ନୂଆଦିଲ୍ଲୀ: ଆଦାନୀ ଗ୍ରୁପ୍ ଚେୟାରମ୍ୟାନ୍ ଗୌତମ ଆଦାନୀ ଭାଇବ୍ରେଣ୍ଟ ଗୁଜୁରାଟ ସମ୍ମିଳନୀରେ ଏକ ବଡ଼ ଘୋଷଣା କରିଛନ୍ତି। ସେ କହିଛନ୍ତି ଯେ, ବିକଶିତ ଗୁଜୁରାଟରେ ଆଦାନୀ ଗ୍ରୁପ୍ ଏକ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରୁଛି। ଆସନ୍ତା ୫ ବର୍ଷରେ ଆମେ ଗୁଜୁରାଟରେ ୨ ଲକ୍ଷ କୋଟି ଟଙ୍କା ବିନିଯୋଗ କରିବୁ, ଯାହା ଗୁଜୁରାଟରେ ୧ ଲକ୍ଷରୁ ଅଧିକ ଲୋକଙ୍କୁ ନିଯୁକ୍ତି ଯୋଗାଇବ। ଏହା ସହିତ, ଆମେ କଚ୍ଛକୁ ସବୁଠୁ ବଡ ସବୁଜ ପାର୍କ ଦେବୁ।
ଏହି କାର୍ଯ୍ୟକ୍ରମକୁ ସମ୍ବୋଧିତ କରିବାବେଳେ ଗୌତମ ଆଦାନୀ ଆହୁରି କହିଛନ୍ତି ଯେ, ‘ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ କେବଳ ଭାରତର ଭବିଷ୍ୟତ ବିଷୟରେ ଚିନ୍ତା କରନ୍ତି ନାହିଁ, ବରଂ ଏହାକୁ ମଧ୍ୟ ଆକାର ଦିଅନ୍ତି। ଆପଣଙ୍କ ନେତୃତ୍ୱରେ ୨୦୪୭ ସୁଦ୍ଧା ଭାରତ ଏକ ସମ୍ପୂର୍ଣ୍ଣ ବିକଶିତ ରାଷ୍ଟ୍ର ହେବାର ପଥରେ ଅଛି। ଆପଣ ଏକ ପ୍ରମୁଖ ଶକ୍ତି ଭାବରେ ବିଶ୍ୱ ମାନଚିତ୍ରରେ ସଫଳତାର ସହ ଭାରତ ପ୍ରତିଷ୍ଠା କରିଛନ୍ତି ଏବଂ ଏହାକୁ ଆତ୍ମନିର୍ଭରଶୀଳ କରୁଛନ୍ତି।
ଗୌତମ ଆଦାନୀ କହିଛନ୍ତି ଯେ, ଆତ୍ମନିର୍ଭରଶୀଳ ଭାରତକୁ ଆଗକୁ ନେବାକୁ ଆଦାନୀ ଗୋଷ୍ଠୀ ପ୍ରତିବଦ୍ଧ। ସବୁଜ ଯୋଗାଣ ଶୃଙ୍ଖଳା ବିଷୟରେ ସେ କହିଛନ୍ତି ଯେ ଆମେ ଆତ୍ମନିର୍ଭରଶୀଳ ଭାରତ ପାଇଁ ସବୁଜ ଯୋଗାଣ ଶୃଙ୍ଖଳା ବିସ୍ତାର କରୁଛୁ। ଗତ ଶିଖର ସମ୍ମିଳନୀରେ ଆମେ ୫୫ ହଜାର କୋଟି ଟଙ୍କା ବିନିଯୋଗ କରିବାକୁ ପ୍ରତିଶ୍ରୁତି ଦେଇଥିଲୁ ଏବଂ ଏପର୍ଯ୍ୟନ୍ତ ୫୦ ହଜାର କୋଟିରୁ ଅଧିକ ବିନିଯୋଗ କରିଛୁ।
ଗୌତମ ଆଦାନୀ କହିଛନ୍ତି ଯେ, ଆମେ କଚ୍ଛରେ ୨୫ ବର୍ଗ କିଲୋମିଟର ଉପରେ ବ୍ୟାପିଥିବା ୩୦ ଗିଗାୱାଟ କ୍ଷମତା ବିଶିଷ୍ଟ ସବୁଜ ଶକ୍ତି ପାର୍କ ନିର୍ମାଣ କରୁଛୁ, ଯାହା ମହାକାଶରୁ ମଧ୍ୟ ଦୃଶ୍ୟମାନ ହେବ।
ପ୍ରକାଶ ଯେ, ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଆଜି ଭାଇବ୍ରେଣ୍ଟ ଗୁଜୁରାଟ ସମ୍ମିଳନୀର ଉଦଘାଟନ କରିଛନ୍ତି। ଗାନ୍ଧିନଗରର ମହାତ୍ମା ମନ୍ଦିରରେ ଏହି କାର୍ଯ୍ୟକ୍ରମ ଆୟୋଜିତ ହୋଇଛି। ଗୁଜୁରାଟକୁ ବ୍ୟବସାୟ ପାଇଁ ଏକ ପ୍ରମୁଖ ଗନ୍ତବ୍ୟସ୍ଥଳରେ ପରିଣତ କରିବାରେ ଏହି ଶିଖର ସମ୍ମିଳନୀରେ ଏକ ବଡ଼ ଅବଦାନ ରହିଛି ବୋଲି ବିବେଚନା କରାଯାଏ। ଏହି ଅବସରରେ ବହୁ କେନ୍ଦ୍ର ମନ୍ତ୍ରୀ ଏବଂ ବିଶ୍ୱର ବହୁ ମାନ୍ୟଗଣ୍ୟ ବ୍ୟକ୍ତି ଉପସ୍ଥିତ ଥିଲେ।