ନୂଆଦିଲ୍ଳୀ: କେନ୍ଦ୍ର ସ୍ୱାସ୍ଥ୍ୟ ଓ ପରିବାର କଲ୍ୟାଣ ମନ୍ତ୍ରୀ ଡକ୍ଟର ମନସୁଖ ମାଣ୍ଡଭିୟ ଆସାମରେ ଜାତୀୟ ବ୍ୟାଧି ନିୟନ୍ତ୍ରଣ କେନ୍ଦ୍ର (ଏନ୍ସିଡିସି)ର ଆଞ୍ଚଳିକ କେନ୍ଦ୍ରର ଭିତ୍ତିପ୍ରସ୍ତର ସ୍ଥାପନ କରିଛନ୍ତି। ଏହାଛଡା ତାଙ୍କ ଦ୍ୱାରା ଓଡିଶା, ତାମିଲନାଡୁ, ହରିୟାଣା, ପଶ୍ଚିମବଙ୍ଗ, କର୍ଣ୍ଣାଟକ ଓ ମିଜୋରାମରେ ଏନ୍ସିଡିସି ରାଜ୍ୟ ଶାଖା ତଥା ହିମାଚଳ ପ୍ରଦେଶ ଓ ଝାଡଖଣ୍ଡରେ ବିଏସ୍ଏଲ୍-୩ର ଦୁଇଟି ପରୀକ୍ଷାଗାରର ଶିଳାନ୍ୟାସ କରାଯାଇଛି। ସ୍ୱାସ୍ଥ୍ୟମନ୍ତ୍ରୀ ଆଭାସୀ ବ୍ୟବସ୍ଥାରେ ଏହି ସବୁ କାର୍ଯ୍ୟ ସମ୍ପାଦନ କରିଛନ୍ତି। ନୂଆଦିଲ୍ଲୀର ଏନ୍ସିଡିସି ସଦର କାର୍ଯ୍ୟାଳୟରୁ ମନ୍ତ୍ରୀଙ୍କ ଦ୍ୱାରା ଏସବୁ ଆଭାସୀ ବ୍ୟବସ୍ଥାରେ କରାଯାଇଛି। ସେ ମଧ୍ୟ ଆଜି ମଧ୍ୟପ୍ରଦେଶର ଭୋପାଳ ସ୍ଥିତି ଏନ୍ସିଡିସିର ଅସ୍ଥାୟୀ କେନ୍ଦ୍ରକୁ ଉଦ୍ଘାଟନ କରିଛନ୍ତି। ଏହି ନୂଆ ଏନ୍ସିଡିସି ଶାଖା ଏବଂ ବିଏସ୍ଏଲ-୩ ଲ୍ୟାବ ସାମଗ୍ରିକ ସ୍ୱାସ୍ଥ୍ୟ ଆଭିମୁଖ୍ୟରେ ଦେଶର ମହାମାରୀ ମୁକାବିଲା ଓ ବ୍ୟାଧି ସତର୍କତା ସାମର୍ଥ୍ୟକୁ ସୁଦୃଢ କରିବ। ମନ୍ତ୍ରୀ ଡକ୍ଟର ମାଣ୍ଡଭିୟ ମଧ୍ୟ ନୂଆଦିଲ୍ଲୀ ଏନ୍ଡିସିର ଉନ୍ନୀତ ଭିତ୍ତିଭୂମି କାର୍ଯ୍ୟକ୍ରମରେ ବିକଶିତ ହୋଇଥିବା ଅଡିଟରିୟମ ଓ ଲାଇବ୍ରେରୀ ବ୍ଲକକୁ ଉଦ୍ଘାଟନ କରିଥିଲେ। ଏହି ଅବସରରେ ମନ୍ତ୍ରୀଙ୍କ ଦ୍ୱାରା କେତେକ ବୈଷୟିକ ନଥିପତ୍ର ମଧ୍ୟ ଉନ୍ମୋଚିତ ହୋଇଥିଲା।
