ନୂଆଦିଲ୍ଲୀ: ୨୦୨୪ ଲୋକସଭା ନିର୍ବାଚନ ପାଇଁ ପ୍ରସ୍ତୁତିକୁ ତ୍ୱରାନ୍ୱିତ କରିବା ଉଦ୍ଦେଶ୍ୟରେ କଂଗ୍ରେସର ସର୍ବୋଚ୍ଚ ନିଷ୍ପତ୍ତି ଗ୍ରହଣକାରୀ ସଂସ୍ଥା କଂଗ୍ରେସ କାର୍ଯ୍ୟକାରିଣୀ କମିଟି (ସିଡବ୍ଲ୍ୟୁସି) ଡିସେମ୍ବର ୨୧ରେ ଏକ ବୈଠକ ଡାକିଛି।
ଇଣ୍ଡି ମେଣ୍ଟ ବୈଠକର ଦୁଇଦିନ ପରେ କାର୍ଯ୍ୟକାରିଣୀ ବୈଠକ ଡକାଯିବା ନିଷ୍ପତ୍ତି ସ୍ପଷ୍ଟ ଯେ କଂଗ୍ରେସ ନେତୃତ୍ୱ ୨୦୨୪ରେ ଆଗାମୀ ଲୋକସଭା ନିର୍ବାଚନରେ ଆସନ ବଣ୍ଟନଠାରୁ ଆରମ୍ଭ କରି ସମସ୍ତ ପ୍ରସଙ୍ଗରେ ଦଳରେ ବ୍ୟାପକ ସହମତି ପାଇଁ ଭିତ୍ତିଭୂମି ପ୍ରସ୍ତୁତ କରିବାକୁ ଚାହୁଁଛି।
ଲୋକସଭା ନିର୍ବାଚନ ପାଇଁ ପ୍ରସ୍ତୁତ ହେଉଛି କଂଗ୍ରେସ
ଲୋକସଭା ନିର୍ବାଚନରେ ଦଳର ରାଜନୈତିକ ଆଶାକୁ ବଢ଼ାଇବା ପାଇଁ କଂଗ୍ରେସର ପୂର୍ବତନ ଅଧ୍ୟକ୍ଷ ରାହୁଲ ଗାନ୍ଧିଙ୍କ ଭାରତ ଯୋଡ଼ୋ ଯାତ୍ରାର ଦ୍ୱିତୀୟ ପର୍ଯ୍ୟାୟ ଆରମ୍ଭ ନେଇ ମଧ୍ୟ ବୈଠକରେ ନିଷ୍ପତ୍ତି ନିଆଯାଇପାରେ। ୫ଟି ରାଜ୍ୟ ନିର୍ବାଚନ ଫଳାଫଳ ଆସିବା ପରେ କଂଗ୍ରେସ କାର୍ଯ୍ୟକାରିଣୀ କମିଟିର ଏହା ପ୍ରଥମ ବୈଠକ ହେବ ଏବଂ ସ୍ୱାଭାବିକଭାବେ ଦଳର ପ୍ରଦର୍ଶନର ସମୀକ୍ଷା କରାଯିବ।
ଡିସେମ୍ବର ୨୧ରେ ବସିବ ସିଡବ୍ଲ୍ୟୁସି ବୈଠକ
ଦଳୀୟ ସୂତ୍ରରୁ ମିଳିଥିବା ସୂଚନା ଅନୁଯାୟୀ, ଡିସେମ୍ବର ୨୧ରେ ସିଡବ୍ଲ୍ୟୁସି ବୈଠକ ଡକାଯିବ ଏବଂ ଏଥିରେ କେବଳ ତେଲେଙ୍ଗାନାରେ ବିଜୟ ନୁହେଁ, ହିନ୍ଦୀ ବେଲ୍ଟର ୩ଟି ରାଜ୍ୟର ପରାଜୟ ଉପରେ ନିଶ୍ଚିତଭାବେ ଆଲୋଚନା ହେବ। କିନ୍ତୁ ବର୍ତ୍ତମାନ ମୁଖ୍ୟ ପ୍ରସଙ୍ଗ ହେଉଛି ୨୦୨୪ ନିର୍ବାଚନରେ ବିଜେପିକୁ ଚ୍ୟାଲେଞ୍ଜ କରିବା ଏବଂ ସେଥିପାଇଁ କଂଗ୍ରେସ ଅଧ୍ୟକ୍ଷ ମଲ୍ଲିକାର୍ଜୁନ ଖଡଗେଙ୍କ ପୂରା ଫୋକସ ଲୋକସଭା ନିର୍ବାଚନ ପାଇଁ ପ୍ରସ୍ତୁତି ସହ ଜଡିତ ପ୍ରସଙ୍ଗ ଉପରେ ରହିବ। ଯେହେତୁ ଇଣ୍ଡି ମେଣ୍ଟର ଶୀର୍ଷ ନେତାଙ୍କ ବୈଠକର ମାତ୍ର ଦୁଇଦିନ ପରେ ଏହି ବୈଠକ ଅନୁଷ୍ଠିତ ହେଉଛି, ତେଣୁ ଆସନ ବଣ୍ଟନ ପ୍ରସଙ୍ଗରେ ବିଶେଷଭାବେ ଆଲୋଚନା ହେବା ସ୍ୱାଭାବିକ।
ଭାରତ ଯୋଡ଼ୋ ଯାତ୍ରା ଏକ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିଥିଲା
