ନୂଆଦିଲ୍ଲୀ: ପ୍ରଧାନମନ୍ତ୍ରୀଙ୍କ ପ୍ରମୁଖ ଶାସନ ସଚିବ ଡକ୍ଟର ପିକେ ମିଶ୍ର ସମ୍ବଲପୁର ବିଶ୍ୱବିଦ୍ୟାଳୟ ସୂଚନା ପ୍ରଦ୍ୟୋଗିକ ସଂସ୍ଥାନ (ଏସୟୁଆଇଆଇଟି)ର ୧୪ତମ ପ୍ରତିଷ୍ଠା ଦିବସ ସମାରୋହରେ ଯୋଗଦେଇ ଉଦବୋଧନ ଦେଇଛନ୍ତି।
ଡକ୍ଟର ମିଶ୍ର କହିଥିଲେ, ଆମେ ଯେଉଁ ଅଭିବୃଦ୍ଧି ହାସଲ କରିବାକୁ ଚାହୁଁଛୁ ତାହାକୁ ପ୍ରୋତ୍ସାହିତ କରିବା ପାଇଁ ସାଧାରଣତଃ ବୈଷୟିକ ଜ୍ଞାନକୌଶଳ ଏବଂ ବିଶେଷକରି ଅତ୍ୟାଧୁନିକ ଏବଂ ଉଦୀୟମାନ ଜ୍ଞାନକୌଶଳକୁ ବ୍ୟବହାର କରିବାକୁ ପଡିବ ବୋଲି ପ୍ରଧାନମନ୍ତ୍ରୀ ବିଶ୍ୱାସ କରନ୍ତି।
ଏହି ଅଞ୍ଚଳରେ ଜ୍ଞାନ ଓ ଶିକ୍ଷାର ପ୍ରତୀକ ଭାବରେ ସମ୍ବଲପୁର ବିଶ୍ୱବିଦ୍ୟାଳୟର ଦୀର୍ଘଦିନର ଖ୍ୟାତି ଉପରେ ଆଲୋକପାତ କରି ଡକ୍ଟର ମିଶ୍ର ଏସୟୁଆଇଆଇଟି ପ୍ରତିଷ୍ଠାକୁ ପ୍ରଶଂସା କରିଥିଲେ । ଏହା ଶିକ୍ଷାଗତ ଉତ୍କର୍ଷତାର କେନ୍ଦ୍ର ଭାବରେ ବିଶ୍ୱବିଦ୍ୟାଳୟର ସ୍ଥିତିକୁ ଆହୁରି ସୁଦୃଢ଼ କରିଥିଲା ବୋଲି କହିଥିଲେ। ସୂଚନା ପ୍ରଯୁକ୍ତି ବିଦ୍ୟା ଉପରେ ଗୁରୁତ୍ୱ ଦେଇ ଏହି ଅନୁଷ୍ଠାନ କେବଳ ଯୁବପିଢ଼ିଙ୍କୁ ଅତ୍ୟାବଶ୍ୟକ ଡିଜିଟାଲ ଯୁଗର ଦକ୍ଷତା ପ୍ରଦାନ କରେ ନାହିଁ ବରଂ ଜାତୀୟ ପ୍ରଗତି ପାଇଁ ଜରୁରୀ ଜ୍ଞାନ ଭିତ୍ତିକ ଅର୍ଥବ୍ୟବସ୍ଥା ପାଇଁ ଭିତ୍ତିଭୂମି ପ୍ରସ୍ତୁତ କରିଥାଏ ।
