ନୂଆଦିଲ୍ଲୀ: ଏକ ରାଷ୍ଟ୍ର ଏକ ନିର୍ବାଚନ ପାଇଁ ସେପ୍ଟେମ୍ବର ୨୦୨୩ରେ ପୂର୍ବତନ ରାଷ୍ଟ୍ରପତି ରାମନାଥ କୋବିନ୍ଦଙ୍କ ଅଧ୍ୟକ୍ଷତାରେ କେନ୍ଦ୍ର ସରକାର ଏକ କମିଟି ଗଠନ କରିଥିଲେ। ଏହି କମିଟି ସହିତ ପରାମର୍ଶ ସମୟରେ ହାଇକୋର୍ଟର ତିନିଜଣ ପୂର୍ବତନ ମୁଖ୍ୟ ବିଚାରପତି ଏବଂ ପୂର୍ବତନ ରାଜ୍ୟ ନିର୍ବାଚନ କମିଶନର ଏକକାଳୀନ ନିର୍ବାଚନ ଆୟୋଜନ କରିବାକୁ ବିରୋଧ କରିଥିଲେ। କେବଳ ଏତିକି ନୁହେଁ ୧୫ ଟି ରାଜନୈତିକ ଦଳ ମଧ୍ୟ ଏହାକୁ ବିରୋଧ କରିଛନ୍ତି। ଯେଉଁଠାରେ ୩୨ ଟି ଦଳ ଏକାସାଙ୍ଗରେ ନିର୍ବାଚନ କରିବାକୁ ସମର୍ଥନ କରିଛନ୍ତି।
ପୂର୍ବତନ ରାଷ୍ଟ୍ରପତି ରାମନାଥ କୋବିନ୍ଦଙ୍କ ଅଧ୍ୟକ୍ଷତାରେ ‘ଏକ ରାଷ୍ଟ୍ର-ଏକ ନିର୍ବାଚନ’ ଉପରେ ଗଠିତ କମିଟି ଆଜି ରାଷ୍ଟ୍ରପତି ଦ୍ରୌପଦୀ ମୁର୍ମୁଙ୍କ ନିକଟରେ ଏହାର ସୁପାରିଶ ଦାଖଲ କରିଛି। ଇଣ୍ଡିଆନ୍ ଏକ୍ସପ୍ରେସ ରିପୋର୍ଟ ଅନୁଯାୟୀ, ୪୭ ଟି ରାଜନୈତିକ ଦଳ ଦେଶରେ ଏକକାଳୀନ ନିର୍ବାଚନ ଆୟୋଜନ ଉପରେ କୋବିନ୍ଦ ନେତୃତ୍ୱାଧୀନ ପ୍ୟାନେଲରେ ନିଜର ମତ ଦାଖଲ କରିଛନ୍ତି। ଦେଶରେ ୩୨ ଟି ଦଳ ଏକକାଳୀନ ନିର୍ବାଚନ କରିବାକୁ ସମର୍ଥନ କରିଥିବାବେଳେ ୧୫ ଟି ଦଳ ଏହାକୁ ବିରୋଧ କରିଛନ୍ତି। ତେବେ ଏହି ନୀତିକୁ ସମର୍ଥନ କରୁଥିବା କେବଳ ଦୁଇଟି ଜାତୀୟ ଦଳ ହେଉଛି ବିଜେପି ଏବଂ ଏନପିପି। ଏନପିପି ମଧ୍ୟ ଏନଡିଏ ର ଅଂଶ।
ଏହି ପୂର୍ବତନ ବିଚାରପତିମାନେ ବିରୋଧ କରିଥିଲେ:
ନ୍ୟୁଜ୍ ଏଜେନ୍ସି ପିଟିଆଇ ଅନୁଯାୟୀ, ହାଇକୋର୍ଟର ୯ ଜଣ ପୂର୍ବତନ ପ୍ରଧାନ ବିଚାରପତି ଏକକାଳୀନ ନିର୍ବାଚନ କରିବାକୁ ସମର୍ଥନ କରିଛନ୍ତି। ଜଷ୍ଟିସ ଅଜିତ ପ୍ରକାଶ ଶାହା (ଦିଲ୍ଲୀ ହାଇକୋର୍ଟ), ଗିରିଶ ଚନ୍ଦ୍ର ଗୁପ୍ତା (କଲିକତା ହାଇକୋର୍ଟ) ଏବଂ ସଞ୍ଜୀବ ବାନାର୍ଜୀ (ମାଡ୍ରାସ ହାଇକୋର୍ଟ) ଏହାକୁ ବିରୋଧ କରିଛନ୍ତି।
ଏଥି ସହିତ ସୁପ୍ରିମକୋର୍ଟର ଚାରିଜଣ ଅବସରପ୍ରାପ୍ତ ମୁଖ୍ୟ ବିଚାରପତି ଯାହାଙ୍କୁ କମିଟି ବୈଠକ କରିଛି ସେମାନେ ଏହାକୁ ସମର୍ଥନ କରିଛନ୍ତି। ସମର୍ଥନ କରିଥିବା ବିଚାରପତିଙ୍କ ମଧ୍ୟରେ ଜଷ୍ଟିସ୍ ଦୀପକ ମିଶ୍ର, ରଂଜନ ଗୋଗୋଇ, ଏସ୍ ବବଡେ ଏବଂ ୟୁୟୁ ଲଲିତ ଅଛନ୍ତି।
ପ୍ୟାନେଲ ସହ ଆଲୋଚନା ବେଳେ ଚାରିଜଣ ପୂର୍ବତନ ମୁଖ୍ୟ ନିର୍ବାଚନ କମିଶନର ଏକକାଳୀନ ନିର୍ବାଚନ ଆୟୋଜନ କରିବାକୁ ସମର୍ଥନ କରିଛନ୍ତି। ବର୍ତ୍ତମାନର ଏବଂ ପୂର୍ବତନ ରାଜ୍ୟ ନିର୍ବାଚନ କମିଶନରଙ୍କ ମଧ୍ୟରୁ ୭ ଜଣ ଏହା ସଠିକ୍ ବୋଲି କହିଛନ୍ତି। ଏଥି ସହ ତାମିଲନାଡୁର ନିର୍ବାଚନ କମିଶନର ଥିବା ପଲାନିକୁମାର ମଧ୍ୟ ଏଥିରେ ଆପତ୍ତି ଜଣାଇଛନ୍ତି।