ନୂଆଦିଲ୍ଲୀ: ଆଜି ବିଶ୍ୱକପରେ ଭାରତ ଏବଂ ନେଦରଲ୍ୟାଣ୍ଡ ଦଳ ମଧ୍ୟରେ ସଂଘର୍ଷ ହେବ। ଏହା ଟୁର୍ଣ୍ଣାମେଣ୍ଟର ଶେଷ ଲିଗ୍ ମ୍ୟାଚ୍। ବେଙ୍ଗାଲୁରୁର ଏମ ଚିନ୍ନାସ୍ୱାମୀ ଷ୍ଟାଡିୟମରେ ଅପରାହ୍ନ ୨ ଟାରେ ଉଭୟ ଦଳ ମୁହାଁମୁହିଁ ହେବେ। ଏହି ପଡିଆ ଗତ କିଛି ବର୍ଷ ଧରି ଚୌକା ଓ ଛକା ବର୍ଷା ପାଇଁ ଜଣାଶୁଣା। କେବଳ ଆଇପିଏଲରେ ଏହା ରନ୍ ବର୍ଷା କରେ ନାହିଁ, ଆନ୍ତର୍ଜାତୀୟ କ୍ରିକେଟ୍ ରେ ମଧ୍ୟ ଉଭୟ ଧଳା ବଲ୍ ଫର୍ମାଟ୍ (ଦିନିକିଆ ଏବଂ ଟି-୨୦) ରେ ବହୁତ ରନ୍ ବର୍ଷା ହୁଏ। ଆଜିର ମ୍ୟାଚରେ ମଧ୍ୟ ପିଚର ସ୍ଥିତି ସମାନ ହୋଇପାରେ।
୨୭ ଟି ମ୍ୟାଚରେ ୧୭ ଥର ୩୦୦+ ସ୍କୋର ହୋଇଛି:
ଏମ ଚିନ୍ନାସ୍ୱାମୀ ଷ୍ଟାଡିୟମରେ ଏପର୍ଯ୍ୟନ୍ତ ମୋଟ ୨୭ ଟି ODI ମ୍ୟାଚ୍ ଖେଳାଯାଇଛି। ଏଥିମଧ୍ୟରେ ପ୍ରଥମେ ବ୍ୟାଟିଂ କରୁଥିବା ଦଳ ୧୩ ଥର ଜିତିଛି। ୧୪ ଥର ପଛରେ ବ୍ୟାଟିଂ କରିଥିବା ଦଳ ସଫଳତା ହାସଲ ପାଇଛନ୍ତି। ଉଲ୍ଲେଖଥାଉ କି, ଏଠାରେ ଟସ୍ ଜିତିଥିବା ଦଳ ପଛରେ ବ୍ୟାଟିଂ କରିବାକୁ ପସନ୍ଦ କରନ୍ତି। ଏହି ଗ୍ରାଉଣ୍ଡରେ ସର୍ବାଧିକ ସ୍କୋର ୪୦୧ ରନ୍ ହୋଇଛି, ଯାହାକି ଏହି ବିଶ୍ୱକପରେ ପାକିସ୍ତାନ ବିପକ୍ଷରେ ନ୍ୟୁଜିଲାଣ୍ଡ ଦ୍ୱାରା କରାଯାଇଥିଲା। ଯେତେବେଳେ କି, ସର୍ବନିମ୍ନ ସ୍କୋର ୧୫୬ ହୋଇଛି। ଏହି ବିଶ୍ୱକପ ସମୟରେ ମଧ୍ୟ ଏହି ସ୍କୋର କରାଯାଇଥିଲା। ବିଶେଷ କଥା ହେଉଛି ଏଠାରେ ଖେଳାଯାଇଥିବା ୨୭ ଟି ମ୍ୟାଚ ମଧ୍ୟରୁ ୧୭ ଥର ୩୦୦+ ସ୍କୋର କରାଯାଇଛି।
ଦ୍ରୁତ ବୋଲର ଅଧିକ ୱିକେଟ୍ ନେଇଛନ୍ତି:
ଏହି ବିଶ୍ୱକପ୍ରେ ବେଙ୍ଗାଲୁରୁରେ ୪ ଟି ମ୍ୟାଚ୍ ଖେଳାଯାଇଛି। ଏଥିମଧ୍ୟରୁ ଦୁଇଟି ମ୍ୟାଚ୍ କମ୍ ସ୍କୋରିଂ ହୋଇଛି କିନ୍ତୁ ଦୁଇଟି ମ୍ୟାଚ୍ ରେ ବଡ ରନ୍ ସ୍କୋର କରାଯାଇଛି। କେବଳ ନ୍ୟୁଜିଲ୍ୟାଣ୍ଡ ଏଠାରେ ୪୦୧ ର ବୃହତ ସ୍କୋର କରିନାହିଁ, ଅଷ୍ଟ୍ରେଲିଆ ମଧ୍ୟ ଏହି ବିଶ୍ୱକପରେ ୩୬୭ ରନ୍ ସଂଗ୍ରହ କରିଛି। ଏହି ପଡିଆରେ ଛକା ବର୍ଷା ହୁଏ। ଏଠାରେ ମାତ୍ର ୪ ଟି ମ୍ୟାଚରେ ହିଟମ୍ୟାନ୍ ରୋହିତ ଶର୍ମା ୨୮ ଟି ଛକା ମାରିଛନ୍ତି। ଏଠାରେ ସର୍ବାଧିକ ୱିକେଟ୍ ନେଇଥିବା ବ୍ୟକ୍ତିଙ୍କ ମଧ୍ୟରେ ଟପ୍ -୫ ରେ ସମସ୍ତ ଦ୍ରୁତ ବୋଲରମାନେ ଅନ୍ତର୍ଭୁକ୍ତ।