ଏହି କାର୍ଯ୍ୟକ୍ରମରେ କେନ୍ଦ୍ର ସ୍ୱାସ୍ଥ୍ୟ ଓ ପରିବାର କଲ୍ୟାଣ ରାଷ୍ଟ୍ରମନ୍ତ୍ରୀ ପ୍ରଫେସର ଏସ୍.ପି. ସିଂହ ବାଘେଲ, ଆସାମର ସ୍ୱାସ୍ଥ୍ୟମନ୍ତ୍ରୀ କେଶବ ମହାନ୍ତ, ହରିୟାଣାର ସ୍ୱାସ୍ଥ୍ୟମନ୍ତ୍ରୀ ଅନିଲ ବିଜ୍, ଛ’ଟି ରାଜ୍ୟର ସାଂସଦ ଅପରାଜିତା ଷଡଙ୍ଗୀ (ଓଡିଶା), କାତ୍ତିକେୟ ଶର୍ମା (ହରିୟାଣା), ଡି.ଭି. ସଦାନନ୍ଦ ଗୌଡା (କର୍ଣ୍ଣାଟକ), ସୁରେଶ କୁମାର କାଶ୍ୟପ (ହିମାଚଳ ପ୍ରଦେଶ), କୁଇନ୍ ଓଜା(ଆସାମ) ଓ ନୀଶିକାନ୍ତ ଦୁବେ (ଝାଡଖଣ୍ଡ) ଉପସ୍ଥିତ ଥିଲେ। ଆସାମର ବିଧାନସଭା ସଦସ୍ୟ ହେମାଙ୍ଗ ଠାକୁରିଆ ମଧ୍ୟ ଏହି କାର୍ଯ୍ୟକ୍ରମରେ ସାମିଲ ହୋଇଥିଲେ।
କେନ୍ଦ୍ର ସ୍ୱାସ୍ଥ୍ୟମନ୍ତ୍ରୀ ଏହି ଅବସରରେ କହିଥିଲେ ଯେ ଏନ୍ସିଡିସିର ଏହି ଆଞ୍ଚଳିକ ଶାଖା ସିସିଏଚ୍ଏଫ୍, କେଏଫ୍ଡି, ସ୍କ୍ରବ ଟାଇଫସ୍ ଭଳି ସମ୍ପୃକ୍ତ ଅଞ୍ଚଳରେ ଦେଖାଯାଉଥିବା ବିଭିନ୍ନ ସଂକ୍ରାମକ ରୋଗର ସଫଳ ମୁକାବିଲା କରିପାରିବ। ଆହୁରି ମଧ୍ୟ ଏନ୍ସିଡିସିର ପ୍ରାଦେଶିକ ଶାଖା ଓ ବିଏସ୍ଏଲ-୩ ପରୀକ୍ଷାଗାର ଦ୍ୱୟ କାର୍ଯ୍ୟକ୍ଷମ ହେଲେ ଅତି ସଂକ୍ରାମକ ଓ ମହାମାରୀ ଭଳି ରୋଗର ସଂକ୍ରମଣକୁ ରୋକିବା ଓ ଏହାର ସଫଳ ମୁକାବିଲା କରିବାରେ ବିଶେଷ ସହାୟକ ହେବେ। ସେ ଆହୁରି କହିଥିଲେ ଯେ ଆଜି ଯେଉଁ ସ୍ୱାସ୍ଥ୍ୟ ଭିତ୍ତିଭୂମି ଗୁଡିକର ଶିଳାନ୍ୟାସ ଓ ଉଦ୍ଘାଟନ ହେଲା ତାହା ଭବିଷ୍ୟତରେ ଆଞ୍ଚଳିକ, ପ୍ରାଦେଶିକ, ଜିଲ୍ଲା ଓ ବ୍ଲକ ସ୍ତରରେ ସ୍ୱାସ୍ଥ୍ୟସେବା ଭିତ୍ତିଭୂମିକୁ ଅଧିକ ସୁଦୃଢ କରିବା ସହ ବ୍ୟାଧି ମୁକାବିଲାରେ ବିଶେଷ ସହାୟକ ହେବ। ସହଜ ଓ ସୁବିଧାରେ ଏହି କେନ୍ଦ୍ରରେ ରୋଗର ପରୀକ୍ଷା ଓ ଚିହ୍ନଟ କରାଯାଇପାରିବ। ସର୍ବୋପରି ଏହା ଦ୍ୱାରା ପ୍ରାଦେଶିକ ଓ ଆଞ୍ଚଳିକ ସ୍ତରରେ ସ୍ୱାସ୍ଥ୍ୟ ଭିତ୍ତିଭୂମିର ଦକ୍ଷତା ବଢିବ।
