ପାଟନା: ବିହାରର ନୂତନ ଏନଡିଏ ସରକାରରେ ମନ୍ତ୍ରୀଙ୍କ ନାମ ଗଣମାଧ୍ୟମରେ ପ୍ରକାଶ ପାଇଛି। ମୋଟ ନଅ ନାମକୁ ଅନୁମୋଦନ କରାଯାଇଛି। ଏହି ମେଣ୍ଟରେ ନୀତୀଶ କୁମାର ମୁଖ୍ୟମନ୍ତ୍ରୀ ହେବେ। ବିଜେପି ପକ୍ଷରୁ ସମ୍ରାଟ ଚୌଧୁରୀ ଏବଂ ବିଜୟ କୁମାର ସିହ୍ନାଙ୍କୁ ଉପ-ମୁଖ୍ୟମନ୍ତ୍ରୀ କରାଯାଇଛି। ବିଜେପିର ଡକ୍ଟର ପ୍ରେମ କୁମାର, ଜେଡିୟୁରୁ ବିଜୟ କୁମାର ଚୌଧୁରୀ, ଶ୍ରବଣ କୁମାର, ବିଜେନ୍ଦ୍ର ଯାଦବ, ନିର୍ଦ୍ଦଳୀୟରୁ ସୁମିତ କୁମାର ସିଂ ଏବଂ ‘ହମ୍’ର ସାନ୍ତୋଷ କୁମାର ସୁମନଙ୍କ ନାମ ନୂତନ କ୍ୟାବିନେଟ ତାଲିକାରେ ସ୍ଥାନ ପାଇଛି।
ଏନଡିଏ ସରକାରରେ ଏହା ହେଉଛି ନୂଆ ସମୀକରଣ:
ବିହାର ରାଜନୀତି ପୁଣି ଥରେ ନୂଆ ମୋଡ଼ ନେଇଛି। ନୀତୀଶ କୁମାର ଏନଡିଏରେ ଯୋଗ ଦେଇଛନ୍ତି। ଏହା ସହିତ ବର୍ତ୍ତମାନ ସବୁକିଛି ସ୍ପଷ୍ଟ ଦେଖାଯାଉଛି। ଆଜି ସନ୍ଧ୍ୟାରେ ଶପଥ ଗ୍ରହଣ କରୁଥିବା ଏହି ନୂତନ ସରକାରରେ ମଧ୍ୟ କ୍ୟାବିନେଟ ଘୋଷଣା କରାଯାଇଛି। ଏହି ମନ୍ତ୍ରିମଣ୍ଡଳର ନୂତନ ସମୀକରଣରେ ନୀତୀଶଙ୍କ ବ୍ୟତୀତ ଜେଡିୟୁରେ ତିନିଜଣ ମନ୍ତ୍ରୀ ଏବଂ ବିଜେପି ତିନିଜଣ ମନ୍ତ୍ରୀ ପାଇଛନ୍ତି। ଏହା ବ୍ୟତୀତ ଏନଡିଏରେ ଅନ୍ତର୍ଭୁକ୍ତ ‘ହମ୍’ କୁ ମଧ୍ୟ ଗୋଟିଏ ସ୍ଥାନ ମିଳିଛି ଏବଂ ଏକମାତ୍ର ସ୍ୱାଧୀନ ବିଧାୟକ ସୁମିତ କୁମାର ସିଂଙ୍କୁ କ୍ୟାବିନେଟରେ ସ୍ଥାନ ଦିଆଯାଇଛି।
