ନୂଆଦିଲ୍ଲୀ: ଯଦି ଗଣମାଧ୍ୟମର ରିପୋର୍ଟକୁ ବିଶ୍ବାସ କରାଯାଏ, ତେବେ ଏହି ନେତାଙ୍କ ମଧ୍ୟରୁ ଅନେକଙ୍କୁ ବର୍ତ୍ତମାନ ଏନଡିଏ ସରକାର ରାଜ୍ୟପାଳ ଭାବରେ ମନୋନୀତ କରିପାରନ୍ତି। ବାସ୍ତବରେ ଦେଶର ୯ ରାଜ୍ୟପାଳଙ୍କ କାର୍ଯ୍ୟକାଳ ଆସନ୍ତା ଜୁଲାଇରୁ ସେପ୍ଟେମ୍ବର ମଧ୍ୟରେ ଶେଷ ହେବାକୁ ଯାଉଛି। ଏଥିମଧ୍ୟରେ ଉତ୍ତରପ୍ରଦେଶର ରାଜ୍ୟପାଳ ଆନନ୍ଦ ବେନ ପଟେଲ, ମେଘାଳୟର ଫାଗୁ ଚୌହାନ, ମହାରାଷ୍ଟ୍ରର ରମେଶ ବୈସ, ମଣିପୁରର ଅନୁସୁୟା ଉଇକେ ଏବଂ ରାଜସ୍ଥାନର କଲରାଜ ମିଶ୍ର ଅଛନ୍ତି।
ଏହା ସହିତ ଗୁଜୁରାଟର ଆଚାର୍ଯ୍ୟ ଦେବବ୍ରତ, କେରଳର ଆରିଫ ମହମ୍ମଦ ଖାନ, ହରିୟାଣାର ବନ୍ଦାରୁ ଦତ୍ତାତ୍ତ୍ରେୟ ଏବଂ ପଞ୍ଜାବର ବନୱାରୀ ଲାଲ ପୁରୋହିତଙ୍କ କାର୍ଯ୍ୟକାଳ ମଧ୍ୟ ଶେଷ ହେବାକୁ ଯାଉଛି। ଏହି ପରିସ୍ଥିତିରେ ଏହି ବଡ ନେତାମାନଙ୍କୁ ରାଜ୍ୟପାଳ କରାଯିବ ବୋଲି କଳ୍ପନାଜଳ୍ପନା ଚାଲିଛି। ତେବେ ଏହି ନେତାଙ୍କ ମଧ୍ୟରେ ବିଶେଷକରି ଜେନେରାଲ (ଅବସରପ୍ରାପ୍ତ) ଭି.କେ ସିଂ, ଅଶ୍ୱିନୀ ଚୌବେ ଏବଂ ଡକ୍ଟର ହର୍ଷ ବର୍ଦ୍ଧନଙ୍କ ନାମ ରାଜନୈତିକ ମହଲରେ ଅଧିକ ଚର୍ଚ୍ଚିତ ହୋଇଛି।
ଜେନେରାଲ (ଅବସରପ୍ରାପ୍ତ) ଭି.କେ ସିଂ ୨୦୧୪ ଏବଂ ୨୦୧୯ ରେ UP ଗାଜିଆବାଦରୁ ସାଂସଦ ହୋଇଥିଲେ। କେନ୍ଦ୍ର ସରକାରରେ ଭି.କେ ସିଂ ସଡକ ପରିବହନ ଏବଂ ରାଜପଥ ମନ୍ତ୍ରଣାଳୟ, ବେସାମରିକ ବିମାନ ଚଳାଚଳ ମନ୍ତ୍ରଣାଳୟ ଏବଂ ବୈଦେଶିକ ବ୍ୟାପାର ମନ୍ତ୍ରଣାଳୟରେ ରାଜ୍ୟ ମନ୍ତ୍ରୀ ଭାବରେ କାର୍ଯ୍ୟ କରିଥିଲେ।
ଡକ୍ଟର ହର୍ଷ ବର୍ଦ୍ଧନଙ୍କ ବିଷୟରେ କହିବାକୁ ଗଲେ ସେ ଦିଲ୍ଲୀର ଚାନ୍ଦନୀ ଚୌକ ଆସନରୁ ସାଂସଦ ହୋଇଥିଲେ। ଡକ୍ଟର ହର୍ଷ ବର୍ଦ୍ଧନ ମଧ୍ୟ ୫ ଥର ଦିଲ୍ଲୀରେ ବିଧାୟକ ଭାବରେ ନିର୍ବାଚିତ ହୋଇଥିଲେ। ୧୯୯୩-୧୯୯୮ ମଧ୍ୟରେ ସେ ଦିଲ୍ଲୀ ସରକାରରେ ସ୍ୱାସ୍ଥ୍ୟ, ଶିକ୍ଷା, ଆଇନ ଏବଂ ନ୍ୟାୟ ଏବଂ ବିଧାନସଭା ମନ୍ତ୍ରୀ ଥିଲେ। ସେ କେନ୍ଦ୍ର ସରକାରରେ ସ୍ୱାସ୍ଥ୍ୟ ଏବଂ ପରିବାର କଲ୍ୟାଣ, ବିଜ୍ଞାନ ଏବଂ ପ୍ରଯୁକ୍ତିବିଦ୍ୟା ମନ୍ତ୍ରୀ ଭାବରେ କାର୍ଯ୍ୟ କରିଥିଲେ।
ଅଶ୍ୱିନୀ ଚୌବେ ବିହାରର ବକ୍ସର ଆସନରୁ ଲଗାତାର ଦୁଇଥର ସଂସଦରେ ପହଞ୍ଚିଥିଲେ। କେନ୍ଦ୍ର ସରକାରରେ ଅଶ୍ୱିନୀ ଚୌବେ ଗ୍ରାହକ ବ୍ୟାପାର, ଖାଦ୍ୟ ଏବଂ ଜନସାଧାରଣ ବଣ୍ଟନ ସହିତ ପରିବେଶ, ଜଙ୍ଗଲ ଏବଂ ଜଳବାୟୁ ପରିବର୍ତ୍ତନ ମନ୍ତ୍ରଣାଳୟରେ ରାଜ୍ୟ ମନ୍ତ୍ରୀ ଭାବରେ କାର୍ଯ୍ୟ କରିଛନ୍ତି।
ତେବେ କେରଳ ରାଜ୍ୟପାଳ ଆରିଫ ମହମ୍ମଦ ଖାନଙ୍କ କାର୍ଯ୍ୟକାଳ ବୃଦ୍ଧି କରାଯାଇପାରେ ବୋଲି ମଧ୍ୟ ଆଲୋଚନା ହେଉଛି। ଆରିଫ ମହମ୍ମଦ ଖାନଙ୍କ କାର୍ଯ୍ୟକାଳ ୬ ସେପ୍ଟେମ୍ବର ୨୦୨୪ ରେ ଶେଷ ହେଉଛି। ସେପଟେ ପଞ୍ଜାବ ରାଜ୍ୟପାଳ ବନୱାରୀ ଲାଲ ପୁରୋହିତ ତାଙ୍କ ପଦରୁ ଇସ୍ତଫା ଦେଇଛନ୍ତି। ତେବେ ତାଙ୍କ ଇସ୍ତଫା ଏପର୍ଯ୍ୟନ୍ତ ଗ୍ରହଣ କରାଯାଇ ନାହିଁ।