ନୂଆଦିଲ୍ଲୀ: ଆଜି ଦିଲ୍ଲୀ ହାଇକୋର୍ଟ ୧୦୫ କୋଟି ଟଙ୍କାର ବକେୟା ଟିକସ ପୁନରୁଦ୍ଧାର ପାଇଁ ଆୟକର ନୋଟିସ ଉପରେ ରୋକ ଲଗାଇବାକୁ ଦଳର ଆବେଦନକୁ ଖାରଜ କରି କଂଗ୍ରେସକୁ ଝଟକା ଦେଇଛନ୍ତି। ମାର୍ଚ୍ଚ ୨୦୨୪ ରେ କଂଗ୍ରେସ ଦଳ ଏହି ମାମଲାରେ କୋର୍ଟଙ୍କ ନିକଟରେ ପହଞ୍ଚିଥିଲା।
ଜଷ୍ଟିସ୍ ଯଶବନ୍ତ ବର୍ମାଙ୍କ ନେତୃତ୍ୱରେ ଖଣ୍ଡପୀଠ କହିଛନ୍ତି ଯେ, ଦିଆଯାଇଥିବା ଆଦେଶରେ ହସ୍ତକ୍ଷେପ କରିବାର କୌଣସି କାରଣ ନାହିଁ। ମାର୍ଚ୍ଚ ୮ ତାରିଖରେ ଏହି ଆବଦେନକୁ ଖାରଜ କରିବା ପରେ କଂଗ୍ରେସ ହାଇକୋର୍ଟଙ୍କ ଦ୍ଵାରସ୍ଥ ହୋଇଥିଲା, ଯେଉଁଥିରେ ପାର୍ଟି ବିରୋଧରେ ପୁନରୁଦ୍ଧାର ପ୍ରକ୍ରିୟା ଆରମ୍ଭ କରିବା ପାଇଁ ଆୟକର ବିଭାଗର ଫେବୃଆରୀ ୧୩ ନୋଟିସ ଉପରେ ରୋକ ଲଗାଇବାକୁ ଦାବି କରାଯାଇଥିଲା।
ଦିଲ୍ଲୀ ହାଇକୋର୍ଟଙ୍କ ତରଫରୁ କଂଗ୍ରେସ ପାର୍ଟିକୁ ପୁଣିଥରେ ITAT ରେ ଉପସ୍ଥାପନ କରିବାକୁ କୁହାଯାଇଛି। ଫେବୃଆରୀ ମାସରେ, ଆୟକର ବିଭାଗ କଂଗ୍ରେସ ଦଳର ଚାରୋଟି ମୁଖ୍ୟ ବ୍ୟାଙ୍କ ଆକାଉଣ୍ଟକୁ ଫ୍ରିଜ୍ କରି ୨୦୧୮-୧୯ ପାଇଁ ୨୧୦ କୋଟି ଟଙ୍କା ଆୟକର ଦାବି କରିଛି। ଏହା ପରେ ଦଳ ଆୟକର ବିଭାଗର କାର୍ଯ୍ୟାନୁଷ୍ଠାନ ଉପରେ ରୋକ ଲଗାଇବାକୁ ଦାବି କରି ଟ୍ରିବ୍ୟୁନାଲ ନିକଟକୁ ଯାଇ କହିଥିଲା ଯେ, ଯଦି ସେମାନଙ୍କ ଆକାଉଣ୍ଟ ଫ୍ରିଜ୍ ହୋଇଯାଏ ତେବେ ଦଳ ବିଲ୍ ଏବଂ ଦରମା ପ୍ରଦାନ କରିପାରିବ ନାହିଁ।
ଫେବୃଆରୀ ୨୧ ତାରିଖରେ କଂଗ୍ରେସ କୋଷାଧ୍ୟକ୍ଷ ଅଜୟ ମାକେନ୍ ଅଭିଯୋଗ କରିଛନ୍ତି ଯେ, ଏହି ମାମଲାର ଶୁଣାଣି ଏବଂ ନିଷ୍ପତ୍ତି ବିଚାରାଧୀନ ଥିବାବେଳେ ଆୟକର ବିଭାଗ ବ୍ୟାଙ୍କଗୁଡ଼ିକୁ କଂଗ୍ରେସ, ଭାରତୀୟ ଯୁବ କଂଗ୍ରେସ ଏବଂ ଏନଏସୟୁଇ ଆକାଉଣ୍ଟରୁ ୬୫ କୋଟି ଟଙ୍କା ସରକାରଙ୍କୁ ହସ୍ତାନ୍ତର କରିବାକୁ ନିର୍ଦ୍ଦେଶ ଦେଇଛି।