ଚିଲିକା (ସୀତାରାମ ଅଗ୍ରୱାଲ): ଦୀର୍ଘ ଅଠର ବର୍ଷ ଧରି ଅବସର ପ୍ରାପ୍ତ କର୍ମଚାରୀଙ୍କୁ ଚିକିତ୍ସା ସୁବିଧା ଦେବାକୁ ଦାବୀ ହୋଇ ଆସୁଅଛି। ବିଭିନ୍ନ ସମୟରେ ଅର୍ଥ ବିଭାଗର ମନ୍ତ୍ରୀ ଓ ବିଭିନ୍ନ ଅଧୁକାରୀଙ୍କ ସହ ଉକ୍ତ ବିଷୟରେ ଆଲୋଚନା ହୋଇଛି। କିନ୍ତୁ ରାଜ୍ୟ ସରାକର ଏହାକୁ ମଂଜୁର କରୁନାହାନ୍ତି। ରାଜ୍ୟର ସାଢେ ତିନିଲକ୍ଷ ଅବସର ପ୍ରାପ୍ତ କର୍ମଚାରୀ ମାନଙ୍କୁ ଆଉ ଅବହେଳା ନ କରିବାକୁ ଦାବୀ କରିଛି ବାଣପୁର ବାଲୁଗାଁ ଅବସର ପ୍ରାପ୍ତ କର୍ମଚାରୀ ସଙ୍ଘ। ଏ ବିଷୟରେ ମଧ୍ୟ ଭିକେ ପାଣ୍ଡିଆନଙ୍କ ବାଣପୁର ଗସ୍ତ ସମୟରେ ତାଙ୍କର ଅବଗତ ନିମନ୍ତେ ଦାବିପତ୍ର ପ୍ରଦାନ କରାଯାଇଛି।
ଉକ୍ତ ସଙ୍ଘର କାର୍ଯ୍ୟକରି ସଭାପତି ଶରତ ଚନ୍ଦ୍ର ବେଦମତା ଓ ସମ୍ପାଦକ ରାମଚନ୍ଦ୍ର ସ୍ୱାଇଁ ଏକ ବିବୃତ୍ତିରେ କହିଛନ୍ତି ଯେ, କେନ୍ଦ୍ର ସରକାରଙ୍କ ସ୍ୱାସ୍ଥ୍ୟ ଯୋଜନାରେ କେନ୍ଦ୍ରୀୟ କର୍ମଚାରୀଙ୍କୁ ଚିକିତ୍ସା ଭତ୍ତା ଏକ ହଜାର ଟଙ୍କା ମିଳୁଛି। ସେହିପରି କର୍ଣ୍ଣାଟକ ରାଜ୍ୟ ସରକାର ଦୁଇ ହଜାର ଟଙ୍କା, ବିହାର, ଛତିଶଗଡ଼, ଗୋଆ, ହରିୟାନା, ପଞ୍ଜାବ, ଝାଡ଼ଖଣ୍ଡ ଏକ ହାଜର ଟଙ୍କା ମେଘାଳୟ ୭୦୦ଟଙ୍କା, ଆସାମ, ତେଲେଙ୍ଗାନା ସରକାର ୬୦୦ଟଙ୍କା, ଅରୁଣାଞ୍ଚଳ ପ୍ରଦେଶ, ଆନ୍ଧ୍ର, କେରଳ, ମିଜୋରାମ, ତ୍ରିପୁରା ୫୦୦ ଟଙ୍କା, ନାଗାଲାଣ୍ଡ ୪୦୦ ଟଙ୍କା, ହିମାଞ୍ଚଳ ପ୍ରଦେଶ ୩୫୦ଟଙ୍କା, ରାଜସ୍ଥାନ, ଗୁଜୁରାଟ, ମଧ୍ୟପ୍ରଦେଶ, ଦିଲ୍ଲୀ, ତାମିଲନାଡୁ, ପଶ୍ଚିମବଙ୍ଗ ୩୦୦ଟଙ୍କା ଲେଖାଏଁ ଦିଆଯାଉଛି।
୨୦୦୬ମସିହାରୁ ଓଡ଼ିଶାରେ କେବଳ ବିଚାର ବିଭାଗୀୟ କର୍ମଚାରୀଙ୍କୁ ୧୫୦୦ ଟଙ୍କା ସ୍ୱାସ୍ଥ୍ୟବୀମା ଦିଆଯାଉଥିବା ବେଳେ ଅନ୍ୟ କର୍ମଚାରୀ ମାନଙ୍କୁ ଦିଆଯାଉନାହିଁ। ସଭାପତି ଶ୍ରୀଯୁକ୍ତ ବେଦମତା ଓ ସମ୍ପାଦକ ଶ୍ରୀଯୁକ୍ତ ସ୍ୱାଇଁ ଅବସର କର୍ମଚାରୀ ମାନଙ୍କ ଭୁବନେଶ୍ୱର ସାଧାରଣ ସଭାରେ ଉପସ୍ଥିତ ମନ୍ତ୍ରୀ ପ୍ରସନ୍ନ ଆଚାର୍ଯ୍ୟଙ୍କୁ ଦାବୀ କରିଥିବା ବେଳେ ଏହାକୁ ସରକାରଙ୍କ ଦୃଷ୍ଟିକୁ ଆଣିଥିବାକୁ ପ୍ରତିଶୃତି ଦେଇଥିଲେ। କିନ୍ତୁ ଅଦ୍ୟାବଧି ତାହା କାର୍ଯ୍ୟକାରୀ ହୋଇପାରି ନ ଥିବାରୁ ପୁନଶ୍ଚ ସରକାର ଆମର ଦାବୀକୁ ଗ୍ରହଣ କରିବାକୁ ସଙ୍ଘ ଦାବୀ କରିଛି।
