ନୂଆଦିଲ୍ଲୀ: ଏକନାଥ ଖଡସେଙ୍କ ବିବୃତ୍ତି ପୃଷ୍ଠଭୂମିରେ ଶିବସେନା-ୟୁବିଟି ସାଂସଦ ସଞ୍ଜୟ ରାଉତ ଏକ ବଡ ଦାବି କରିଛନ୍ତି। ସେ କହିଛନ୍ତି ଯେ, ମହା ବିକାଶ ଅଘାଡି ସହ ଅନେକ ନେତା ସମ୍ପର୍କରେ ଅଛନ୍ତି। ସେ ଦର୍ଶାଇଛନ୍ତି ଯେ, ମହାୟୁତି (ବିଜେପି, ଶିବସେନା, ଏନସିପି) ର ବଡ ନେତାମାନେ ଏମଭିଏରେ ଯୋଗଦେବେ। ପ୍ରକାଶ ଯୋଗ୍ୟ ଯେ, ଏକନାଥ ଖଡସେ ଏପରି ବିବୃତ୍ତି ଦେଇଛନ୍ତି, ଯାହା ଜଣାପଡୁଛି ଯେ ସେ ବିଜେପି ଉପରେ ଅସନ୍ତୁଷ୍ଟ ଅଛନ୍ତି ଏବଂ ସମ୍ଭବତଃ ସେ ଶରଦ ପାୱାର ଦଳକୁ ଫେରିପାରନ୍ତି।
ସଞ୍ଜୟ ରାଉତ ଗଣମାଧ୍ୟମକୁ କହିଛନ୍ତି ଯେ, “ଆମର ସମ୍ପର୍କରେ ମଧ୍ୟ ଅନେକ ନେତା ଅଛନ୍ତି। ଖୁବ୍ ଶୀଘ୍ର ଆପଣ ଜାଣିବେ ମହାୟୁତିର କେତେ ବଡ ନେତା ମହା ବିକାଶ ଅଘାଡିକୁ ଆସୁଛନ୍ତି।”
ଏକନାଥ ଖଡସେ ବିଜେପିକୁ ଫେରିଥିଲେ ମଧ୍ୟ ସେ ଅଭିଯୋଗ କରିଛନ୍ତି ଯେ, କିଛି ଲୋକଙ୍କ ବିରୋଧ ଯୋଗୁଁ ବିଜେପିରେ ଯୋଗଦେବାର ଆନୁଷ୍ଠାନିକ ଘୋଷଣା କରାଯାଇ ନାହିଁ। ସେ ଏ ବିଷୟରେ ବହୁତ କ୍ରୋଧିତ ମନେହେଉଛନ୍ତି। ସେ ଏହା ମଧ୍ୟ କହିଛନ୍ତି ଯେ, ମୁଁ ତଥାପି ଶରଦ ପାୱାରଙ୍କ ନେତୃତ୍ୱରେ ଦଳର ସଦସ୍ୟ ଏବଂ ମୁଁ ମଧ୍ୟ ଏହାର ବିଧାୟକ। ମୋର ଇସ୍ତଫା ଗ୍ରହଣ କରାଯାଇ ନାହିଁ। ଖଡେସେ ଆହୁରି ମଧ୍ୟ କହିଛନ୍ତି ଯେ, ସେ କିଛି ଦିନ ଅପେକ୍ଷା କରିବେ ଏବଂ କୌଣସି ନିଷ୍ପତ୍ତି ନେବେ।
ନିର୍ବାଚନ ପୂର୍ବରୁ ମହାୟୁତୀ ଦଳର ନେତାଙ୍କ ଇସ୍ତଫା ପ୍ରକ୍ରିୟା ଜାରି ରହିଛି। ଶରଦ ପାୱାର ଦଳରେ ବିଜେପି ନେତା, ପୂର୍ବତନ ମନ୍ତ୍ରୀ ସୂର୍ଯ୍ୟକାନ୍ତ ପାଟିଲ ଏବଂ ମାଧବରାଓ କିନ୍ହାଲକର ଯୋଗ ଦେଇଥିଲେ। ଏଥି ସହ ସୋଲାପୁରର ବସନ୍ତ ଦେଶମୁଖ ମଧ୍ୟ ଶରଦ ପାୱାରଙ୍କ ପାର୍ଟିରେ ଯୋଗଦେବାକୁ ଘୋଷଣା କରିଥିଲେ। ସମରଜିତ ଘାଟଗେ ମଧ୍ୟ ଏନସିପି-ଏସପିରେ ଯୋଗ ଦେଇଥିବା ବେଳେ ଅଜିତ ପାୱାର ଗୋଷ୍ଠୀର ରାମରାଜେ ନିମ୍ବାଲକର ମଧ୍ୟ ଦଳ ଛାଡିବାର ସମ୍ଭାବନା ରହିଛି।
ଜୁଲାଇ ମାସରେ,ପିମ୍ପଲି-ଚିଞ୍ଚୱାଡର ୨୦ ରୁ ଅଧିକ ଏନସିପି ପଦାଧିକାରୀ ଶରଦ ପାୱାର ଦଳରେ ଯୋଗ ଦେଇଥିଲେ। ଶରଦ ପାୱାରଙ୍କ ରାଲି ପୂର୍ବରୁ ସେମାନେ ଏନସିପିରୁ ଇସ୍ତଫା ଦେଇଥିଲେ।