ନୂଆଦିଲ୍ଲୀ: ଭାରତ ସହିତ ବିବାଦ ଯୋଗୁଁ ବର୍ତ୍ତମାନ ମାଲଦ୍ୱୀପ ପାଇଁ ମହଙ୍ଗା ପଡୁଛି। ପର୍ଯ୍ୟଟକଙ୍କ ଅଭାବ ହେତୁ ମାଲଦ୍ୱୀପର ପର୍ଯ୍ୟଟନ ଶିଳ୍ପ ପ୍ରଭାବିତ ହୋଇଛି। ଗତ ବର୍ଷ ତୁଳନାରେ ମାଲଦ୍ୱୀପ ପରିଦର୍ଶନ କରୁଥିବା ଭାରତୀୟ ପର୍ଯ୍ୟଟକଙ୍କ ସଂଖ୍ୟା ୩୮ ପ୍ରତିଶତ ହ୍ରାସ ପାଇଛି।
ପର୍ଯ୍ୟଟନ ମନ୍ତ୍ରଣାଳୟର ତଥ୍ୟ ଅନୁଯାୟୀ, ଚଳିତ ବର୍ଷ ଜାନୁଆରୀରୁ ମାର୍ଚ୍ଚ ତ୍ରୟମାସରେ କେବଳ ୩୪,୮୪୭ ଭାରତୀୟ ମାଲଦ୍ୱୀପରେ ପହଞ୍ଚିଥିବାବେଳେ ଗତ ବର୍ଷ ସମାନ ତ୍ରୟମାସରେ ୫୬,୨୦୮ ଭାରତୀୟ ଯାତ୍ରୀ ଯାଇଥିଲେ। ଏହା ପ୍ରାୟ ୩୮ ପ୍ରତିଶତ ହ୍ରାସ। ୨୦୨୧ ରୁ ୨୦୨୩ ପର୍ଯ୍ୟନ୍ତ ମାଲଦ୍ୱୀପ ପାଇଁ ଭାରତ ଏକ ନମ୍ବର ଉତ୍ସ ହୋଇଥିବାବେଳେ ଚଳିତ ବର୍ଷ ହ୍ରାସ ଘଟିଛି।
ବାସ୍ତବରେ, ମାଲଦ୍ୱୀପ ରାଷ୍ଟ୍ରପତି ମହମ୍ମଦ ମୁଇଜୁଙ୍କ “ଇଣ୍ଡିଆ ଆଉଟ୍” ଅଭିଯାନ ଏବଂ ଏହାପରେ ଭାରତୀୟଙ୍କ ଦ୍ଵାରା ମାଲଦ୍ୱୀପ ବହିସ୍କାର କରିବା ମଧ୍ୟରେ ଏହି ପ୍ରସଙ୍ଗ ଆସିଛି। ଏଭଳି ପରିସ୍ଥିତିରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଲକ୍ଷଦ୍ୱୀପ ପରିଦର୍ଶନ କରିବା ପରେ ମାଲଦ୍ୱୀପର ତିନିଜଣ ଉପମନ୍ତ୍ରୀ ଲକ୍ଷଦ୍ୱୀପ ଗସ୍ତର ଚିତ୍ର ଉପରେ ପ୍ରଧାନମନ୍ତ୍ରୀ ମୋଦୀଙ୍କ ବିରୋଧରେ ଅପମାନଜନକ ମନ୍ତବ୍ୟ ଦେଇଥିଲେ, ଯାହା ପରେ ଦୁଇ ଦେଶ ମଧ୍ୟରେ ବିବାଦ ବଢିଯାଇଥିଲା।
ଏହି ପ୍ରସଙ୍ଗରେ ଲୋକମାନେ ସୋସିଆଲ ମିଡିଆରେ “ବୟକଟ୍ ମାଲଦ୍ୱୀପ” ର ଧାରା ଆରମ୍ଭ କରିଥିଲେ। କେବଳ ସେଲିବ୍ରିଟି କିମ୍ବା ସୋସିଆଲ ମିଡିଆର ପ୍ରଭାବଶାଳୀ ବ୍ୟକ୍ତି ନୁହଁନ୍ତି, ଅନଲାଇନ୍ ଟ୍ରାଭେଲ୍ ଏଜେନ୍ସି ମଧ୍ୟ ଏହି ଟ୍ରେଣ୍ଡରେ ଯୋଗଦେବା ଆରମ୍ଭ କରିଥିଲେ।
