ନୂଆଦିଲ୍ଲୀ: ଅବସରପ୍ରାପ୍ତ ଆଇପିଏସ୍ ତଥା ପୂର୍ବତନ ମନ୍ତ୍ରୀ ରୁସ୍ତମ ସିଂ ବିଜେପିରୁ ଇସ୍ତଫା ଦେଇଛନ୍ତି। ଟିକେଟ୍ ବଣ୍ଟନ ଉପରେ ରୁସ୍ତମ ସିଂ ଅସନ୍ତୁଷ୍ଟ ହୋଇଛନ୍ତି। ରୁସ୍ତମ ସିଂଙ୍କ ପୁଅ ରାକେଶ ସିଂ ବିଏସପିରୁ ନିର୍ବାଚନ ଲଢୁଛନ୍ତି। ୨୦୦୩ ରୁ ୨୦୧୮ ପର୍ଯ୍ୟନ୍ତ ମୋରେନା ବିଧାନସଭା ଆସନରୁ ବିଜେପି ତାଙ୍କୁ ଚାରିଥର ଟିକେଟ୍ ଦେଇଥିଲା। ୨୦୦୩ ଏବଂ ୨୦୧୩ ରେ ସେ ନିର୍ବାଚନ ଜିତିଥିଲେ। ୨୦୦୮ ଏବଂ ୨୦୧୮ ନିର୍ବାଚନରେ ରୁସ୍ତମ ହାରିଯାଇଥିଲେ। ବିଜେପି ସରକାରରେ ସେ କ୍ରୀଡା, ସ୍ୱାସ୍ଥ୍ୟ, ଖାଦ୍ୟ, ପଞ୍ଚାୟତ ଏବଂ ଗ୍ରାମୀଣ ବିକାଶ ଭଳି ଗୁରୁତ୍ୱପୂର୍ଣ୍ଣ ବିଭାଗର ମନ୍ତ୍ରୀ ଥିଲେ।
ବିଧାନସଭା ଟିକେଟ ନ ପାଇ ରୁସ୍ତମ ସିଂ ଏବଂ ତାଙ୍କ ପୁଅ ରାକେଶ ନାରାଜ ହୋଇଥିଲେ। ଦୁଇ ଦିନ ପୂର୍ବେ ପୂର୍ବତନ ମନ୍ତ୍ରୀ ରୁସ୍ତମ ସିଂଙ୍କ ପୁଅ ରାକେଶ ବିଏସପିରେ ଯୋଗ ଦେଇଥିଲେ। ବିଏସପି ପକ୍ଷରୁ ରାକେଶ ରୁସ୍ତମ ସିଂ ମୋରେନା ବିଧାନସଭାରୁ ପ୍ରାର୍ଥୀ ହୋଇଛନ୍ତି। ବିଜେପି କୌଣସି କାର୍ଯ୍ୟାନୁଷ୍ଠାନ ଗ୍ରହଣ କରିବା ପୂର୍ବରୁ ରୁସ୍ତମ ସିଂ ଦଳର ପ୍ରାଥମିକ ସଦସ୍ୟତା ଏବଂ ଦାୟିତ୍ୱରୁ ଇସ୍ତଫା ଦେଇଛନ୍ତି।
