ଭୁବନେଶ୍ବର: ଖୁବ ଶିଘ୍ର ଭୁବନେଶ୍ବରରେ ନିର୍ମାଣ ହେବ ଏକ ସୌନ୍ଦର୍ଯ୍ୟମୟ ଅଟ୍ଟାଳିକା ଜନାଶ୍ରୟ ଭବନ। ଏଥିପାଇଁ ରାଜଧାନୀର ଜନପଥ ରୋଡରେ ଜମି ଚିହ୍ନଟ ହୋଇଛି। ଏଥିରେ ୩.୨ ଏକର ବା ୯୪୯୪୯ ବର୍ଗ ମିଟର ପରିମିତ ସ୍ଥାନରେ ଏହି ଆଧୁନିକ ଅଟ୍ଟାଳିକ ନିର୍ମାଣ ହେବ। ଏଥିପାଇଁ ପୂର୍ତ୍ତମନ୍ତ୍ରୀ ଶ୍ରୀ ପୃଥ୍ବୀରାଜ ହରିଚନ୍ଦନ କ୍ଷେତ୍ର ପରିଦର୍ଶନ କରିବା ସହିତ ଏହାର ଲେଆଉଟ ତଦାରଖ କରିସାରିଛନ୍ତି।
ପୂର୍ତ୍ତ ବିଭାଗ ଅନୁସାରେ ଏହି ଅଟ୍ଟାଳିକା ୧୯ ମହଲା ବିଶିଷ୍ଠ ହେବ ଏବଂ ତିନିଟି ବେସମେଣ୍ଟ ରହିବ। ଏଥିରେ ରହିବା ପାଇଁ ମୋଟ ୧୯୮୪ଟି ଶଯ୍ୟା ବା ବେଡ ରହିବ। ଏଥିରେ ୪୪୮ ଟି ତିନି ଶଯ୍ୟା ବିଶିଷ୍ଠ କୋଠରୀ ରହୁଥିବା ବେଳେ ୩୨୦ଟି ଦୁଇ ଶଯ୍ୟା ବିଶିଷ୍ଠ କୋଠରୀ ରହିବ। ତଳେ ମିନି ବସ ଷ୍ଟାଣ୍ଡ ସହିତ ସପିଂ ମଲ, ପାଠାଗାର, ଭୋଜନାଳୟ ଏବଂ ୬୮୭ ଟି ଗାଡି ରହିବା ପାଇଁ ପାର୍କିଂ ବ୍ୟବସ୍ଥା କରାଯିବ। ସେଠାରେ ଇଭି ଚାର୍ଜିଂ ବ୍ୟବସ୍ଥା ମଧ୍ୟ କରାଯିବ। ସେହିପରି ଛାତ ଉପରେ ସୋଲାର ବା ସୌରଶକ୍ତି, ବର୍ଷା ଜଣ ସଂରକ୍ଷଣ ପରି ବ୍ୟବସ୍ଥା ମଧ୍ୟ କରାଯିବ। ଏଥିପାଇଁ ବ୍ୟୟ ଅଟକଳ ୫୫୩ କୋଟି ଟଙ୍କା ରଖାଯାଇଛି।
ତେବେ ପ୍ରଶ୍ନ ଉଠୁଛି ଯେ, ଏ ସୁନ୍ଦର ଅତ୍ୟାଧୁନିକ ଅଟ୍ଟାଳିକଟି କଣ ହେବ ଏବଂ କିଏ ରହିବ। ସୂଚନା ଅନୁସାରେ ବିଭିନ୍ନ ଜିଲ୍ଲାରୁ ଭୁବନେଶ୍ବରକୁ କାମ ପାଇଁ ଆସୁଥିବା ଜନସାଧାରଣ ସୁଲଭ ମୂଲ୍ୟରେ ରହିବା ପାଇଁ ବ୍ୟବସ୍ଥା କରାଯିବ। ଏଥିରେ ତିରିଶି ଜିଲ୍ଲା ଅନୁସାରେ ଭିନ୍ନ ଭିନ୍ନ ତିରିଶିଟି ବ୍ଲକରେ ଭାଗ କରାଯିବ। ଫଳରେ ଯେଉଁ ଜିଲ୍ଲାରୁ ଯିଏ ଆସିବ ସେ ସେହି ଜିଲ୍ଲା ବ୍ଲକରେ ଅବସ୍ଥାନ କରିବ। ଏହା ବିଜେପି ସରକାରଙ୍କ ଏକ ଅଭିନବ ବ୍ୟବସ୍ଥା।