ନୂଆଦିଲ୍ଲୀ: କାନାଡା ନିର୍ବାଚନରେ ବିଦେଶୀ ହସ୍ତକ୍ଷେପ ଅଭିଯୋଗର ସରକାରୀ ଅନୁସନ୍ଧାନରୁ ଜଣାପଡିଛି ଯେ, କାନାଡା ରାଜନୀତିରେ ଭାରତ ହସ୍ତକ୍ଷେପ କରିବାକୁ ଚେଷ୍ଟା କରିନାହିଁ। ଅନୁସନ୍ଧାନରୁ ଜଣାପଡିଛି ଯେ, କାନାଡାରେ ୨୦୨୧ ନିର୍ବାଚନ ଉପରେ ନଜର ରଖିଥିବା କାନାଡାର ବରିଷ୍ଠ ଅଧିକାରୀଙ୍କ ଏକ ପ୍ୟାନେଲକୁ ଜାତୀୟ ନିର୍ବାଚନକୁ ପ୍ରଭାବିତ କରିବା ପାଇଁ ଭାରତର କୌଣସି ପ୍ରୟାସ ସମ୍ପର୍କରେ ସୂଚନା ଦିଆଯାଇ ନାହିଁ।
ତେବେ ସରକାରୀ ଅନୁସନ୍ଧାନର ସାକ୍ଷ୍ୟ ଅନୁଯାୟୀ କାନାଡାର ଗୁପ୍ତଚର ଏଜେନ୍ସି କାନାଡାରେ ଗତ ଦୁଇଟି ନିର୍ବାଚନରେ ହସ୍ତକ୍ଷେପ କରିଥିବା ଜାଣିବାକୁ ପାଇଛି।
କହିବାକୁ ଗଲେ କିଛି ଦିନ ପୂର୍ବରୁ ୨୦୧୯ ଏବଂ ୨୦୨୧ ମସିହାରେ କାନାଡାରେ ଅନୁଷ୍ଠିତ ନିର୍ବାଚନରେ ଭାରତ ଏବଂ ପାକିସ୍ତାନ ହସ୍ତକ୍ଷେପ କରିଥିବା ଅଭିଯୋଗ ହୋଇଛି। ପ୍ରଧାନମନ୍ତ୍ରୀ ଜଷ୍ଟିଡ ଟ୍ରୁଡୋଙ୍କ ଲିବରାଲ୍ ପାର୍ଟି ଉଭୟ ୨୦୧୯ ଏବଂ ୨୦୨୧ ନିର୍ବାଚନରେ ଜିତିଥିଲେ। ପ୍ରକୃତରେ, ଚୀନ୍ର ସମ୍ଭାବ୍ୟ ଭୂମିକା ସମ୍ପର୍କରେ ଗଣମାଧ୍ୟମ ରିପୋର୍ଟରେ ଅସନ୍ତୁଷ୍ଟ ବିରୋଧୀ ବିଧାୟକଙ୍କ ଚାପରେ ଟ୍ରୁଡୋ ବିଦେଶୀ ହସ୍ତକ୍ଷେପ ଅନୁସନ୍ଧାନ ପାଇଁ ଏକ କମିଶନ ଗଠନ କରିଥିଲେ।
ଟ୍ରୁଡୋ ଆଜି ଏହି ମାମଲାରେ ପ୍ୟାନେଲ ସମ୍ମୁଖରେ ହାଜର ହେବେ। ଭାରତ ଏହା ପୂର୍ବରୁ ଏହି ଦାବିକୁ ପ୍ରତ୍ୟାଖ୍ୟାନ କରି ଅନ୍ୟ ଦେଶର ଗଣତାନ୍ତ୍ରିକ ପ୍ରକ୍ରିୟାରେ ହସ୍ତକ୍ଷେପ ନକରିବାକୁ ପ୍ରତିଶ୍ରୁତି ଦେଇଥିଲା।
ଫେବୃଆରୀରେ ବୈଦେଶିକ ବ୍ୟାପାର ମନ୍ତ୍ରଣାଳୟର ମୁଖପାତ୍ର ରଣଧୀର ଜୟସ୍ଵାଲ କହିଛନ୍ତି ଯେ, କାନାଡାର ଅନୁସନ୍ଧାନ ଆୟୋଗ ବିଷୟରେ ଆମେ ଗଣମାଧ୍ୟମର ରିପୋର୍ଟ ଦେଖିଛୁ … କାନାଡା ନିର୍ବାଚନରେ ଭାରତୀୟ ହସ୍ତକ୍ଷେପର ଏଭଳି ଭିତ୍ତିହୀନ ଅଭିଯୋଗକୁ ଆମେ ଦୃଢତାର ସହ ପ୍ରତ୍ୟାଖ୍ୟାନ କରିଛୁ।
ସେ କହିଥିଲେ, “ଅନ୍ୟ ଦେଶର ଗଣତାନ୍ତ୍ରିକ ପ୍ରକ୍ରିୟାରେ ହସ୍ତକ୍ଷେପ କରିବା ଭାରତ ସରକାରଙ୍କ ନୀତି ନୁହେଁ। ବରଂ ଏହାର ବିପରୀତ ଘଟଣା ଘଟୁଛି। କାନାଡା ହିଁ ଆମର ଆଭ୍ୟନ୍ତରୀଣ କାର୍ଯ୍ୟରେ ହସ୍ତକ୍ଷେପ କରିବାକୁ ଚେଷ୍ଟା କରୁଛି।”
ବିଦେଶୀ ହସ୍ତକ୍ଷେପ ଉପରେ କାନାଡାର ଅନୁସନ୍ଧାନ ଦୁଇ ଦେଶ ମଧ୍ୟରେ ସମ୍ପର୍କକୁ ଆହୁରି ତିକ୍ତ କରିଦେଇଛି।