ଡକ୍ଟର ମାଣ୍ଡବୀୟ ଆହୁରି କହିଥିଲେ ଯେ ମହାମାରୀ ମୁକାବିଲା ପ୍ରସ୍ତୁତି ଓ ବ୍ୟାଧି ପ୍ରତି ସତର୍କତା ସ୍ୱାସ୍ଥ୍ୟସେବାର ଦୁଇଟି ଗୁରୁତ୍ୱପୂର୍ଣ୍ଣ ଦିଗ। ଏହା ସବୁ ଲୋକଙ୍କ ପାଖରେ ବିଶେଷକରି ସମାଜର ଦୁର୍ବଳ ଓ ବଂଚିତ ବର୍ଗଙ୍କ ପାଖରେ ପହଂଚିବା ଆବଶ୍ୟକ। ଏହା ଦ୍ୱାରା ସେମାନେ ମହାମାରୀ ଓ ସଂକ୍ରାମକ ବ୍ୟାଧିରୁ ଅଧିକ ସୁରକ୍ଷିତ ହୋଇପାରିବେ।
ସେ କହିଛନ୍ତି ଯେ ସଂକ୍ରାମକ ବ୍ୟଧି ସମ୍ପର୍କରେ ଲୋକଙ୍କୁ ସତର୍କ ଓ ସଚେତନ କରିବା ସହିତ ଏହାର ଉପଯୁକ୍ତ ମୁକାବିଲା ପାଇଁ କେନ୍ଦ୍ର ସରକାର ଅଙ୍ଗୀକାରବଦ୍ଧ। ଜାତୀୟ ବ୍ୟାଧି ନିୟନ୍ତ୍ରଣ କେନ୍ଦ୍ର ଏନ୍ସିଡିସି ମାଧ୍ୟମରେ ସରକାର ଏହି କାମକୁ ସୁଦୃଢ କରୁଛନ୍ତି। କୋଭିଡ ନିୟନ୍ତ୍ରଣ ଓ ମୁକାବିଲା କ୍ଷେତ୍ରରେ ସେ ଏନ୍ସିଡିସିର କାର୍ଯ୍ୟକୁ ପ୍ରଶଂସା କରିବା ସହିତ ଏହି ମହାମାରୀର ପରିଚାଳନାରେ ଭାରତର ପ୍ରଦର୍ଶନ ବିଶ୍ୱର ଅନେକ ରାଷ୍ଟ୍ରଙ୍କ ତୁଳନାରେ ଯଥେଷ୍ଟ ଭଲ ବୋଲି ସେ କହିଥିଲେ। ସେ ମଧ୍ୟ ବ୍ୟାଧି ପରିିଚାଳନା ଓ ଅନ୍ୟାନ୍ୟ ସଂକ୍ରାମକ ବ୍ୟାଧିର ମୁକାବିଲା କ୍ଷେତ୍ରରେ ରାଜ୍ୟ ସରକାରମାନଙ୍କ ଭୂମିକାର ପ୍ରଶଂସା କରିଥିଲେ।
