କ୍ରିକେଟ୍ ବିଶ୍ବକପ୍ରେ ଇଂଲଣ୍ଡ ବିପକ୍ଷରେ ଭାରତକୁ ପ୍ରଥମ ପରାଜୟର ସାମ୍ନା କରିବାକୁ ପଡିଛି । ଟିମ୍ ଇଣ୍ଡିଆର ପରାଜୟ ପରେ ସୋସିଆଲ୍ ମିଡ଼ିଆରେ ଟିମ୍ ଇଣ୍ଡିଆର ନୂଆ ଜର୍ସିକୁ ନେଇ ବହୁତ୍ ମଜାକ୍ କମେଣ୍ଟ ଦେଖିବାକୁ ମିଳିଛି । ଏହି କ୍ରମରେ ସାମିଲ୍ ହୋଇଛନ୍ତି ଜମ୍ମୁକାଶ୍ମୀରର ପୂର୍ବତନ ମୁଖ୍ୟମନ୍ତ୍ରୀ ମେହେବୁବା ମୁଫ୍ତୀ । ମେହେବୁବା କହିଛନ୍ତି, ଭାରତ କମଳା ରଙ୍ଗର ଜର୍ସି ପାଇଁ ପରାଜୟ ବରଣ କରିଛି । ମେହେବୁବା ଟୁଇଟ୍ କରି କହିଛନ୍ତି ଯେ, ‘ଆପଣମାନେ ମୋତେ ଅନ୍ଧବିଶ୍ବାସୀ କହିପାରନ୍ତି, କିନ୍ତୁ ମୋ’ ମତରେ ଭାରତକୁ ନୂଆ କମଳା ରଙ୍ଗର ଜର୍ସି ପାଇଁ ପରାଜୟର ସାମ୍ନା କରିବାକୁ ପଡ଼ିଛି । ଏହା ପୂର୍ବରୁ ମେହେବୁବା ଆଉ ଏକ ଟୁଇଟ୍ରେ କହିଥିଲେ ଯେ, ‘ପାକିସ୍ତାନୀ ପ୍ରଶଂସକ ଇଂଲଣ୍ଡ ବିରୁଦ୍ଧରେ ଭାରତର ବିଜୟ ପାଇଁ ପ୍ରାର୍ଥନା କରୁଛନ୍ତି । ଯାହାହେଉ କ୍ରିକେଟ୍ ବାହାନାରେ ଦୁଇ ଦେଶ ଏକ ସହିତ ରହିଛନ୍ତି ।’ ଇଂଲଣ୍ଡ ସହିତ ଭାରତର ମ୍ୟାଚ୍ ପାଇଁ ଭାରତୀୟ ଟିମ୍ରେ ଜର୍ସିକୁ ପରିବର୍ତ୍ତନ କରାଯାଇଥିଲା । କାରଣ ଦୁଇ ଦେଶଙ୍କର ଜର୍ସି ଏକାରଙ୍ଗର ହୋଇଥିବାବେଳେ ଏହାକୁ ପରିବର୍ତ୍ତନ କରାଯାଇଥିଲା । ଜର୍ସିର ପରିବର୍ତ୍ତନକୁ ନେଇ ବିବାଦ ମଧ୍ୟ ଉଠିଥିଲା । ରାଜନୈତିକ ଦଳ କମଳା ରଙ୍ଗକୁ ନେଇ ମୋଦି ସରକାରଙ୍କୁ କଟାକ୍ଷ ମଧ୍ୟ କରିଥିଲେ । ତେବେ ମେହେବୁବାଙ୍କ ଟୁଇଟ୍କୁ ନେଇ ବିବାଦ ଦେଖାଯାଇଥିବାବେଳେ ମେହେବୁବା ୟୁ ଟର୍ଣ୍ଣ ନେଇଛନ୍ତି । ସେ ଟ୍ୱିଟ କରି କହିଛନ୍ତି ଯେ ମୁଁ ଟିମ୍ ଇଣ୍ଡିଆର ପ୍ରଦର୍ଶନକୁ ନେଇ ଯାହା ବି କହିଥିଲି, ତାହା କେବଳ ଏକ ଜୋକ୍ ଥିଲା।
