ନୂଆଦିଲ୍ଲୀ: ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଗୁରୁବାର ଉପସ୍ଥାପିତ ବଜେଟକୁ “କେବଳ ଏକ ଅନ୍ତରୀଣ ବଜେଟ ନୁହେଁ ବରଂ ଏକ ସମାବେଶୀ ଏବଂ ଅଭିନବ ବଜେଟ” ବୋଲି କହି ପ୍ରଶଂସା କରିଛନ୍ତି । ଏହି ବଜେଟ୍ ନିରନ୍ତରତାର ସହ ଆତ୍ମବିଶ୍ୱାସ ବହନ କରୁଛି ବୋଲି ପ୍ରଧାନମନ୍ତ୍ରୀ ମୋଦୀ କହିଛନ୍ତି। ପ୍ରଧାନମନ୍ତ୍ରୀ ଆହୁରି ମଧ୍ୟ କହିଛନ୍ତି ଯେ ଏହି ବଜେଟ୍ ବିକଶିତ ଭାରତର ସମସ୍ତ ସ୍ତମ୍ଭ- ଯୁବକ, ଗରିବ, ମହିଳା ଏବଂ କୃଷକମାନଙ୍କୁ ସଶକ୍ତ କରିବ ।
ଅର୍ଥମନ୍ତ୍ରୀ ନିର୍ମଳା ସୀତାରମଣଙ୍କ ଦୂରଦୃଷ୍ଟିକୁ ପ୍ରଶଂସା କରି ପ୍ରଧାନମନ୍ତ୍ରୀ ମୋଦୀ କହିଛନ୍ତି, ନିର୍ମଳାଙ୍କ ବଜେଟ୍ ହେଉଛି ଦେଶର ଭବିଷ୍ୟତ ନିର୍ମାଣ ପାଇଁ ବଜେଟ୍। ଏହି ବଜେଟରେ ୨୦୪୭ ସୁଦ୍ଧା ବିକଶିତ ଭାରତର ଭିତ୍ତିଭୂମିକୁ ସୁଦୃଢ଼ କରିବାର ଗ୍ୟାରେଣ୍ଟି ଦିଆଯାଇଛି।
ଏହି ବଜେଟ୍ ଯୁବ ଭାରତର ଆକାଂକ୍ଷାର ପ୍ରତିଫଳନ ବୋଲି ପ୍ରଧାନମନ୍ତ୍ରୀ ମୋଦୀ କହିଛନ୍ତି। ବଜେଟରେ ନିଆଯାଇଥିବା ଦୁଇଟି ଗୁରୁତ୍ୱପୂର୍ଣ୍ଣ ନିଷ୍ପତ୍ତି ଉପରେ ଆଲୋକପାତ କରି ସେ କହିଛନ୍ତି, ଗବେଷଣା ଓ ଉଦ୍ଭାବନ ପାଇଁ ୧ ଲକ୍ଷ କୋଟି ଟଙ୍କାର ପାଣ୍ଠି ଘୋଷଣା କରାଯାଇଛି । ଏହାବ୍ୟତୀତ ସେ ବଜେଟରେ ଷ୍ଟାର୍ଟଅପ୍ ଗୁଡ଼ିକ ପାଇଁ ଟିକସ ଛାଡ଼ ବୃଦ୍ଧି ଉପରେ ଆଲୋକପାତ କରିଥିଲେ।
ବିତ୍ତୀୟ ନିଅଣ୍ଟକୁ ନିୟନ୍ତ୍ରଣରେ ରଖି ଚଳିତ ବଜେଟରେ ମୋଟ ବ୍ୟୟ ଐତିହାସିକ ବୃଦ୍ଧି ପାଇ ୧୧,୧୧,୧୧୧ କୋଟି ଟଙ୍କାରେ ପହଞ୍ଚିଛି ବୋଲି ପ୍ରଧାନମନ୍ତ୍ରୀ ସୂଚନା ଦେଇଛନ୍ତି। ଅର୍ଥନୀତିଜ୍ଞଙ୍କ ଭାଷାରେ ପ୍ରଧାନମନ୍ତ୍ରୀ ମୋଦୀ କହିଛନ୍ତି, ଏହା ଏକ ପ୍ରକାର ମଧୁର ସ୍ଥାନ। ଏହା ଦ୍ୱାରା ଭାରତରେ ଏକବିଂଶ ଶତାବ୍ଦୀର ଆଧୁନିକ ଭିତ୍ତିଭୂମି ସୃଷ୍ଟି ହେବା ସହ ଯୁବକମାନଙ୍କ ପାଇଁ ଲକ୍ଷ ଲକ୍ଷ ନୂଆ ନିଯୁକ୍ତି ସୁଯୋଗ ସୃଷ୍ଟି ହେବ ବୋଲି ସେ କହିଛନ୍ତି। ବନ୍ଦେ ଭାରତ ମାନର ୪୦,୦୦୦ ଅତ୍ୟାଧୁନିକ ବଗି ନିର୍ମାଣ କରି ସାଧାରଣ ଯାତ୍ରୀବାହୀ ଟ୍ରେନରେ ଲଗାଇବା ଘୋଷଣା ବିଷୟରେ ମଧ୍ୟ ସେ ସୂଚନା ଦେଇଥିଲେ ଯାହା ଦେଶର ବିଭିନ୍ନ ରେଳ ମାର୍ଗରେ କୋଟି କୋଟି ଯାତ୍ରୀଙ୍କ ଆରାମ ଏବଂ ଯାତ୍ରା ଅନୁଭୂତିକୁ ଆହୁରି ବଢ଼ାଇବ ।
