![](https://thesamikhsya.com/odia/wp-content/uploads/2021/12/aap-rally.jpg)
ନୂଆଦିଲ୍ଲୀ: ପ୍ରବର୍ତ୍ତନ ନିର୍ଦ୍ଦେଶାଳୟ (ଇଡି) ଦିଲ୍ଲୀ ହାଇକୋର୍ଟଙ୍କୁ କହିଛି ଯେ, ଆମ୍ ଆଦମୀ ପାର୍ଟିକୁ ମଧ୍ୟ ଅବକାରୀ ନୀତି ମାମଲାରେ ଦାଖଲ ହେବାକୁ ଥିବା ପରବର୍ତ୍ତୀ ଚାର୍ଜସିଟ୍ ରେ ଅଭିଯୁକ୍ତ କରାଯିବ। ଇଡି ଦିଲ୍ଲୀ ହାଇକୋର୍ଟଙ୍କୁ ମଧ୍ୟ କହିଛି ଯେ, ଅନେକ ଅଭିଯୁକ୍ତ ଏହି ମାମଲାର ଶୁଣାଣି ବିଳମ୍ବ କରିବାକୁ ଚେଷ୍ଟା କରୁଛନ୍ତି।
ଅବକାରୀ ନୀତି ସହ ଜଡିତ ମନି ଲଣ୍ଡରିଂ ମାମଲାରେ ହାଇକୋର୍ଟ ପୂର୍ବତନ ଉପ-ମୁଖ୍ୟମନ୍ତ୍ରୀ ମନୀଷ ସିସୋଦିଆଙ୍କ ଜାମିନ ଆବେଦନ ଉପରେ ଶୁଣାଣି କରୁଥିବା ବେଳେ ଇଡିଙ୍କ ଓକିଲ ଏହି ଯୁକ୍ତି ଦର୍ଶାଇଛନ୍ତି। ତେବେ ଇଡି ସିସୋଦିଆଙ୍କ ଜାମିନ ଆବେଦନକୁ ବିରୋଧ କରି କହିଛି ଯେ, ଅବକାରୀ ନୀତି ମାମଲାରେ ଶୁଣାଣି ବିଳମ୍ବ କରିବାକୁ ଅଭିଯୁକ୍ତଙ୍କ ମିଳିତ ଉଦ୍ୟମ ଚାଲିଛି।
ଅବକାରୀ ନୀତି କ’ଣ?:
୨୦୨୧ ମସିହାରେ ଦିଲ୍ଲୀ ସରକାର ଏକ ନୂତନ ଅବକାରୀ ନୀତି ପ୍ରଣୟନ କରିଥିଲେ। ୨୦୨୨ ସୁଦ୍ଧା, ଅବକାରୀ ନୀତି ଉପରେ ପ୍ରଶ୍ନବାଚୀ ସୃଷ୍ଟି ହୋଇଥିଲା। ନୀତି ପ୍ରସ୍ତୁତ ଏବଂ କାର୍ଯ୍ୟକାରୀ କରିବାରେ ହୋଇଥିବା ଅନିୟମିତତା ସମ୍ପର୍କରେ ସିବିଆଇ ତଦନ୍ତ ପାଇଁ ଏଲଜି ଭି.କେ ସକ୍ସେନା ସୁପାରିଶ କରିଥିଲେ। ଏହା ପରେ ସିବିଆଇ ଏବଂ ଇଡି ମଧ୍ୟ ଅନିୟମିତତା ମାମଲା ରୁଜୁ କରିଥିଲେ। ଏହା ପରେ ଦିଲ୍ଲୀ ସରକାର ଅବକାରୀ ନୀତି ବାତିଲ କରିଥିଲେ।
ଅରବିନ୍ଦ କେଜ୍ରିୱାଲଙ୍କ ଗିରଫ:
ମାର୍ଚ୍ଚ ୨୦୨୪ ରେ ଦିଲ୍ଲୀ ଅବକାରୀ ନୀତିର ମଦ ଦୁର୍ନୀତି ସହ ଜଡିତ ଅର୍ଥ ହେରଫେର ମାମଲାରେ ଇଡି ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିୱାଲଙ୍କୁ ଗିରଫ କରିଥିଲା। ଅରବିନ୍ଦ କେଜ୍ରିୱାଲ ତାଙ୍କୁ ଦିଲ୍ଲୀ ହାଇକୋର୍ଟରେ ଗିରଫ କରିବାକୁ ଚ୍ୟାଲେଞ୍ଜ କରିଥିଲେ, ତାଙ୍କ ଆବେଦନକୁ ଖାରଜ କରାଯାଇଥିଲା। ତେବେ ସୁପ୍ରିମକୋର୍ଟ ତାଙ୍କୁ ଶୁକ୍ରବାର ଦିନ ଅନ୍ତରୀଣ ଜାମିନ ପ୍ରଦାନ କରିଛନ୍ତି। ଅରବିନ୍ଦ କେଜ୍ରିୱାଲଙ୍କୁ ଜୁନ୍ ୨ ତାରିଖରେ ପୁଣି ଆତ୍ମସମର୍ପଣ କରିବାକୁ ପଡ଼ିବ।