ବାଣପୁର (ସୀତାରାମ ଅଗ୍ରୱାଲ): ସୁଭଦ୍ରା ଯୋଜନା ପାଇଁ ଦରଖାସ୍ତ ପ୍ରଦାନ କରିବାକୁ ଜନସେବା କେନ୍ଦ୍ରରେ ମହିଳା ମାନଙ୍କର ପ୍ରବଳ ଗହଳି ପରିଲକ୍ଷିତ ହୋଇଛି। କିନ୍ତୁ ୱେବସାଇଟ ଖୋଲୁ ନଥିବାରୁ ସେମାନେ ନିରାଶ ହୋଇ ଫେରୁଛନ୍ତି। ବର୍ତ୍ତମାନ ସୁଦ୍ଧା ବାଣପୁର ବ୍ଲକରେ ମାତ୍ର ୧୩ ଜଣ ହିତାଧିକାରୀ ଦରଖାସ୍ତ ପ୍ରଦାନ କରିଥିବା ବିଡ଼ିଓ ଶୀତଲ ଅଗ୍ରୱାଲ ଜଣାଇଛନ୍ତି।
ପ୍ରକାଶ ଥାଉକି ରାଜ୍ୟ ସରକାରଙ୍କ ବହୁ ପ୍ରତିକ୍ଷିତ ସୁଭଦ୍ରା ଯୋଜନାର ଶୁଭାରମ୍ଭ ପରେ ହିତାଧିକାରୀମାନଙ୍କୁ ଅନଲାଇନ ମାଧ୍ୟମରେ ଆବେଦନ କରିବାକୁ କୁହାଯାଇଛି। ତେଣୁ ପ୍ରଶାସନ ତରଫରୁ ପ୍ରତ୍ୟେକ ପଞ୍ଚାୟତରେ ମହିଳାମାନେ ସୁବିଧାରେ ଓ ମାଗଣାରେ ଅନଲାଇନ ମାଧ୍ୟମରେ ଦରଖାସ୍ତ ପ୍ରଦାନ କରିବାକୁ ଦୁଇଟି ଲେଖାଏଁ ଜନସେବା କେନ୍ଦ୍ରକୁ ସାମିଲ କରାଯାଇଛି।
ସେବାକେନ୍ଦ୍ର ଗୁଡିକ ଦିନସାରା ସିଷ୍ଟମ ଖୋଲି ଚେଷ୍ଟା କରିବା ସତ୍ତ୍ୱେ ଦରଖାସ୍ତ କରାଯାଇ ପାରୁନାହିଁ। କିନ୍ତୁ ଅଧିକାଂଶ ହିତାଧିକାରୀ ମାନଙ୍କର ଆଧାର ସହ ମୋବାଇଲ ଲିଙ୍କ ନଥିବାରୁ ସରକାରଙ୍କ ତରଫରୁ ଖୋଲାଯାଇଥିବା ସେବାକେନ୍ଦ୍ର ଗୁଡିକରେ ମହିଳା ମାନଙ୍କର ଦିନ ତମାମ ଲମ୍ବା ଲାଇନ ଲାଗୁଛି।
ଅନ୍ୟପକ୍ଷରେ ରାତିରେ ସୁଭଦ୍ରା ସାଇଟ ଖୋଲୁଥିବାରୁ କିଛି ଦଲାଲ ହିତାଧିକାରୀମାନଙ୍କୁ ଶିଖାଇ ମୋଟା ଅଙ୍କର ଅର୍ଥ ନେଇ ଦରଖାସ୍ତ ଭରଣା କରିବାକୁ ପ୍ରଚେଷ୍ଟା ଜାରି ରଖିଥିବା ଖବର ମିଳିଛି। ଶୁକ୍ରବାର ଅପରାହ୍ନରେ ଖୋର୍ଦ୍ଧା ଉପଜିଲ୍ଲାପାଳ ଦିପ୍ତୀରଂଜନ ସେଠୀ, ବିଡିଓ ଶୀତଲ ଅଗ୍ରୱାଲ, ତହସିଲଦାର ଟି ପଦ୍ମନାଭ ଦୋରା ଜନସେବା କେନ୍ଦ୍ର ଗୁଡିକରେ ପହଂଚି ତନଖି କରିଛନ୍ତି।
ସେବାକେନ୍ଦ୍ର ଗୁଡିକରେ ହିତାଧିକାରୀ ନଥିବା ବେଳେ ୱେବସାଇଟ ପରଖିଛନ୍ତି। ତେବେ ଆସନ୍ତା ୧୭ତାରିଖରେ ସୁଭଦ୍ରା ଯୋଜନାର ପ୍ରଥମ କିସ୍ତି ଟଙ୍କା ହିତାଧିକାରୀ ମାନଙ୍କ ବ୍ୟାଙ୍କ ଖାତାକୁ ଯିବାକୁ ଥିବାବେଳେ ବାଣପୁର ବ୍ଲକରେ ଉକ୍ତ ଦିନ ହିତାଧିକାରୀ ଟଙ୍କା ପାଇବା ସନ୍ଦେହ ସୃଷ୍ଟି ହୋଇଛି।
