିଜ୍ଜର ହତ୍ୟା ମାମଲାରେ ଭାରତ ବିରୋଧରେ ଆସିଥିବା ଅଭିଯୋଗ ଆଦୌ ସତ୍ୟ ନୁହେଁ। ଏହାର କାରଣ ହେଉଛି ଯେ, ଭାରତ ଏହାର ନିର୍ଦ୍ଧାରିତ ନୀତି ଅନୁଯାୟୀ କଦାପି ଏହି ପରି କାର୍ଯ୍ୟରେ ଜଡିତ ହୁଏନାହିଁ। ପ୍ରକାଶ ଯେ, ଭାରତ ଏବଂ କାନାଡା ମଧ୍ୟରେ କୂଟନୈତିକ ବିବାଦ ସେତେବେଳେ ଆରମ୍ଭ ହୋଇଥିଲା, ଯେତେବେଳେ କାନାଡାର ପ୍ରଧାନମନ୍ତ୍ରୀ ଜଷ୍ଟିନ ଟ୍ରୁଡୋ ଦାବି କରିଥିଲେ ଯେ ଜୁନ ମାସରେ କାନାଡାର ମାଟିରେ ନିଜ୍ଜର ହତ୍ୟାରେ ଭାରତର ସମ୍ପୃକ୍ତି ନେଇ ତାଙ୍କ ସରକାରଙ୍କର ବିଶ୍ୱାସନୀୟ ଅଭିଯୋଗ ରହିଛି।
ଆମେରିକା ମଧ୍ୟ ଭାରତକୁ ସମର୍ଥନ କରିଥିଲା:
ସୂଚନାଯୋଗ୍ୟ ଯେ, ହ୍ଵାଇଟ ହାଉସ ମଧ୍ୟ ଭାରତ ବିରୋଧରେ କାନାଡା ଦେଇଥିବା ଅଭିଯୋଗକୁ ଭୁଲ ବୋଲି କହିଛି। କିଛି ଦିନ ପୂର୍ବରୁ ହ୍ଵାଇଟ ହାଉସ କହିଥିଲା ଯେ, କାନାଡା ମାଟିରେ ଜଣେ ଶିଖ ବିଚ୍ଛିନ୍ନତାବାଦୀ ହତ୍ୟାକାଣ୍ଡରେ ନୂଆଦିଲ୍ଲୀ ସମ୍ପୃକ୍ତ ଥିବା କାନାଡାର ଅଭିଯୋଗକୁ ନେଇ ଆମେରିକା ଭାରତ ସହ ଯୋଗାଯୋଗରେ ଅଛି। ହ୍ଵାଇଟ ହାଉସର ପ୍ରେସ ସଚିବ କେରିନ୍ ଜିନ-ପିୟର କହିଛନ୍ତି ଯେ ଆମେରିକା ମଧ୍ୟ କାନାଡା ସରକାରଙ୍କ ସହ ନିୟମିତ ଯୋଗାଯୋଗରେ ଅଛି।