ନୂଆଦିଲ୍ଲୀ: ଟିଏମସି ସାଂସଦ ମହୁଆ ମୋଇତ୍ରାଙ୍କ ବିରୋଧରେ ଆସିଥିବା ‘କ୍ୟାସ୍ ଫର୍ କ୍ୱେରି’ ଅଭିଯୋଗର ତଦନ୍ତ ପାଇଁ ନଭେମ୍ବର ୯ (ଗୁରୁବାର) ଲୋକସଭା ନୈତିକତା କମିଟିର ଏକ ବୈଠକ ଡକାଯାଇଛି। ସୂଚନାଯୋଗ୍ୟ, ପୂର୍ବରୁ ଏହି ବୈଠକ ଆସନ୍ତାକାଲି (ମଙ୍ଗଳବାର) ହେବାର ଥିଲା।
ବିଜେପି ନେତା ବିନୋଦ କୁମାର ସୋନକରଙ୍କ ଅଧ୍ୟକ୍ଷତାରେ ଗଠିତ ଲୋକସଭାର ନୈତିକତା କମିଟି ଏହାର ତଦନ୍ତ ଶେଷ କରିଛି। ମିଳିଥିବା ସୂଚନା ଅନୁଯାୟୀ, ତଦନ୍ତ କମିଟି ମୋଇତ୍ରାଙ୍କ ବିରୋଧରେ କଠୋର କାର୍ଯ୍ୟାନୁଷ୍ଠାନ ପାଇଁ ସୁପାରିସ କରିପାରେ। ସମ୍ଭବତଃ ମହୁଆ ମୋଇତ୍ରାଙ୍କ ସଂସଦ ସଦସ୍ୟତା ମଧ୍ୟ ରଦ୍ଦ ହୋଇପାରେ।
ସମ୍ପୂର୍ଣ୍ଣ ଘଟଣାଟି ଏପରି
ବିଜେପି ସାଂସଦ ନିଶିକାନ୍ତ ଦୁବେ ଅଭିଯୋଗ କରିଛନ୍ତି ଯେ ମହୁଆ ମୋଇତ୍ରା ଲାଞ୍ଚ ବଦଳରେ ବ୍ୟବସାୟୀ ଦର୍ଶନ ହିରାନନ୍ଦାନୀଙ୍କ ନିର୍ଦ୍ଦେଶରେ ଆଦାନୀ ଗ୍ରୁପକୁ ଟାର୍ଗେଟ କରି ଲୋକସଭାରେ ପ୍ରଶ୍ନ ପଚାରିଥିଲେ। ସେ ଅଭିଯୋଗ କରିଛନ୍ତି ଯେ ମହୁଆ ତାଙ୍କ ଲୋକସଭା ମେଲ୍ ଆଇଡିର ଲଗଇନ୍ ହିରାନନ୍ଦାନୀଙ୍କୁ ଦେଇଥିଲେ ଏବଂ ସେ ଏହାକୁ ବିଭିନ୍ନ ସ୍ଥାନରୁ ପ୍ରଶ୍ନ ଅପଲୋଡ଼ କରୁଥିଲେ। ଅନ୍ୟପକ୍ଷରେ ମହୁଆ ମଧ୍ୟ ସ୍ୱୀକାର କରିଛନ୍ତି ଯେ ହିରାନନ୍ଦାନୀ ତାଙ୍କ ଲଗଇନ୍ ବ୍ୟବହାର କରିଥିଲେ, କିନ୍ତୁ ଟିଏମସି ସାଂସଦ କହିଛନ୍ତି ଯେ ଲାଞ୍ଚ ପାଇବା ପାଇଁ କିମ୍ବା କୌଣସି ଉପହାର ପାଇବା ପାଇଁ ସେ ଏପରି କରିନଥିଲେ।
ମୋଇତ୍ରା ତଦନ୍ତ ଅଧାରୁ ଛାଡ଼ି ଚାଲିଗଲେ
‘କ୍ୟାସ୍ ଫର୍ କ୍ୱେରି’ ମାମଲାରେ ଗୁରୁବାର (ନଭେମ୍ବର ୨) ସଂସଦର ନୈତିକତା କମିଟି ସମ୍ମୁଖରେ ହାଜର ହୋଇଥିଲେ ମହୁଆ ମୋଇତ୍ରା । ତେବେ ସେ ତଦନ୍ତକୁ ଅଧାବାଟରେ ଛାଡ଼ି ଚାଲିଯାଇଥିଲେ। ବୈଠକରେ ନୈତିକତା କମିଟି ପକ୍ଷରୁ ତାଙ୍କୁ ଆପତ୍ତିଜନକ ଓ ବ୍ୟକ୍ତିଗତ ପ୍ରଶ୍ନ ପଚରାଯାଇଥିଲା ବୋଲି ସେ ପରେ ଅଭିଯୋଗ କରିଛନ୍ତି।
ମୋଇତ୍ରା ଲୋକସଭା ବାଚସ୍ପତି ଓମ୍ ବିର୍ଲାଙ୍କୁ ଚିଠି ଲେଖି କହିଛନ୍ତି ଯେ ବୈଠକରେ ତାଙ୍କୁ ‘ନଗ୍ନ’ କରାଯାଇଛି। ନୈତିକତା କମିଟି ବ୍ୟକ୍ତିଗତ ଓ ଅନୈତିକ ପ୍ରଶ୍ନ ପଚାରିଥିବା ସେ ଅଭିଯୋଗ କରିଛନ୍ତି।
ମୋଇତ୍ରାଙ୍କ ଅଭିଯୋଗକୁ ଖଣ୍ଡନ କଲେ ସୋନକର
ନୈତିକତା କମିଟିରେ ୧୫ ଜଣ ସଦସ୍ୟ ଅଛନ୍ତି, ଯେଉଁମାନଙ୍କ ମଧ୍ୟରୁ ଅଧିକାଂଶ ବିଜେପିର। ବିଶେଷ କରି ଗତ ବୈଠକରେ ସୋନକର ତାଙ୍କୁ ଅଯଥା ଓ ବ୍ୟକ୍ତିଗତ ପ୍ରଶ୍ନ ପଚାରିଥିବା ଅଭିଯୋଗ କରିବା ପରେ କମିଟି ମୋଇତ୍ରାଙ୍କ ଆଚରଣକୁ ଗମ୍ଭୀରତାର ସହ ନେବାର ସମ୍ଭାବନା ରହିଛି।
ସୋନକର ମୋଇତ୍ରାଙ୍କ ଅଭିଯୋଗକୁ ଖଣ୍ଡନ କରିଥିଲେ। କମିଟିରେ ଥିବା ବିରୋଧୀ ଦଳର ସଦସ୍ୟମାନେ ମୋଇତ୍ରାଙ୍କ ଆଭିମୁଖ୍ୟକୁ ସମର୍ଥନ କରିଥିଲେ ଏବଂ ହଙ୍ଗାମା ପରେ ନଭେମ୍ବର ୨ ବୈଠକରୁ ଓହରି ଯାଇଥିଲେ।