ନୂଆଦିଲ୍ଲୀ: ଉତ୍ତରାଖଣ୍ଡର ଉତ୍ତରକାଶୀରେ ନିର୍ମାଣାଧୀନ ଟନେଲରେ ୪୦ ଜଣ ଶ୍ରମିକ ଫସି ରହିଛନ୍ତି। ୧୨ ନଭେମ୍ବର ସକାଳେ ଏହି ଟନେଲ୍ ହଠାତ୍ ଭୁଶୁଡି ପଡିଥିଲା। ଭିତରେ ଫସି ରହିଥିବା ଶ୍ରମିକମାନଙ୍କୁ ଉଦ୍ଧାର କରିବା ପାଇଁ ଗୁରୁବାର ସକାଳେ ‘ଆମେରିକୀୟ ଆଗର୍’ ମେସିନ୍ ଲଗାଇ ଉଦ୍ଧାର କାର୍ଯ୍ୟ ଆରମ୍ଭ ହୋଇଛି। ବୁଧବାର ସନ୍ଧ୍ୟାରେ ଭାରତୀୟ ବାୟୁସେନାର ହର୍କ୍ୟୁଲସ୍ ବିମାନ ଦ୍ଵାରା ଏହି ମେସିନ୍ ଦିଲ୍ଲୀରୁ ଉତ୍ତରାକାଶୀକୁ ଅଣାଯାଇଥିଲା। ଶ୍ରମିକମାନଙ୍କ ଉଦ୍ଧାର ପାଇଁ ନରୱେ ଏବଂ ଥାଇଲ୍ୟାଣ୍ଡର ଉଦ୍ଧାରକାରୀ ଦଳଙ୍କ ସହିତ ମଧ୍ୟ ପରାମର୍ଶ ନିଆଯାଉଛି। ସେପଟେ କେନ୍ଦ୍ର ମନ୍ତ୍ରୀ ଭି.କେ ସିଂ ଗୁରୁବାର ଦିନ ଟନେଲ ଭିତରକୁ ଯାଇଥିଲେ। ଶ୍ରମିକମାନଙ୍କୁ ଉଦ୍ଧାର କରିବାକୁ ଆହୁରି ୨ ରୁ ୩ ଦିନ ଲାଗିପାରେ ବୋଲି ସେ କହିଛନ୍ତି।
ଚାରଧାମ ପ୍ରକଳ୍ପ ଅଧୀନରେ, ବ୍ରହ୍ମଖାଲ ଏବଂ ଯମୁନୋତ୍ରି ଜାତୀୟ ରାଜପଥରେ ସିଲ୍କିରା ଏବଂ ଡଣ୍ଡଲଗାଓଁ ମଧ୍ୟରେ ଏହି ଟନେଲ୍ ନିର୍ମାଣ କରାଯାଉଛି। ନଭେମ୍ବର ୧୨ (ରବିବାର) ତାରିଖରେ ହଠାତ୍ ଟନେଲର ପ୍ରବେଶ ସ୍ଥାନ (ସିଲ୍କିରା ଟନେଲ୍) ଠାରୁ ୨୦୦ ମିଟର ଦୂରରେ ମାଟି ଖସିଯାଇଥିଲା। ଏହି କାରଣରୁ ଏହି ଶ୍ରମିକମାନେ ବଫର୍ ଜୋନ୍ ରେ ଅଟକି ଯାଇଥିଲେ। ବର୍ଜ୍ୟବସ୍ତୁ ୭୦ ମିଟର ପର୍ଯ୍ୟନ୍ତ ବ୍ୟାପିଛି। ଏହି ଶ୍ରମିକମାନେ ବିହାର, ଝାଡଖଣ୍ଡ, ଉତ୍ତରପ୍ରଦେଶ, ପଶ୍ଚିମବଙ୍ଗ, ଓଡିଶା, ଉତ୍ତରାଖଣ୍ଡ ଏବଂ ହିମାଚଳ ପ୍ରଦେଶର ଅଟନ୍ତି।
ନରୱେ ଏବଂ ଥାଇଲ୍ୟାଣ୍ଡର ବିଶେଷଜ୍ଞଙ୍କଠାରୁ ସହାୟତା ନିଆଯାଉଛି:
