ନୂଆଦିଲ୍ଲୀ: ଆଜି ସଂସଦରେ ଏକ ବଡ଼ ଧରଣର ସୁରକ୍ଷା ଉଲ୍ଲଂଘନ କରି ଦୁଇଜଣ ବ୍ୟକ୍ତି ଦର୍ଶକ ଗ୍ୟାଲେରୀରୁ ସାଂସଦମାନେ ବସିଥିବା ଅଞ୍ଚଳକୁ ଡେଇଁ ଥିଲେ, କନିଷ୍ଟରରୁ ହଳଦିଆ ଗ୍ୟାସ୍ ଛାଡ଼ି ସ୍ଲୋଗାନ ଦେଇଥିଲେ। ଖୁବ୍ ଶୀଘ୍ର ସେମାନଙ୍କୁ ସାଂସଦମାନେ କାବୁ କରିଥିଲେ। ଏହି ଦୁଇଜଣ ହେଲେ ସାଗର ଶର୍ମା ଓ ମନୋରଞ୍ଜନ ଡି.।
ଲୋକସଭାରେ ବିଶୃଙ୍ଖଳା ସୃଷ୍ଟି ହୋଇଥିବାବେଳେ ସଂସଦ ପରିସର ବାହାରେ ଜଣେ ପୁରୁଷ ଓ ଜଣେ ମହିଳା କନିଷ୍ଟରରୁ ରଙ୍ଗୀନ ଗ୍ୟାସ୍ ସିଞ୍ଚନ କରିବା ସହ ସ୍ଲୋଗାନ ଦେଇଥିଲେ। ଦୁହେଁ ହେଲେ ଅନମୋଲ ଓ ନୀଲମ।
ଦୁଇ ଦଶନ୍ଧି ତଳେ ଆତଙ୍କବାଦୀ ଆକ୍ରମଣର ବାର୍ଷିକୀ ଅବସରରେ ସଂସଦରେ ସୁରକ୍ଷା ଉଲ୍ଲଂଘନ ପରେ ସମସ୍ତ ୪ ଅଭିଯୁକ୍ତଙ୍କୁ ଅଟକ ରଖାଯାଇଛି। ପ୍ରାଥମିକ ତଦନ୍ତରୁ ଜଣାପଡ଼ିଛି ଯେ, ଚାରିଜଣ ପରସ୍ପରକୁ ଜାଣିଥିଲେ। ସେମାନେ ସୋସିଆଲ ମିଡିଆରେ ପରସ୍ପର ସହ ଯୋଡ଼ି ହୋଇ ଏହି ଯୋଜନା ପ୍ରସ୍ତୁତ କରିଥିଲେ ବୋଲି ସୂତ୍ରରୁ ପ୍ରକାଶ।
ମିଳିଥିବା ସୂଚନା ଅନୁଯାୟୀ, ଏହି ଷଡ଼ଯନ୍ତ୍ରରେ ୬ ଜଣ ସମ୍ପୃକ୍ତ ଅଛନ୍ତି। ଦୁଇଜଣ ବ୍ୟକ୍ତି ପରିସର ଭିତରେ ବିଶୃଙ୍ଖଳା ସୃଷ୍ଟି କରିଥିବାବେଳେ ଅନ୍ୟ ଦୁଇଜଣ ବାହାରେ ବିଶୃଙ୍ଖଳା ସୃଷ୍ଟି କରିଥିଲେ। ଏବେ ଦୁଇଜଣ ସନ୍ଦିଗ୍ଧ ଫେରାର ଥିବାବେଳେ କର୍ତ୍ତୃପକ୍ଷ ଖୋଜାଖୋଜିକୁ ଜୋରଦାର କରିଛନ୍ତି।