ଖଡଗେ ସଭାପତି ହେବାର ପ୍ରାୟ ଦେଢ଼ବର୍ଷ ପରେ ମଧ୍ୟ ଦଳର ଶୀର୍ଷ ସାଂଗଠନିକ ଢାଞ୍ଚାର ପୁନର୍ଗଠନ ହୋଇନାହିଁ ଏବଂ ଏହି ପରିପ୍ରେକ୍ଷୀରେ କାର୍ଯ୍ୟକାରିଣୀ ବୈଠକରେ ଲୋକସଭା ନିର୍ବାଚନ ପାଇଁ ଅଲଗା ଅଲଗା କିଛି କମିଟି ଗଠନ ଉପରେ ମଧ୍ୟ ଆଲୋଚନା ହେବ।
ନିର୍ବାଚନୀ ପ୍ରସଙ୍ଗକୁ ପ୍ରାଥମିକତା ଦେବାଠାରୁ ଆରମ୍ଭ କରି କଂଗ୍ରେସ ଓ ବିରୋଧୀଙ୍କ ମଧ୍ୟରେ ସକାରାତ୍ମକ ବିକଳ୍ପ ବିବରଣୀ ଦେବା ପର୍ଯ୍ୟନ୍ତ ଆଲୋଚନା ହେବାର ସମ୍ଭାବନା ରହିଛି।
ନିକଟରେ ୩ଟି ହିନ୍ଦୀ ରାଜ୍ୟରେ ଦଳ ନିର୍ବାଚନୀ ପରାଜୟ ବରଣ କରିଥିବାବେଳେ କନ୍ୟାକୁମାରୀରୁ କଶ୍ମୀର ପର୍ଯ୍ୟନ୍ତ ରାହୁଲ ଗାନ୍ଧୀଙ୍କ ପାଞ୍ଚମାସିଆ ଭାରତ ଯୋଡ଼ୋ ଯାତ୍ରା କଂଗ୍ରେସ ରାଜନୀତିକୁ ଟ୍ରାକକୁ ଫେରାଇ ଆଣିବାରେ ପ୍ରମୁଖ ଭୂମିକା ଗ୍ରହଣ କରିଛି ବୋଲି କଂଗ୍ରେସ ବିଶ୍ୱାସ କରୁଛି।
ଭାରତ ଯୋଡ଼ୋ ଯାତ୍ରାର ଦ୍ୱିତୀୟ ପର୍ଯ୍ୟାୟ ଅନୁମୋଦନ ମିଳିପାରେ
ଏଭଳି ସ୍ଥିତିରେ ଲୋକସଭା ନିର୍ବାଚନ ପୂର୍ବରୁ ସୁଦୂର ପୂର୍ବ ଅରୁଣାଚଳ ପ୍ରଦେଶରୁ ପଶ୍ଚିମରେ ଗୁଜରାଟର କଚ୍ଛ ପର୍ଯ୍ୟନ୍ତ ଭାରତ ଯୋଡ଼ୋ ଯାତ୍ରାର ଦ୍ୱିତୀୟ ପର୍ଯ୍ୟାୟ ଆରମ୍ଭ କରିବାକୁ କଂଗ୍ରେସରେ ଦୀର୍ଘ ସମୟ ଧରି ବିଚାରବିମର୍ଶ ଚାଲିଛି । ସୂତ୍ରରୁ ପ୍ରକାଶ ଯେ ବେରୋଜଗାରୀ ଏବଂ ମୁଦ୍ରାସ୍ଫୀତି ପ୍ରସଙ୍ଗକୁ ନିର୍ବାଚନୀ ଏଜେଣ୍ଡାରେ ପରିଣତ କରିବା ଉଦ୍ଦେଶ୍ୟରେ ରାହୁଲ ଗାନ୍ଧୀଙ୍କ ଦ୍ୱିତୀୟ ପର୍ଯ୍ୟାୟ ଭାରତ ଯୋଡ଼ୋ ଯାତ୍ରାକୁ କାର୍ଯ୍ୟକାରୀ କମିଟି ଅନୁମୋଦନ କରିପାରେ । ଯେହେତୁ ଲୋକସଭା ନିର୍ବାଚନ ପାଇଁ ଅଧିକ ସମୟ ନାହିଁ, ତେଣୁ ରାହୁଲଙ୍କ ଦ୍ୱିତୀୟ ପର୍ଯ୍ୟାୟ ଯାତ୍ରା ହାଇବ୍ରିଡ୍ ହୋଇପାରେ ଯେଉଁଥିରେ ସେ କେଉଁଠି ପାଦରେ କିମ୍ବା ଗାଡ଼ିରେ ଯାତ୍ରା କରିପାରିବେ ।
ଏହି ବୈଠକରେ ୨୦୨୪ ନିର୍ବାଚନ ପୂର୍ବରୁ ବେରୋଜଗାରୀ ଓ ମୁଦ୍ରାସ୍ଫୀତିକୁ ମୁଖ୍ୟ ପ୍ରସଙ୍ଗ ଭାବେ ନେଇ କଂଗ୍ରେସ ନେତା ରାହୁଲ ଗାନ୍ଧି ଯେଉଁ ଗସ୍ତ କରିପାରନ୍ତି ସେ ନେଇ ମଧ୍ୟ ଆଲୋଚନା ହେବାର ସମ୍ଭାବନା ରହିଛି। ଦଳ ପାଦଯାତ୍ରା ସମେତ ପୂର୍ବ-ପଶ୍ଚିମ ଯାତ୍ରାକୁ ହାଇବ୍ରିଡ୍ ମୋଡ଼ରେ ବିଚାର କରୁଛି ଏବଂ ଖୁବଶୀଘ୍ର ଚୂଡ଼ାନ୍ତ ନିଷ୍ପତ୍ତି ନିଆଯିବ ବୋଲି ସେ କହିଛନ୍ତି ।