ନୂଆଦିଲ୍ଲୀ: ୨୦୨୫ ଚାମ୍ପିଅନ୍ସ ଟ୍ରଫି ପାକିସ୍ତାନ ଆୟୋଜନ କରିବ। ଦୀର୍ଘ ସମୟ ପରେ ଏହି ଟୁର୍ଣ୍ଣାମେଣ୍ଟ ଫେରୁଛି। ଏହି ଟୁର୍ଣ୍ଣାମେଣ୍ଟ ପାକିସ୍ତାନରେ ଫେବୃଆରୀ ୧୯ ତାରିଖରୁ ମାର୍ଚ୍ଚ ୯ ତାରିଖ ପର୍ଯ୍ୟନ୍ତ ଖେଳାଯିବ। ତେବେ ଟୁର୍ଣ୍ଣାମେଣ୍ଟ ପାଇଁ ଟିମ୍ ଇଣ୍ଡିଆ ପାକିସ୍ତାନ ଗସ୍ତ କରିବ କି ନାହିଁ ତାହା ଏବେ ମଧ୍ୟ ପ୍ରଶ୍ନବାଚୀ ସୃଷ୍ଟି କରିଛି। ଏହି ସମୟରେ ପାକିସ୍ତାନର ପୂର୍ବତନ ଖେଳାଳି ରସିଦ ଲତିଫଙ୍କ ପକ୍ଷରୁ ଦାବି କରାଯାଇଛି ଯେ, ଟିମ୍ ଇଣ୍ଡିଆ ପାକିସ୍ତାନ ଆସିବ ବୋଲି ୫୦ ପ୍ରତିଶତ ନିଶ୍ଚିତ ହୋଇଛି।
ଜୟ ଶାହା ଆଇସିସିର ଅଧ୍ୟକ୍ଷ ହେବା ପରେ ରଶିତ ଲତିଫ ଏହି ଦାବି କରିଛନ୍ତି। ସେ କହିଛନ୍ତି ଯେ, ଆଇସିସି ଅଧ୍ୟକ୍ଷ ହେବାରେ ଜୟ ଶାହା ମଧ୍ୟ ପାକିସ୍ତାନର ସମର୍ଥନ ପାଇଛନ୍ତି।
ରସିଦ ଲତିଫ ତାଙ୍କ ୟୁଟ୍ୟୁବ ଚ୍ୟାନେଲରେ ସୂଚନା ଦେଇ କହିଛନ୍ତି ଯେ, ଯଦି ଜୟ ଶାହା ନିର୍ବିରୋଧ ନିର୍ବାଚିତ ହୋଇଛନ୍ତି, ତେବେ ଏହାର ଅର୍ଥ ହେଉଛି ପାକିସ୍ତାନ କ୍ରିକେଟ୍ ବୋର୍ଡ ମଧ୍ୟ ସମର୍ଥନ କରିଛି।
ସେ ଆହୁରି ମଧ୍ୟ କହିଛନ୍ତି ଯେ, ଟିମ୍ ଇଣ୍ଡିଆ ପାକିସ୍ତାନ ଆସୁଛି ବୋଲି ୫୦ ପ୍ରତିଶତ ନିଶ୍ଚିତ ହୋଇଛି।
ଏହା ବ୍ୟତୀତ ପୂର୍ବତନ ପାକିସ୍ତାନୀ ଖେଳାଳି ଜୟ ଶାହାଙ୍କ ବିଷୟରେ କହିଛନ୍ତି ଯେ, “ବିସିସିଆଇ କିମ୍ବା ଆଇସିସି ପାଇଁ ହେଉ ଜୟ ଶାହାଙ୍କ କାର୍ଯ୍ୟ ବର୍ତ୍ତମାନ ପର୍ଯ୍ୟନ୍ତ ଲାଭଦାୟକ ରହିଛି। ଉଲ୍ଲେଖ ଯୋଗ୍ୟ ଯେ, ଜୟ ଶାହା ଆଇସିସିର ଚେୟାରମ୍ୟାନ୍ ହୋଇଛନ୍ତି। ଏବଂ ସେ ଡିସେମ୍ବର ୧ ତାରିଖରୁ ଦାୟିତ୍ଵ ଗ୍ରହଣ କରିବେ।
ସମସ୍ତ ଗଣମାଧ୍ୟମ ରିପୋର୍ଟରେ ଦର୍ଶାଯାଇଛି ଯେ, ଚାମ୍ପିଅନ୍ସ ଟ୍ରଫି ପାଇଁ ପାକିସ୍ତାନ ଗସ୍ତରେ ଟିମ୍ ଇଣ୍ଡିଆର କୌଣସି ଆଗ୍ରହ ନାହିଁ। ତେବେ ଅନେକ ରିପୋର୍ଟରେ ହାଇବ୍ରିଡ ମଡେଲ ବିଷୟରେ ମଧ୍ୟ ଆଲୋଚନା କରାଯାଇଛି। କୁହାଯାଇଥିଲା ଯେ, ଟୁର୍ଣ୍ଣାମେଣ୍ଟରେ ସେମାନଙ୍କର ମ୍ୟାଚ୍ ଏକ ନିରପେକ୍ଷ ସ୍ଥାନରେ ହାଇବ୍ରିଡ୍ ମଡେଲ୍ ଅଧୀନରେ କରାଯାଉ ବୋଲି ଟିମ୍ ଇଣ୍ଡିଆ ଚାହୁଁଛି। ତେବେ ଏପର୍ଯ୍ୟନ୍ତ କୌଣସି ସରକାରୀ ସୂଚନା ପ୍ରକାଶ ପାଇନାହିଁ। ବର୍ତ୍ତମାନ କେଉଁ ନିଷ୍ପତ୍ତି ବାହାରୁଛି ତାହା ଦେଖିବା ମଜାଦାର ହେବ।
ସୂଚନାଯୋଗ୍ୟ ଯେ, ଟିମ୍ ଇଣ୍ଡିଆ ଶେଷ ଥର ପାଇଁ ୨୦୦୮ ରେ ଏସିଆ କପ୍ ପାଇଁ ପାକିସ୍ତାନ ଗସ୍ତ କରିଥିଲା।