ଏହାବ୍ୟତୀତ ଶିକ୍ଷା ଓ ଶିଳ୍ପ ମଧ୍ୟରେ ଥିବା ବ୍ୟବଧାନକୁ ଦୂର କରିବା ଉପରେ ଗୁରୁତ୍ୱାରୋପ କରି ପ୍ରମୁଖ ଶାସନ ସଚିବ କହିଥିଲେ ଯେ, ସ୍ନାତକମାନେ କେବଳ ବିଷୟ ଜ୍ଞାନରେ ପାରଙ୍ଗମ ନୁହଁନ୍ତି ବରଂ ବଜାର ପାଇଁ ଆବଶ୍ୟକ ବ୍ୟବହାରିକ ଦକ୍ଷତା ମଧ୍ୟ ସେମାନଙ୍କ ପାଖରେ ଅଛି।
ବିଜ୍ଞାନ ଓ ଇଞ୍ଜିନିୟରିଂ ଗବେଷଣା ବୋର୍ଡ (ଏସ୍ଇଆର୍ବି), ଇଣ୍ଡିଆନ୍ କାଉନସିଲ୍ ଅଫ୍ ମେଡିକାଲ୍ ରିସର୍ଚ୍ଚ, ଟାଟା ପାୱାର ଏବଂ ହିଣ୍ଡାଲ୍କୋ ଭଳି ପ୍ରତିଷ୍ଠିତ ଅନୁଷ୍ଠାନ ଓ ଶିଳ୍ପ ଗୁଡ଼ିକ ସହ ଏସଆଇଆଇଟିର ବର୍ତ୍ତମାନର ସହଭାଗିତାକୁ ଶ୍ରୀ ପିକେ ମିଶ୍ର ପ୍ରଶଂସା କରିଥିଲେ। ଏଥିସହିତ ଆଇଆଇଏମ୍ ସମ୍ବଲପୁର ସହିତ ଭବିଷ୍ୟତରେ ସହଭାଗିତା ପାଇଁ ଅନୁଷ୍ଠାନର ଯୋଜନାକୁ ସ୍ୱାଗତ କରିଥିଲେ। ବିଗ୍ ଡାଟା ଏନାଲିସିସ୍, ଇଣ୍ଟରନେଟ୍ ଅଫ୍ ଥିଙ୍ଗ୍ସ, ବ୍ଲକ୍ ଚେନ୍ ଆଦି କ୍ଷେତ୍ରରେ ବିଶ୍ୱବିଦ୍ୟାଳୟ ଯେଉଁ ସ୍ୱତନ୍ତ୍ର ପାଠ୍ୟକ୍ରମ ପ୍ରଦାନ କରିବାକୁ ଯୋଜନା କରୁଛି, ସେଥିପ୍ରତି ମଧ୍ୟ ସେ ଆଗ୍ରହ ପ୍ରକାଶ କରିଛନ୍ତି।
ଡକ୍ଟର ପିକେ ମିଶ୍ର ଅନୁସନ୍ଧାନ ଜାତୀୟ ଗବେଷଣା ଫାଉଣ୍ଡେସନ (ଏଏନ୍ଆର୍ଏଫ୍) ସମେତ ଭାରତ ସରକାରଙ୍କ ପଦକ୍ଷେପ ସମ୍ପର୍କରେ ସୂଚନା ଦେଇ ଏସୟୁଆଇଆଇଟିକୁ ସହଯୋଗର ସମ୍ଭାବନା ଖୋଜିବାକୁ ଅନୁରୋଧ କରିଥିଲେ। ୫୦,୦୦୦ କୋଟିର ବଜେଟ୍ ସହିତ ଗବେଷଣା ଓ ଉଦ୍ଭାବନକୁ ପ୍ରୋତ୍ସାହିତ କରିବା ଉପରେ ଗୁରୁତ୍ୱ ଦେଉଥିବା ଏଏନ୍ଆର୍ଏଫ୍ ବିଭିନ୍ନ ଶିକ୍ଷାନୁଷ୍ଠାନ, ଶିଳ୍ପ ଏବଂ ଗବେଷଣା ଅନୁଷ୍ଠାନ ଗୁଡ଼ିକ ମଧ୍ୟରେ ସହଯୋଗ ପାଇଁ ଏକ ଆକର୍ଷଣୀୟ ମାର୍ଗ ଉପସ୍ଥାପନ କରୁଛି ବୋଲି ସେ କହିଥିଲେ।