କେନ୍ଦ୍ର ମନ୍ତ୍ରୀ ଏହା ମଧ୍ୟ ନିଶ୍ଚିତ କରିଛନ୍ତି ଯେ, ଉଦ୍ଧାରକାରୀ ଦଳ କର୍ମଚାରୀମାନଙ୍କୁ ଉଦ୍ଧାର କରିବା ପାଇଁ ନରୱେ ଏବଂ ଥାଇଲ୍ୟାଣ୍ଡର ବିଶେଷଜ୍ଞଙ୍କ ସହ କଥା ହୋଇଛନ୍ତି। ଏଥିରେ ଥାଇ ଫାର୍ମ ମଧ୍ୟ ଅନ୍ତର୍ଭୁକ୍ତ ଯାହାକି ୧୭ ଦିନ ଗୁମ୍ଫାରେ ଫସି ରହିଥିବା, ୧୨ ଜଣ ପିଲା ଏବଂ ସେମାନଙ୍କ ଫୁଟବଲ ପ୍ରଶିକ୍ଷକ ଉଦ୍ଧାର କରିଥିଲା।
କେନ୍ଦ୍ର ମନ୍ତ୍ରୀ ଶ୍ରମିକମାନଙ୍କ ସହ କଥା ହୋଇଥିଲେ:
କେନ୍ଦ୍ର ମନ୍ତ୍ରୀ ଭି.କେ ସିଂ ନିଜେ ଏକ ସାମ୍ବାଦିକ ସମ୍ମିଳନୀ କରିଥିଲେ। ସେ କହିଥିଲେ ଯେ, “ଆମର ପ୍ରାଥମିକତା ହେଉଛି ଯେ ଫସିରହିଥିବା ଶ୍ରମିକମାନେ ନିରାପଦରେ ରୁହନ୍ତୁ ଏବଂ ଯଥାଶୀଘ୍ର ଟନେଲରୁ ସେମାନଙ୍କୁ ସ୍ଥାନାନ୍ତର କରାଯାଉ। ପ୍ରଧାନମନ୍ତ୍ରୀଙ୍କ ଠାରୁ ଆରମ୍ଭ କରି ମୁଖ୍ୟମନ୍ତ୍ରୀଙ୍କ ପର୍ଯ୍ୟନ୍ତ ସମସ୍ତେ ସହଯୋଗ କରୁଛନ୍ତି। ସମସ୍ତଙ୍କ ପରାମର୍ଶ ଉପରେ ବିଚାର କରାଯାଉଛି। “ମୁଁ ଶ୍ରମିକମାନଙ୍କ ସହ କଥା ହୋଇଛି। ସେମାନଙ୍କର ମନୋବଳ ଅଧିକ ଏବଂ ସେମାନେ ଜାଣନ୍ତି ଯେ ସରକାର ସେମାନଙ୍କୁ ବଞ୍ଚାଇବାକୁ ଚେଷ୍ଟା କରୁଛନ୍ତି।”
୨୪X୭ କାର୍ଯ୍ୟ କରୁଛନ୍ତି ୨୦୦ ଜଣଙ୍କର ଟିମ୍:
ଶ୍ରମିକମାନଙ୍କୁ ଉଦ୍ଧାର କରିବା ପାଇଁ NHIDCL, NDRF, SDRF, ITBP, BRO ଏବଂ ଜାତୀୟ ରାଜପଥରୁ ୨୦୦ ରୁ ଅଧିକ ଲୋକଙ୍କ ଏକ ଟିମ୍ ୨୪ ଘଣ୍ଟା କାମ କରୁଛି। ଏହା ବ୍ୟତୀତ ଥାଇଲ୍ୟାଣ୍ଡ, ନରୱେ, ଫିନଲ୍ୟାଣ୍ଡ ସମେତ ଅନେକ ଦେଶର ବିଶେଷଜ୍ଞଙ୍କଠାରୁ ଅନଲାଇନ୍ ପରାମର୍ଶ ନିଆଯାଉଛି।
