ନୂଆଦିଲ୍ଲୀ: ପୋଷ୍ୟ ସନ୍ତାନ ଗ୍ରହଣ ପାଇଁ ଆଇନଗତଭାବେ ଉପଲବ୍ଧ ଶିଶୁଙ୍କ ସଂଖ୍ୟା ଏବଂ ପଞ୍ଜୀକୃତ ସମ୍ଭାବ୍ୟ ପୋଷ୍ୟ ପିତାମାତାଙ୍କ ସଂଖ୍ୟା ମଧ୍ୟରେ ଅସମାନତାକୁ ଦୃଷ୍ଟିରେ ରଖି ସୁପ୍ରିମକୋର୍ଟ ସୋମବାର ସମସ୍ତ ରାଜ୍ୟ ଏବଂ କେନ୍ଦ୍ରଶାସିତ ଅଞ୍ଚଳକୁ ଶିଶୁ ଯତ୍ନ ଅନୁଷ୍ଠାନରେ ପରିତ୍ୟକ୍ତ ଏବଂ ଆତ୍ମସମର୍ପଣ (ଓଏଏସ୍) ବର୍ଗର ପିଲାମାନଙ୍କୁ ଚିହ୍ନଟ କରିବା ପାଇଁ ପ୍ରତି ଦୁଇ ମାସରେ ଅଭିଯାନ ଚଳାଇବାକୁ ନିର୍ଦ୍ଦେଶ ଦେଇଛନ୍ତି।
ପ୍ରଧାନ ବିଚାରପତି ଡିୱାଇ ଚନ୍ଦ୍ରଚୂଡ଼, ଜଷ୍ଟିସ ଜେବି ପାର୍ଦିୱାଲା ଓ ଜଷ୍ଟିସ ମନୋଜ ମିଶ୍ରଙ୍କୁ ନେଇ ଗଠିତ ଖଣ୍ଡପୀଠ କହିଛନ୍ତି ଯେ, ଡିସେମ୍ବର ୭ ତାରିଖ ସୁଦ୍ଧା ଏଭଳି ପ୍ରଥମ ପ୍ରକ୍ରିୟା କରାଯିବା ଉଚିତ ।
୨୦୨୪ ଜାନୁଆରି ୩୧ ସୁଦ୍ଧା ପ୍ରତ୍ୟେକ ଜିଲ୍ଲା ଭିତରେ ସ୍ୱତନ୍ତ୍ର ଆଡପ୍ସନ୍ ଏଜେନ୍ସି (ଏସ୍ଏଏ) ଗଠନ କରିବାକୁ ସମସ୍ତ ରାଜ୍ୟ ଓ କେନ୍ଦ୍ରଶାସିତ ଅଞ୍ଚଳକୁ ନିର୍ଦ୍ଦେଶ ଦିଆଯାଇଛି । ଜୁଭେନାଇଲ ଜଷ୍ଟିସ (ଶିଶୁଙ୍କ ଯତ୍ନ ଓ ସୁରକ୍ଷା) ଆଇନ, ୨୦୧୫କୁ କାର୍ଯ୍ୟକାରୀ କରିବା ଦାୟିତ୍ୱରେ ଥିବା ନୋଡାଲ ବିଭାଗ ୨୦୨୪ ଜାନୁଆରୀ ୩୧ ସୁଦ୍ଧା କେନ୍ଦ୍ରୀୟ ପୋଷ୍ୟ ସମ୍ବଳ ପ୍ରାଧିକରଣ (କାରା)ର ନିର୍ଦ୍ଦେଶକ ଏବଂ ମହିଳା ଓ ଶିଶୁ ବିକାଶ ମନ୍ତ୍ରାଳୟର ସଚିବଙ୍କୁ ସକାରାତ୍ମକ ଭାବେ ଅନୁପାଳନ ସମ୍ପର୍କରେ ଅବଗତ କରାଇବେ ବୋଲି ଖଣ୍ଡପୀଠ କହିଛନ୍ତି ।
୨୦୨୪ ଜାନୁଆରି ୩୧ ସୁଦ୍ଧା ହିନ୍ଦୁ ପୋଷ୍ୟ ଗ୍ରହଣ ଓ ରକ୍ଷଣାବେକ୍ଷଣ ଆଇନ (ହାମା) ଗ୍ରହଣ ସମ୍ପର୍କିତ ତଥ୍ୟ ସଂଗ୍ରହ କରି କାରା ନିର୍ଦେଶକଙ୍କ ନିକଟରେ ଦାଖଲ କରିବାକୁ ଖଣ୍ଡପୀଠ ସମସ୍ତ ରାଜ୍ୟ ଓ କେନ୍ଦ୍ରଶାସିତ ଅଞ୍ଚଳକୁ ନିର୍ଦ୍ଦେଶ ଦେଇଛନ୍ତି । ସର୍ବୋଚ୍ଚ ନ୍ୟାୟାଳୟ ପୂର୍ବରୁ କହିଥିଲେ ଯେ ଭାରତରେ ଶିଶୁ ପୋଷ୍ୟ ଗ୍ରହଣ ପ୍ରକ୍ରିୟା ଅତ୍ୟନ୍ତ କଷ୍ଟକର ଏବଂ ଏହି ପ୍ରକ୍ରିୟାକୁ ‘ସୁବ୍ୟବସ୍ଥିତ’ କରିବାର ଜରୁରୀ ଆବଶ୍ୟକତା ରହିଛି ।
ଭାରତରେ ଶିଶୁ ପୋଷ୍ୟ ସନ୍ତାନ ଗ୍ରହଣ ପାଇଁ ଆଇନଗତ ପ୍ରକ୍ରିୟାକୁ ସରଳୀକରଣ କରିବା ପାଇଁ ‘ଦ ଟେମ୍ପଲ୍ ଅଫ୍ ହିଲିଂ’ର ଏକ ଜନସ୍ୱାର୍ଥ ମାମଲାର ଶୁଣାଣି କରି ସର୍ବୋଚ୍ଚ ଅଦାଲତ କହିଛନ୍ତି ଯେ ଦେଶରେ ବାର୍ଷିକ ମାତ୍ର ୪,୦୦୦ ପୋଷ୍ୟ ସନ୍ତାନ ଗ୍ରହଣ କରାଯାଏ ।