ନୂଆଦିଲ୍ଲୀ: ଆସନ୍ତା ମହାରାଷ୍ଟ୍ର ବିଧାନସଭା ନିର୍ବାଚନ ପାଇଁ କେନ୍ଦ୍ର ମନ୍ତ୍ରୀ ନୀତିନ ଗଡକରୀଙ୍କ ସମେତ ମହାରାଷ୍ଟ୍ରର ସମସ୍ତ ବିଜେପି ନେତା ଅଂଶଗ୍ରହଣ କରିବେ। ବିଜେପି ର ମହାରାଷ୍ଟ୍ର ପ୍ରଦେଶ ସଭାପତି ଚନ୍ଦ୍ରଶେଖର ବାୱନକୁଲ ଶୁକ୍ରବାର ଏହି ସୂଚନା ଦେଇଛନ୍ତି। ବିଜେପିର ବିଧାନସଭା ନିର୍ବାଚନ ଯୋଜନା ସମ୍ପର୍କରେ ସେ କହିଛନ୍ତି ଯେ, ଉପମୁଖ୍ୟମନ୍ତ୍ରୀ ଦେବେନ୍ଦ୍ର ଫଡନାଭିସଙ୍କ ନେତୃତ୍ୱରେ ୨୧ ଜଣ ନେତା ମହାରାଷ୍ଟ୍ରର ବିଭିନ୍ନ କମିଟିର ଅଂଶ ହେବେ ଏବଂ ସମସ୍ତଙ୍କୁ ଦାୟିତ୍ଵ ଦିଆଯାଇଛି।
ଚନ୍ଦ୍ରଶେଖର ବାୱନକୁଲ କହିଛନ୍ତି ଯେ, ମହାୟୁତି ପାଇଁ ବିଜେପିର ଯୋଜନା ବୁଥ ସ୍ତର ପର୍ଯ୍ୟନ୍ତ ପରିଚାଳନା କରିବା। ମହାରାଷ୍ଟ୍ରରେ ହେବାକୁ ଥିବା ନିର୍ବାଚନ ପ୍ରଚାରରେ କେନ୍ଦ୍ର ମନ୍ତ୍ରୀ ଭୁପେନ୍ଦ୍ର ଯାଦବ ଏବଂ ଅଶ୍ୱିନୀ ବୈଷ୍ଣବ ମଧ୍ୟ ଅଂଶଗ୍ରହଣ କରିବେ। ନିର୍ବାଚନ ପ୍ରଚାରକୁ ପୂର୍ଣ୍ଣ ସମୟ ଦେବାକୁ ଆମେ ନିତିନ ଗଡକରୀଙ୍କୁ ଅନୁରୋଧ କରିଥିଲୁ ଏବଂ ସେ ରାଜି ହୋଇଛନ୍ତି। ବିଜେପି ବ୍ୟତୀତ ମୁଖ୍ୟମନ୍ତ୍ରୀ ଏକନାଥ ସିନ୍ଦେଙ୍କ ନେତୃତ୍ୱାଧୀନ ଶିବସେନା ଏବଂ ଅଜିତ ପାୱାରଙ୍କ ନେତୃତ୍ୱାଧୀନ ରାଷ୍ଟ୍ରବାଦୀ କଂଗ୍ରେସ ପାର୍ଟି ମଧ୍ୟ ମହାରାଷ୍ଟ୍ରରେ ଶାସକ ମହାୟୁତିର ସଦସ୍ୟ ଅଟନ୍ତି।
ନିକଟରେ ମହାରାଷ୍ଟ୍ରରେ ଅନୁଷ୍ଠିତ ଲୋକସଭା ନିର୍ବାଚନରେ ବିଜେପି ଏକ ବଡ଼ ଅସୁବିଧାର ସମ୍ମୁଖୀନ ହୋଇଛି। ଏହାକୁ ଦୃଷ୍ଟିରେ ରଖି ବିଜେପି ଏଥର ବିଧାନସଭା ନିର୍ବାଚନରେ କୌଣସି ସୁଯୋଗ ହାତ ଛଡା କରିବାକୁ ଚାହୁଁନାହିଁ। କିଛି ସପ୍ତାହ ମଧ୍ୟରେ ମହାରାଷ୍ଟ୍ରରେ ବିଧାନସଭା ନିର୍ବାଚନ ଘୋଷଣା କରାଯାଇପାରେ। ଏହାପୂର୍ବରୁ ବିଜେପି ନିର୍ବାଚନ ପ୍ରଚାର ପାଇଁ ପ୍ରସ୍ତୁତି ଆରମ୍ଭ କରିଛି। ଏହା ବ୍ୟତୀତ ପୂର୍ବତନ କେନ୍ଦ୍ର ମନ୍ତ୍ରୀ ରାଓସେହେବ ଦାନବେ ପାଟିଲ, ଉପ-ମୁଖ୍ୟମନ୍ତ୍ରୀ ଦେବେନ୍ଦ୍ର ଫଡନାଭିସ, ମନ୍ତ୍ରୀ ସୁଧୀର ମୁନଙ୍ଗଟୀୱାର, ବିଜେପି ରାଜ୍ୟ ସଭାପତି ଚନ୍ଦ୍ରଶେଖର ବାୱାନକୁଲେ ଏବଂ ରାଜ୍ୟର ଅନ୍ୟ ନେତାମାନେ ଷ୍ଟାର ପ୍ରଚାରକ ତାଲିକାରେ ସ୍ଥାନ ପାଇଛନ୍ତି।
ଗଡକରୀ ନିର୍ବାଚନ ପ୍ରଚାରର ନେତୃତ୍ୱ ନେବେ:
ବିଜେପି ରାଜ୍ୟ ସଭାପତି ଚନ୍ଦ୍ରଶେଖର ବାୱାନକୁଲେ କହିଛନ୍ତି ଯେ ନିର୍ବାଚନ ପ୍ରଚାରର ନେତୃତ୍ୱ କେନ୍ଦ୍ର ସଡ଼କ ପରିବହନ ମନ୍ତ୍ରୀ ନିତିନ ଗଡକରୀଙ୍କୁ ଦିଆଯାଇଛି। ବାୱାନକୁଲେ କହିଛନ୍ତି ଯେ, “ମହାରାଷ୍ଟ୍ରର ଲୋକମାନେ ଗଡକରୀଙ୍କୁ ବହୁତ ଭଲ ପାଆନ୍ତି। ସେ ସର୍ବଦା ନିଜର ଦକ୍ଷତା ପ୍ରମାଣ କରିଆସୁଛନ୍ତି। ସେ ସର୍ବଦା ଆମର କୋର ଟିମ ତଥା ସଂସଦୀୟ ବୋର୍ଡର ଅଂଶ ଅଟନ୍ତି।
ପ୍ରକାଶ ଯୋଗ୍ୟ ଯେ, ଲୋକସଭା ନିର୍ବାଚନରେ ନିତିନ ଗଡକରୀ ନାଗପୁର ଆସନରୁ କଂଗ୍ରେସର ବିବେକ ଠାକରେଙ୍କ ବିରୋଧରେ ପ୍ରାୟ ୨୫ ଟି ରାଲି କରିଥିଲେ। ସେ ୧,୩୭,୦୦୦ ଭୋଟରେ ଜିତିଥିଲେ। ତାଙ୍କ ବ୍ୟତୀତ ପୂର୍ବତନ କେନ୍ଦ୍ର ମନ୍ତ୍ରୀ ରାଓସାହେବ ଦାନବେ ପାଟିଲଙ୍କୁ ମୁଖ୍ୟ ସଂଯୋଜକ କରାଯିବ।