ଏହି ଅବସରରେ ପ୍ରଧାନମନ୍ତ୍ରୀ ମୋଦୀ କହିଛନ୍ତି, ଆମେ ଏକ ବଡ଼ ଲକ୍ଷ୍ୟ ଧାର୍ଯ୍ୟ କରିଛୁ, ତାହା ହାସଲ କରୁଛୁ ଏବଂ ତା’ପରେ ନିଜ ପାଇଁ ଆହୁରି ବଡ଼ ଲକ୍ଷ୍ୟ ଧାର୍ଯ୍ୟ କରିଛୁ। ଗରିବ ଓ ମଧ୍ୟବିତ୍ତଙ୍କ କଲ୍ୟାଣ ପାଇଁ ସରକାରଙ୍କ ପ୍ରୟାସ ଉପରେ ଆଲୋକପାତ କରି ପ୍ରଧାନମନ୍ତ୍ରୀ କହିଥିଲେ, ଆମେ ଗାଁ ଓ ସହରରେ ୪ କୋଟିରୁ ଅଧିକ ଘର ନିର୍ମାଣ କରିଛୁ ଓ ଆହୁରି ୨ କୋଟି ଘର ନିର୍ମାଣ ଲକ୍ଷ୍ୟ ରଖିଛୁ । ମହିଳା ସଶକ୍ତିକରଣ ଉପରେ ଗୁରୁତ୍ୱାରୋପ କରି ପ୍ରଧାନମନ୍ତ୍ରୀ ମୋଦୀ କହିଛନ୍ତି, ମହିଳାଙ୍କ ମଧ୍ୟରେ ୨ କୋଟି ‘ଲକ୍ଷପତି’ ସୃଷ୍ଟି କରିବା ଆମର ଲକ୍ଷ୍ୟ ଥିଲା। ଏବେ ୩ କୋଟି ‘ଲକ୍ଷପତି’ ଦିଦି ତିଆରି କରିବାକୁ ଲକ୍ଷ୍ୟ ରଖାଯାଇଛି ।
ପ୍ରଧାନମନ୍ତ୍ରୀ ମୋଦୀ ଆୟୁଷ୍ମାନ ଭାରତ ଯୋଜନାରେ ଗରିବଙ୍କୁ ଉଲ୍ଲେଖନୀୟ ସହାୟତା, ଅଙ୍ଗନବାଡି ଏବଂ ଆଶା କର୍ମୀଙ୍କୁ ଏହାର ଲାଭ ପ୍ରଦାନ ପାଇଁ ପ୍ରଶଂସା କରିଥିଲେ ।
ପ୍ରଧାନମନ୍ତ୍ରୀ ମୋଦୀ ଏହି ବଜେଟରେ ଗରିବ ଏବଂ ମଧ୍ୟବିତ୍ତଙ୍କ ପାଇଁ ନୂତନ ସୁଯୋଗ ସୃଷ୍ଟି କରି ସେମାନଙ୍କୁ ସଶକ୍ତ କରିବା ଉପରେ ଗୁରୁତ୍ୱାରୋପ କରିଥିଲେ । ରୁଫ୍ ଟପ୍ ସୋଲାର ଅଭିଯାନ ବିଷୟରେ ସେ ଉଲ୍ଲେଖ କରିଥିଲେ ଯେଉଁଠାରେ ୧ କୋଟି ପରିବାର ମାଗଣା ବିଜୁଳି ପାଇବେ ଏବଂ ସରକାରଙ୍କୁ ଅତିରିକ୍ତ ବିଜୁଳି ବିକ୍ରି କରି ବାର୍ଷିକ ୧୫,୦୦୦ରୁ ୧୮,୦୦୦ ଟଙ୍କା ଆୟ କରିବେ ।
ପ୍ରଧାନମନ୍ତ୍ରୀ ଆଜି ଘୋଷଣା କରାଯାଇଥିବା ଆୟକର ଛାଡ଼ ଯୋଜନା ବିଷୟରେ ଉଲ୍ଲେଖ କରିଥିଲେ ଯାହା ମଧ୍ୟବିତ୍ତ ବର୍ଗର ପ୍ରାୟ ୧ କୋଟି ନାଗରିକଙ୍କୁ ଆଶ୍ୱସ୍ତି ପ୍ରଦାନ କରିବ । ବଜେଟରେ କୃଷକ କଲ୍ୟାଣ ପାଇଁ ନିଆଯାଇଥିବା ପ୍ରମୁଖ ନିଷ୍ପତ୍ତି ବିଷୟରେ ଶ୍ରୀ ମୋଦୀ ନାନୋ ଡିଏପିର ବ୍ୟବହାର, ପଶୁସମ୍ପଦ ପାଇଁ ନୂତନ ଯୋଜନା, ପିଏମ ମତ୍ସ୍ୟ ସମ୍ପଦ ଯୋଜନାର ସମ୍ପ୍ରସାରଣ ଏବଂ ଆତ୍ମନିର୍ଭର ତୈଳ ବୀଜ ଅଭିଯାନର ସମ୍ପ୍ରସାରଣ ବିଷୟରେ ଉଲ୍ଲେଖ କରିଥିଲେ ଯାହା କୃଷକମାନଙ୍କ ଆୟ ବୃଦ୍ଧି କରିବ ଏବଂ ଖର୍ଚ୍ଚ ହ୍ରାସ କରିବ । ଐତିହାସିକ ବଜେଟ୍ ଉପରେ ସମସ୍ତ ନାଗରିକଙ୍କୁ ଶୁଭେଚ୍ଛା ଜଣାଇ ପ୍ରଧାନମନ୍ତ୍ରୀ ତାଙ୍କ ଅଭିଭାଷଣ ଶେଷ କରିଥିଲେ।
