ନୂଆଦିଲ୍ଲୀ: ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ନେତୃତ୍ୱରେ ସରକାର ଆଜି ପୂର୍ଣ୍ଣ ବଜେଟ୍ ଉପସ୍ଥାପନ କରିଛନ୍ତି। ଏଥିରେ ସଡକ ଭିତ୍ତିଭୂମି ଠାରୁ ମହିଳା ଏବଂ କୃଷକ ପର୍ଯ୍ୟନ୍ତ ବଡ ଘୋଷଣା କରାଯାଇଛି। ବିରୋଧୀ ଦଳ ପକ୍ଷରୁ କୁହାଯାଉଛି ଯେ, ବଜେଟରେ ବିଶେଷ କିଛି ଘୋଷଣା କରାଯାଇ ନାହିଁ। ତେବେ ମୋଦୀ ସରକାରଙ୍କ ଏକ ଘୋଷଣାକୁ ନେଇ ତୃଣମୂଳ କଂଗ୍ରେସ (ଟିଏମସି) ସାଂସଦ ଶତ୍ରୁଘ୍ନ ସିହ୍ନା ବହୁତ ଖୁସି ଅଛନ୍ତି। ଏଥିପାଇଁ ସେ ସରକାରଙ୍କୁ ପ୍ରଶଂସା କରିଛନ୍ତି।
ବାସ୍ତବରେ ବଜେଟ୍ ଉପସ୍ଥାପନ କରିବାବେଳେ ଅର୍ଥମନ୍ତ୍ରୀ ନିର୍ମଳା ସୀତାରମଣ ଘୋଷଣା କରିଛନ୍ତି ଯେ, ଅନ୍ୟ ତିନୋଟି କର୍କଟ ଔଷଧ ଉପରେ କଷ୍ଟମ୍ ଡ୍ୟୁଟି ଆଉ ଆଦାୟ କରାଯିବ ନାହିଁ, ଯାହା ରୋଗୀଙ୍କୁ ଆର୍ଥିକ ସହାୟତା ପ୍ରଦାନ କରିବ। ସୀତାରମଣ କହିଛନ୍ତି ଯେ, “କର୍କଟ ରୋଗୀଙ୍କୁ ଆଶ୍ଵସ୍ତି ଯୋଗାଇବା ପାଇଁ ମୁଁ କଷ୍ଟମ ଡ୍ୟୁଟିରୁ ଆଉ ତିନୋଟି ଔଷଧକୁ ସମ୍ପୂର୍ଣ୍ଣ ଛାଡ କରିବାକୁ ପ୍ରସ୍ତାବ ଦେଇଛି।”
ବଜେଟ୍ ଘୋଷଣା ପରେ ଶତ୍ରୁଘ୍ନ ସିହ୍ନା କହିଛନ୍ତି ଯେ, “କର୍କଟ ଔଷଧ କିମ୍ବା ଅନ୍ୟାନ୍ୟ ଜୀବନ ରକ୍ଷାକାରୀ ଔଷଧ ଉପରେ ଦିଆଯାଇଥିବା ଆଶ୍ଵସ୍ତି ପ୍ରଶଂସନୀୟ, ଏହା ଏକ ସତ୍ୟ ଅଟେ। ବିହାରକୁ ଯାହା ଦିଆଯାଇଛି, ବାସିନ୍ଦା ହିସାବରେ ତାହା ଭଲ ଲାଗିଲା, କିନ୍ତୁ ଏହାକୁ ଦେବାର ଥିଲା। ବିହାରକୁ ଏହାର ଆବଶ୍ୟକତା ଥିଲା ଏବଂ ଏହାର ଚାହିଦା ମଧ୍ୟ ଥିଲା।”
ସେ କହିଛନ୍ତି ଯେ, “ଆପଣ ଆନ୍ଧ୍ରପ୍ରଦେଶକୁ ମଧ୍ୟ କିଛି ଦେଇଛନ୍ତି, ଯାହା ଆଶା କରାଯାଉଥିଲା। କିନ୍ତୁ ତେଲେଙ୍ଗାନା, ପଞ୍ଜାବ ଏବଂ ପଶ୍ଚିମବଙ୍ଗ ପାଇଁ ଆପଣ କଣ କରିଛନ୍ତି?” ବାସ୍ତବରେ ଅମରାବତୀକୁ ରାଜଧାନୀ ରୂପେ ପ୍ରସ୍ତୁତ କରିବାକୁ କେନ୍ଦ୍ର ସରକାର ଆନ୍ଧ୍ରପ୍ରଦେଶକୁ ୧୫ ହଜାର କୋଟି ଟଙ୍କା ଦେବାକୁ ଯାଉଛନ୍ତି। ଦୀର୍ଘ ଦିନ ଧରି ଟିଡିପି ମୁଖ୍ୟ ତଥା ଆନ୍ଧ୍ର ମୁଖ୍ୟମନ୍ତ୍ରୀ ଚନ୍ଦ୍ରବାବୁ ନାଇଡୁ ଏହା ଦାବି କରିଆସୁଥିଲେ।