ରଣପୁର: ଚଳିତ ସାଧାରଣ ନିର୍ବାଚନ ପରିପ୍ରେକ୍ଷୀରେ ପୁରୀ ଲୋକସଭା କ୍ଷେତ୍ର ଅଧିନସ୍ଥ ରଣପୁର ନିର୍ବାଚନ ମଣ୍ଡଳୀ ରେ ବିଜେପିର ବିଜୟ ସଙ୍କଳ୍ପ ସମାବେଶ ଅନୁଷ୍ଠିତ ହୋଇଯାଇଛି। ଏହି ସମାବେଶରେ ଭାରତର ପ୍ରତିରକ୍ଷା ମନ୍ତ୍ରୀ ରାଜନାଥ ସିଂହ ଯୋଗ ଦେଇ ବିରୋଧୀ କଂଗ୍ରେସ୍ ଓ ବିଜେଡି ବିପକ୍ଷରେ ବିଷୋଦଗାର କରିବା ସହ ପ୍ରଧାନମନ୍ତ୍ରୀ ମୋଦୀ ଙ୍କ ନେତୃତ୍ୱରେ କେନ୍ଦ୍ରରେ ବିଜେପି ଏକ ସ୍ଥିର ସରକାର ଦେବାରେ ସମର୍ଥ ହୋଇଛି। ସମଗ୍ର ବିଶ୍ୱରେ ଭାରତବର୍ଷ ର ଏକ ସ୍ୱତନ୍ତ୍ର ପରିଚୟ ସୃଷ୍ଟି ହୋଇଛି।
ଚଳିତ ନିର୍ବାଚନରେ ପୁରୀ ଲୋକସଭା କ୍ଷେତ୍ର ର ପ୍ରାର୍ଥୀ ତଥା ବିଜେପିର ରାଷ୍ଟ୍ରୀୟ ପ୍ରବକ୍ତା ଡଃ ସମ୍ବିତ୍ ପାତ୍ର ଙ୍କୁ ବିପୁଳ ସଂଖ୍ୟାରେ ଭୋଟ୍ ଦେଇ ମୋଦିଜୀଙ୍କ ୪୦୦ ପାର ନାରାକୁ ସାକାର କରିବା ପାଇଁ ନିବେଦନ କରିଥିଲେ। ସେହିଭଳି ରଣପୁର ବିଧାନସଭା କ୍ଷେତ୍ର ପାଇଁ ପ୍ରାର୍ଥୀ ହୋଇଥିବା ପୂର୍ବତନ ମନ୍ତ୍ରୀ ତଥା ରାଷ୍ଟ୍ରୀୟ ମହିଳା ମୋର୍ଚ୍ଚା ଅଧ୍ୟକ୍ଷା ସୁରମା ପାଢୀଙ୍କୁ ବିପୁଳ ମାତ୍ରାରେ ଭୋଟ ଦେଇ ଜୟଯୁକ୍ତ କରିବା ପାଇଁ ନିବେଦନ କରିଥିଲେ।
ଏହି ସମାବେଶରେ ଯୋଗ ଦେଇଥିବା ସାଂସଦ ପ୍ରାର୍ଥୀ ସମ୍ବିତ ପାତ୍ର ସାଳିଆ ଡ୍ୟାମରୁ ଭେଟବର ଡ୍ୟାମ୍ କୁ ସଂଯୋଗୀକରଣ ବ୍ୟବସ୍ଥା, ରଣପୁର ର ମଣିନାଗ ମନ୍ଦିର ଓ ଅସୁରକୁମାରୀ କ୍ଷେତ୍ରକୁ ବିକଶିତ ପର୍ଯ୍ୟଟନ କ୍ଷେତ୍ର ଭାବେ ଗଢି ତୋଳିବା, ରଣପୁର ରେ ଆଧୁନିକ ଡାକ୍ତରଖାନା ପ୍ରତିଷ୍ଠା କରିବା, ସୁନାଖଳା ରୁ ଭାୟା ରଣପୁର ଦେଇ କାଳୁପଡା କୁ ରେଳ ସଂଯୋଗୀକରଣ କରାଯିବା, ରଣପୁର ରୁ ରଥଯାତ୍ରା ପାଇଁ ନୂତନ ଭାବେ ତିନି ରଥ ନିର୍ମାଣ କରିବା ଓ ବିସି ହାଇସ୍କୁଲ୍ କୁ ଆଧୁନିକୀକରଣ କରିବା ନେଇ ପ୍ରତିଶୃତି ରଖିଥିଲେ।
ସେହିଭଳି ବିଧାୟିକା ପ୍ରାର୍ଥୀ ସୁରମା ପାଢୀ ମୋଦୀ ସରକାର ଙ୍କର ବିଭିନ୍ନ ବିକାଶ ମୂଳକ ଯୋଜନା ସମ୍ପର୍କରେ ଆଲୋକପାତ କରିବା ସହ ରାଜ୍ୟ ସରକାର ଙ୍କୁ କଡା ସମାଲୋଚନା କରିଥିଲେ । ଚଳିତ ନିର୍ବାଚନରେ ଉଭୟ ଲୋକସଭା ଓ ବିଧାନସଭା ପ୍ରାର୍ଥୀ ଙ୍କୁ ବିପୁଳ ସଂଖ୍ୟା ରେ ଭୋଟ ଦେଇ ଜୟଯୁକ୍ତ କରିବା ପାଇଁ ନିବେଦନ କରିଥିଲେ। ଯୁବ ସଂଗଠକ ପ୍ରିୟବ୍ରତ ପ୍ରହରାଜ ଙ୍କ ଅଧ୍ୟକ୍ଷତା ରେ ଅନୁଷ୍ଠିତ ଏହି ସଂଙ୍କଳ୍ପ ସମାବେଶ ରେ ଅନ୍ୟ ମାନଙ୍କ ମଧ୍ୟରେ ପୁରୀ ଲୋକସଭା କ୍ଷେତ୍ର ସଂଯୋଜକ ଶଙ୍କର୍ଷଣ ପରିଡା, ଜିଲ୍ଲା ସଭାପତି ତାପସ ମାର୍ଥା, ବ୍ଲକ୍ ଅଧ୍ୟକ୍ଷା ନିର୍ମଳା ବେହେରା ଓ ଗୋପାଳପୁର ଜିଲ୍ଲା ପରିଷଦ ଲକ୍ଷ୍ମୀପ୍ରିୟା ତରେଇ ପ୍ରମୁଖ ମଂଚାସୀନ ହୋଇ ନିଜ ନିଜର ଅଭିଭାଷଣ ରଖିଥିଲେ।
ହଜାର ହଜାର ସଂଖ୍ୟାରେ ପୁରୁଷ ଓ ମହିଳା ବିଜେପି କର୍ମୀ ମାନେ ଏହି ବିଜୟ ସଙ୍କଳ୍ପ ସମାବେଶ ରେ ଯୋଗ ଦେଇଥିଲେ।