ସ୍ୱାସ୍ଥ୍ୟମନ୍ତ୍ରୀ ଆହୁରି କହିଥିଲେ ଯେ ଜନସ୍ୱାସ୍ଥ୍ୟ ସତର୍କତା ଓ ପ୍ରତିବିଧାନ କ୍ଷେତ୍ରରେ ଏନ୍ସିଡିସି ନୋଡାଲ ଏଜେନ୍ସି ଭାବେ କାର୍ଯ୍ୟ କରୁଛି। ବ୍ୟାକ୍ଟେରିଆ, ଭାଇରସ୍, ଜୁନୋଟିକ୍ ସଂକ୍ରମଣ ଓ ପାରାସିଟିକ୍ ରୋଗର ନିଦାନ, ପରୀକ୍ଷାନିରୀକ୍ଷା, ପ୍ରତିକାର ଓ ସତର୍କତା ଆଦି କ୍ଷେତ୍ରରେ ଏହା ରାଜ୍ୟମାନଙ୍କୁ ଆବଶ୍ୟକ ସମର୍ଥନ, ସହାୟତା ଓ ପରାମର୍ଶ ଯୋଗାଇ ଦେଉଛି। ବ୍ୟାଧି ବିରୋଧରେ ଲଢେଇ କରିବାକୁ ସ୍ୱାସ୍ଥ୍ୟସେବା ପେସାଦାର ଓ ଚିକିତ୍ସକମାନେ ସଦା ପ୍ରସ୍ତୁତ ହୋଇ ରହିବାକୁ ସେ ପରାମର୍ଶ ଦେବା ସହ ସେମାନଙ୍କ ବିନା ସ୍ୱାସ୍ଥ୍ୟସେବା ସମ୍ଭବ ନୁହେଁ ବୋଲି କହିଥିଲେ।
ଗତ ମନ୍ କି ବାତ୍ କାର୍ଯ୍ୟକ୍ରମରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଯାହା କହିଥିଲେ ତଦନୁସାରେ ଏକ ସମୃଦ୍ଧ ରାଷ୍ଟ୍ର ଗଠନ ପାଇଁ ପ୍ରଥମେ ଏକ ସୁସ୍ଥ ଦେଶ ଗଢି ତୋଳିବାକୁ ସମସ୍ତେ ସହଯୋଗ କରିବାକୁ ସେ ପରାମର୍ଶ ଦେଇଥିଲେ। ଆଗାମୀ ଦିନରେ ଦେଶର ୩୦ ଏନ୍ସିଡିସି ଶାଖା, ୫ଟି ଆଞ୍ଚଳିକ ଏନ୍ସିଡିସି ରାଜ୍ୟ ଶାଖା ଓ ୧୦ଟି ବିଏସ୍ଏଲ-୩ ପରୀକ୍ଷାଗାର ପ୍ରତିଷ୍ଠା କରିବା ଯୋଜନା ଅଛି। ଏହା ଦ୍ୱାରା ସଂକ୍ରାମକ ରୋଗର ମୁକାବିଲା ସହଜ ହେବ ବୋଲି ସେ କହିଥିଲେ।
ଏହି କାର୍ଯ୍ୟକ୍ରମରେ କେନ୍ଦ୍ର ସ୍ୱାସ୍ଥ୍ୟ ଗବେଷଣା ସଚିବ ଓ ଆଇସିଏମ୍ ଆରଆଇଡିଜି ଡକ୍ଟର ରାଜୀବ ବେହେଲ, ଏନ୍ସିଡିସିର ନିର୍ଦ୍ଦେଶକ ଡକ୍ଟର ଅତୁଲ ଗୋଏଲ, ଜାତୀୟ ସ୍ୱାସ୍ଥ୍ୟ ମିଶନର ନିର୍ଦ୍ଦେଶକ ଶ୍ରୀମତୀ ଏଲ୍.ଏସ. ଗଙ୍ଗସାନ ଏବଂ ସ୍ୱାସ୍ଥ୍ୟ ମନ୍ତ୍ରଣାଳୟର ଅନ୍ୟାନ୍ୟ ବରିଷ୍ଠ ଅଧିକାରୀମାନେ ଉପସ୍ଥିତ ଥିଲେ।