ବିଭିନ୍ନ ଶିକ୍ଷାନୁଷ୍ଠାନରେ ଭିତ୍ତିଭୂମି ବିକାଶ ଏବଂ ପ୍ରଯୁକ୍ତିବିଦ୍ୟା କ୍ଷେତ୍ରରେ ଗବେଷଣା ଓ ବିକାଶ ପ୍ରକଳ୍ପ ପାଇଁ ଇଲେକ୍ଟ୍ରୋନିକ୍ସ ଓ ସୂଚନା ପ୍ରଯୁକ୍ତି ବିଦ୍ୟା ମନ୍ତ୍ରଣାଳୟର ସହଯୋଗ ସମ୍ପର୍କରେ ଡ. ପି.କେ.ମିଶ୍ର ଆଲୋକପାତ କରିଥିଲେ । ଆଇଆଇଟି ଏବଂ ଆଇଆଇଏସସି ଭଳି ପ୍ରମୁଖ ଅନୁଷ୍ଠାନ ବ୍ୟତୀତ ଗବେଷଣା ପରିସରକୁ ବ୍ୟାପକ କରିବା ଉଦ୍ଦେଶ୍ୟରେ ଡକ୍ଟର ମିଶ୍ର ଗବେଷଣା ଓ ବିକାଶ ପଦକ୍ଷେପ ପାଇଁ ମନ୍ତ୍ରଣାଳୟର ସମର୍ଥନ ଲୋଡ଼ିବାକୁ ଏସୟୁଆଇଆଇଟିର ଅଧ୍ୟାପକ ଏବଂ ଗବେଷକମାନଙ୍କୁ ଉତ୍ସାହିତ କରିଥିଲେ।
ଇଲେକ୍ଟ୍ରୋନିକ୍ସ ସିଷ୍ଟମ ଡିଜାଇନ ଆଣ୍ଡ ମ୍ୟାନୁଫାକ୍ଚରିଂ (ଇଏସଡିଏମ) ଏବଂ ଆଇଟି/ଆଇଟି ସକ୍ଷମ ସେବାରେ ପିଏଚଡି ସଂଖ୍ୟା ବୃଦ୍ଧି ପାଇଁ ଡିଜାଇନ୍ କରାଯାଇଥିବା ବିଶ୍ୱେଶ୍ୱରୟ ପିଏଚଡି ଯୋଜନା ବିଷୟରେ ମଧ୍ୟ ଡ. ପିକେ ମିଶ୍ର ଉଲ୍ଲେଖ କରିଥିଲେ । ଏହି ସୁଯୋଗର ଅନୁସନ୍ଧାନ କରିବାକୁ ଏସ୍ୟୁଆଇଆଇଟିକୁ ଅନୁରୋଧ କରିଥିଲେ। ଏହାବ୍ୟତୀତ ପରମ ଶକ୍ତି ଓ ପରମ କାମରୂପ ଭଳି କମ୍ପ୍ୟୁଟେଶନାଲ ସମ୍ବଳ ଉପଲବ୍ଧ କରାଇବା ପାଇଁ ନ୍ୟାସନାଲ ସୁପରକମ୍ପ୍ୟୁଟିଂ ମିଶନ ସହ ସହଭାଗିତା ସ୍ଥାପନ କରିବାକୁ ସେ ପରାମର୍ଶ ଦେଇଥିଲେ।
