ପଶ୍ଚିମବଙ୍ଗର ମୁଖ୍ୟମନ୍ତ୍ରୀ ମମତା ବାନାର୍ଜୀ ବୁଧବାର ଅନୁଷ୍ଠିତ ହେବାକୁ ଥିବା ସର୍ବଦଳୀୟ ବୈଠକକୁ ପ୍ରତ୍ୟାଖାନ କରିଛନ୍ତି । ପଶ୍ଚିମବଙ୍ଗରେ ମମତା ସରକାର ଓ ବିଜେପି ମଧ୍ୟରେ କଡା ଟକ୍କର ଚାଲିଛି । ପ୍ରଧାନମନ୍ତ୍ରୀ ମୋଦି ଦ୍ବିତୀୟବାର ସରକାର ଗଠନ କରିବା ପରେ ଶପଥ ଗ୍ରହଣ ଉତ୍ସବକୁ ମଧ୍ୟ ମମତା ମନା କରିଥିଲେ । ଏବେ ‘ଏକ ଦେଶ, ଏକ ନିର୍ବାଚନ’ ନେଇ ଅନୁଷ୍ଠିତ ହେବାକୁ ଥିବା ସର୍ବଦଳୀୟ ବୈଠକରେ ଅଂଶଗ୍ରହଣ କରିବାକୁ ମନା କରିଛନ୍ତି ମମତା । ଜୁନ୍ ୧୯ରେ ଅନୁଷ୍ଠିତ ହେବାକୁ ଥିବା ଏହି ବୈଠକରେ ସବୁ ବିପକ୍ଷ ତଥା ରାଜନୈତିକ ଦଳଙ୍କୁ ନିମନ୍ତ୍ରଣ କରାଯାଇଛି । ମମତା ବାନାର୍ଜୀ ଏହି ବୈଠକରେ ସାମିଲ୍ ନ ହେବା ନେଇ ସଂସଦୀୟ ବ୍ୟାପାର ମନ୍ତ୍ରୀ ପ୍ରହ୍ଲାଦ ଯୋଶୀଙ୍କୁ ଏକ ଚିଠି ଲେଖି ଜଣାଇଛନ୍ତି । ମମତା କହିଛନ୍ତି ଯେ, ସରକାର ଏହି ସଂକ୍ରାନ୍ତୀୟ ଏକ ଶ୍ବେତ ପତ୍ର ଆଣିବା ଜରୁରୀ । ଏହି ସଂକ୍ରାନ୍ତୀୟ ଆଇନ୍କାନୁନ୍ ସମ୍ବନ୍ଧୀୟ ଚିନ୍ତନ ମନ୍ଥନ କରିବାର ଆବଶ୍ୟକତା ରହିଛି । ଏହି ମାମଲାରେ ତରବରିଆ ନିଷ୍ପତ୍ତି ନେବା ଠିକ୍ ହେବ ନାହିଁ ବୋଲି କହିଛନ୍ତି ମମତା । ଏଥିପାଇଁ ସେ ବୈଠକରେ ଯୋଗଦେବେ ନାହିଁ । ଏପରିକି ଟିଏମ୍ସିର କୌଣସି ପ୍ରତିନିଧି ମଧ୍ୟ ଏହି ବୈଠକରେ ସାମିଲ୍ ହେବେ ନାହିଁ ସୂଚନା ଦେଇଛନ୍ତି ମମତା । ତେବେ ମହାତ୍ମା ଗାନ୍ଧିଙ୍କ ୧୫୦ତମ ଜୟନ୍ତୀ ଅବସର ପାଇଁ କରାଯାଉଥିବା ପ୍ରସ୍ତୁତି ବୈଠକରେ ସାମିଲ୍ ହେବା ନେଇ ସୂଚନା ଦେଇଛନ୍ତି ମମତା ।