ସୂତ୍ରରୁ ପ୍ରକାଶ ଯେ, ଦିଲ୍ଲୀ ବାହାରୁ ଆସିଥିବା ସମସ୍ତ ୫ ଜଣ ବ୍ୟକ୍ତି ଗୁରୁଗ୍ରାମରେ ଲଳିତ ଝା ନାମକ ଜଣେ ବ୍ୟକ୍ତିଙ୍କ ବାସଭବନରେ ଏକାଠି ରହିଥିଲେ। ଏଥିରୁ ୫ଜଣଙ୍କ ପରିଚୟ ମିଳିଥିବାବେଳେ ଷଷ୍ଠ ଜଣଙ୍କ ପରିଚୟ ମିଳିପାରିନାହିଁ। ଏଜେନ୍ସିର ଆଭ୍ୟନ୍ତରୀଣ ସୂତ୍ରରୁ ମିଳିଥିବା ସୂଚନା ଅନୁଯାୟୀ, ପୂରା ଅପରେସନକୁ ସୁଚିନ୍ତିତଭାବେ ଯୋଜନା କରାଯାଇଥିଲା।
ଅନୁପ୍ରବେଶକାରୀଙ୍କ ବିଷୟରେ ଆମେ କ’ଣ ଜାଣିଛୁ
ଶଙ୍କରଲାଲ ଶର୍ମାଙ୍କ ପୁଅ ସାଗର ଶର୍ମା ମଇସୁରୁ ଲୋକସଭା ସଦସ୍ୟ ପ୍ରତାପ ସିହ୍ନାଙ୍କ ଅତିଥିଭାବେ ଦର୍ଶକ ଗ୍ୟାଲେରୀକୁ ଆସିଥିଲେ।
୩୫ ବର୍ଷୀୟ ମନୋରଂଜନ ଡି କର୍ଣ୍ଣାଟକର ମହୀଶୂରର ବାସିନ୍ଦା। ସେ ବେଙ୍ଗାଲୁରୁର ବିବେକାନନ୍ଦ ବିଶ୍ୱବିଦ୍ୟାଳୟରୁ କମ୍ପ୍ୟୁଟର ସାଇନ୍ସରେ ସ୍ନାତକ ଡିଗ୍ରୀ ହାସଲ କରିଛନ୍ତି।
ସାଗର ଶର୍ମା ଓ ମନୋରଞ୍ଜନ ଡି ପବ୍ଲିକ ଗ୍ୟାଲେରୀରୁ ଚେମ୍ବରରୁ ଡେଇଁ ପଡ଼ିଥିଲେ।
ଅନୁପ୍ରବେଶକାରୀମାନେ ଶୀଘ୍ର ଧରାପଡ଼ିଥିଲେ:
ସଂସଦ ବାହାରେ ବିକ୍ଷୋଭ ପ୍ରଦର୍ଶନ କରୁଥିବାବେଳେ ଧରାପଡ଼ିଥିବା ନୀଲମ ହରିୟାଣାର ହିସାରରେ ଏକ ପିଜିରେ ରହୁଛନ୍ତି। ସେ ହରିୟାଣା ସିଭିଲ୍ ସର୍ଭିସ୍ ପରୀକ୍ଷା ପାଇଁ ପ୍ରସ୍ତୁତି କରୁଥିଲେ। ଅନ୍ୟପକ୍ଷରେ ଅନମୋଲ ମହାରାଷ୍ଟ୍ରର ଲାଟୁର ଜିଲ୍ଲାର ବାସିନ୍ଦା।
ଦିଲ୍ଲୀ ପୋଲିସ କହିଛି ଯେ, ନୀଲମ କିମ୍ବା ଅନମୋଲଙ୍କ ପାଖରେ ମୋବାଇଲ ଫୋନ ନ ଥିଲା। ସେମାନଙ୍କ ପାଖରେ କୌଣସି ବ୍ୟାଗ୍ କିମ୍ବା କୌଣସି ପରିଚୟ ପତ୍ର ନ ଥିଲା। ସେମାନେ ନିଜେ ସଂସଦରେ ପହଞ୍ଚିଥିବା ଦାବି କରିଛନ୍ତି ଏବଂ କୌଣସି ସଂଗଠନ ସହ ମିଶିଥିବା ମନା କରିଦେଇଛନ୍ତି। ପଚରାଉଚରା ପାଇଁ ପୁଲିସ ଏକ ସ୍ୱତନ୍ତ୍ର ଟିମ୍ ଗଠନ କରୁଛି ବୋଲି ଦିଲ୍ଲୀ ପୁଲିସ କହିଛି।