ଉଦୀୟମାନ ଜ୍ଞାନକୌଶଳ ଉପରେ ଡିଜିଟାଲ ଦକ୍ଷତା ପ୍ରଶିକ୍ଷଣ ପ୍ରଦାନ ପାଇଁ ସରକାର ଏବଂ ନାସ୍କମ୍ ମଧ୍ୟରେ ମିଳିତ ପ୍ରୟାସ ଫ୍ୟୁଚର ସ୍କିଲ୍ସ ପ୍ରାଇମ୍ କାର୍ଯ୍ୟକ୍ରମ ଉପରେ ଡ. ମିଶ୍ର ଆଲୋକପାତ କରିଥିଲେ। ଓଡ଼ିଶା ସରକାରଙ୍କ ସହଯୋଗରେ ଏହି ଶିଳ୍ପଭିତ୍ତିକ ପାଠ୍ୟକ୍ରମର ଲାଭ ଉଠାଇବା ପାଇଁ ସେ ଛାତ୍ରଛାତ୍ରୀମାନଙ୍କୁ ଉତ୍ସାହିତ କରିଥିଲେ।
ଆପ୍ଲିକେସନ୍, ଟେକ୍ନୋଲୋଜି, ଇଞ୍ଜିନିୟରିଂ ଏବଂ ଗଣିତରେ ଛାତ୍ରଛାତ୍ରୀଙ୍କ ଉଦ୍ଭାବନ ଦକ୍ଷତାକୁ ପ୍ରୋତ୍ସାହିତ କରିବା ପାଇଁ ଏଆଇସିଟିଇ ସହଯୋଗରେ ଆଇଡିଆ ଲ୍ୟାବ୍ ପ୍ରତିଷ୍ଠା କରିବାକୁ ଡ. ପି.କେ ମିଶ୍ର ପ୍ରସ୍ତାବ ଦେଇଥିଲେ। ଆଇଟି ସମ୍ବନ୍ଧୀୟ ପାଠ୍ୟକ୍ରମକୁ ବୃଦ୍ଧି କରିବା ପାଇଁ ସମ୍ବଲପୁର ବିଶ୍ୱବିଦ୍ୟାଳୟ ଏବଂ ଆଇଆଇଟି ମାଡ୍ରାସ ମଧ୍ୟରେ ହେବାକୁ ଥିବା ବୁଝାମଣାପତ୍ର ବିଷୟରେ ମଧ୍ୟ ସେ ଉଲ୍ଲେଖ କରିଥିଲେ ।
ଉଚ୍ଚଶିକ୍ଷା ଓ ଗବେଷଣାର ବିକଶିତ ଦୃଶ୍ୟ ଉପରେ ଡ. ମିଶ୍ର ଆଲୋକପାତ କରିଥିଲେ । ସେ ଗବେଷଣା ଭିତ୍ତିକ ସମାଧାନର ବଢୁଥିବା ଚାହିଦା ଉପରେ ଗୁରୁତ୍ୱାରୋପ କରିଥିଲେ, ଯାହା ଦ୍ୱାରା ବର୍ଦ୍ଧିତ ପାଣ୍ଠି, ଉଦୀୟମାନ ଜ୍ଞାନକୌଶଳ ଏବଂ ଷ୍ଟାର୍ଟଅପ୍ ପାଇଁ ସୁଯୋଗ ବୃଦ୍ଧି ପାଇଥାଏ । ଉଚ୍ଚଶିକ୍ଷା କ୍ଷେତ୍ରକୁ ସମାବେଶୀ ଏବଂ ବିବିଧତା ପୂର୍ଣ୍ଣ କରିବା ଉପରେ ସେ ଗୁରୁତ୍ୱାରୋପ କରି କହିଥିଲେ, ଏପରି ଏକ ପରିବେଶକୁ ଉତ୍ସାହିତ କରାଯିବା ଉଚିତ୍ ଯେଉଁଠି ସମସ୍ତ ପୃଷ୍ଠଭୂମିର ଛାତ୍ରଛାତ୍ରୀମାନେ ସେମାନଙ୍କର ଆକାଂକ୍ଷା ପୂରଣ କରିବା ପାଇଁ ସଶକ୍ତ ଅନୁଭବ କରିପାରିବେ।