ସୁପ୍ରିମକୋର୍ଟ ଓ ହାଇକୋର୍ଟରେ ନିଯୁକ୍ତ ହେଉଥିବା ବିଚାରପତିଙ୍କୁ ନେଇ ଗମ୍ଭୀର ପ୍ରଶ୍ନ ଉଠାଇଛନ୍ତି ଆହ୍ଲାବାଦ ହାଇକୋର୍ଟ ବିଚାରପତି ରଙ୍ଗନାଥ ପାଣ୍ଡେ। ବିଚାରପତି ନିଯୁକ୍ତିରେ ପରିବାରବାଦ ଓ ଜାତିବାଦ କରାଯାଉଥିବା ନେଇ ସେ ସଙ୍ଗୀନ ଅଭିଯୋଗ କରିଛନ୍ତି। ସେ ଏ ନେଇ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କୁ ଚିଠି ଲେଖିଛନ୍ତି। ବିଭିନ୍ନ ହାଇକୋର୍ଟରେ ବିଚାରପତି ନିଯୁକ୍ତିରେ କୌଣସି ନିର୍ଦ୍ଦିଷ୍ଟ ମାପଦଣ୍ଡ ନାହିଁ। ଏହି ସମୟରେ କେବଳ ପରିବାରବାଦ ଓ ଜାତିବାଦ ଚାଲିଛି। ବିଚାରପତି ନିଯୁକ୍ତି ପ୍ରକ୍ରିୟା ବନ୍ଦ ଗୃହରେ ଚା’ ଓ ଦାଓ୍ବତରେ କରାଯାଉଛି ବୋଲି ଅଭିଯୋଗ କରିଛନ୍ତି। ଏହାଦ୍ବାରା ନ୍ୟାୟପାଳିକାର ଗରିମା କ୍ଷୁର୍ଣ୍ଣ ହେଉଛି ବୋଲି କହିଛନ୍ତି ଜଷ୍ଟିସ୍ ରଙ୍ଗନାଥ ପାଣ୍ଡେ। ପ୍ରଧାନମନ୍ତ୍ରୀ ମୋଦିଙ୍କ ପାଖକୁ ଚିଠି ଲେଖି ରଙ୍ଗନାଥ କହିଛନ୍ତି ଯେ, ‘ମାନନୀୟ ସର୍ବୋଚ୍ଚ ନ୍ୟାୟାଳୟର ନ୍ୟାୟଧୀଶର ଚୟନ ପ୍ରକ୍ରିୟା ବନ୍ଦ ଗୃହରୁ ବାହାରି ସାର୍ବଜନୀନ ହେଉ। ସାଧାରଣ ପୃଷ୍ଠଭୂମିରୁ ଆସିଥିବା ବ୍ୟକ୍ତିବିଶେଷ ପ୍ରତିଯୋଗିତା ପରୀକ୍ଷାରେ ଯୋଗ୍ୟତା ସିଦ୍ଧ କରି ବିଚାରପତି ହୋଇଥାଏ। କିନ୍ତୁ ହାଇକୋର୍ଟ ଓ ସୁପ୍ରିମ୍କୋର୍ଟ ବିଚାରପତି ଚୟନରେ ଏପରି କୌଣସି ପ୍ରକାରର ମାନଦଣ୍ଡର ଉପଯୋଗ ହେଉନାହିଁ। ପ୍ରିୟାପ୍ରୀତି ତୋଷଣ ଆଧାରରେ ନିଯୁକ୍ତି କରାଯାଉଛି। ବଂଶବାଦ ଓ ଜାତିବାଦ ନ୍ୟାୟପାଳିକାଙ୍କୁ ଗ୍ରାସ କରି ଚାଲିଛି, ଯାହା ଅତ୍ୟନ୍ତ ଦୁର୍ଭାଗ୍ୟପୂର୍ଣ୍ଣ। ହାଇକୋର୍ଟ ଓ ସୁପ୍ରିମ୍କୋର୍ଟ ବିଚାରପତି ନିଯୁକ୍ତି ଉପରେ ସ୍ବତନ୍ତ୍ର ଧ୍ୟାନ ଦେବାକୁ ପ୍ରଧାନମନ୍ତ୍ରୀଙ୍କୁ ଏହି ଚିଠି ଜରିଆରେ ଅନୁରୋଧ କରିଛନ୍ତି ଜଷ୍ଟିସ୍ ରଙ୍ଗନାଥ ପାଣ୍ଡେ।
