ପାକିସ୍ତାନରେ ଏକ ବୋମା ବିସ୍ଫୋରଣରେ ତିନି ସେନା ଅଫିସର ନିହତ ହୋଇଛନ୍ତି। ରାସ୍ତା ଦାଢରେ ଏକ ବୋମା ବିସ୍ଫୋରଣରେ ଏକ ମିଲିଟାରୀ ଗାଡି ଉଡିଯିବାରୁ ତିନି ଅଫିସରଙ୍କ ସମେତ ଜଣେ ସୈନ୍ୟ ନିହତ ହୋଇଛନ୍ତି। ଆଫଗାନିସ୍ତାନ ସୀମାରେ ରହିଥିବା ଉତ୍ତର ଓ୍ବଜିରିସ୍ତାନରେ ଏହି ବିସ୍ଫୋରଣ ଘଟିଥିଲା। ଶୁକ୍ରବାର ଏକ ମିଲିଟାରୀ ଗାଡିକୁ ଲକ୍ଷ୍ୟ କରି ଏହି ଆଇଡି ବିସ୍ଫୋରଣ କରାଯାଇଥିଲା। ଓ୍ବଜିରିସ୍ତାନର ଖରକମର ଅଞ୍ଚଳରେ ଏହି ଆଇଡି ବିସ୍ଫୋରଣ ଘଟି ତିନି ସେନାଧିକାରୀଙ୍କ ସମେତ ଜଣେ ସୈନ୍ୟ ନିହତ ହୋଇଥିଲେ। ଏହି ଘଟଣାରେୋ ଅନ୍ୟ ୪ ଜଣ ସୈନ୍ୟ ଆହତ ହୋଇଛନ୍ତି। ନିହତ ହୋଇଥିବା ସେନାଧିକାରୀଙ୍କ ମଧ୍ୟରେ ରହିଛନ୍ତି ଲ୍ୟୁଟନାଣ୍ଟ କଲୋନେଲ ରଶିଦ କରିମ୍ ବେଗ୍, ମେଜର ମୋଇଜ୍ ମକସୁଦ୍ ବେଗ୍, କ୍ୟାପ୍ଟେନ୍ ଆରିଫ୍ ଉଲ୍ଳା ଏବଂ ଲାନ୍ସ ହାବିଲଦାର ଜାହିର। ଏହି ଆକ୍ରମଣ ପାଇଁ କୌଣସି ଆତଙ୍କୀ ସଙ୍ଗଠନ ନିଜକୁ ଦାୟୀ କରି ନାହାନ୍ତି। ବିଗତ ଏକ ମାସ ମଧ୍ୟରେ ହୋଇଥିବା ବିଭିନ୍ନ ଆକ୍ରମଣରେ ୧୦ ସୁରକ୍ଷା କର୍ମୀଙ୍କ ସମେତ ୩୫ ଜଣ ଆହତ ହୋଇଛନ୍ତି।
ପାକିସ୍ତାନରେ ବୋମା ବିସ୍ଫୋରଣ : ତିନି ସେନା ଅଫିସର ନିହତ
Published:
Jun 8, 2019, 9:54 am IST
