ନୂଆଦିଲ୍ଲୀ: ଆଜି ଲେବାନନ୍ ଇସ୍ରାଏଲ ବିରୁଦ୍ଧରେ ପ୍ରତିଶୋଧ ନେଇଛି। ଇସ୍ରାଏଲ୍ ଖବରକାଗଜ ରିପୋର୍ଟ ଅନୁଯାୟୀ ଲେବାନନରୁ ଡ୍ରୋନ୍ ଆକ୍ରମଣ କରାଯାଇଛି। ଏହି ଆକ୍ରମଣ ଇସ୍ରାଏଲର କେନ୍ଦ୍ରୀୟ କେସରିୟା ସହରର ଏକ ଘର ଉପରେ କରାଯାଇଥିଲା। କୁହାଯାଉଛି ଯେ, ଆକ୍ରମଣର ଲକ୍ଷ୍ୟ ଥିଲା ନେତାନ୍ୟାହୁଙ୍କ ଘର। ତେବେ ନେତାନ୍ୟାହୁଙ୍କ ଘର ସୁରକ୍ଷିତ ଅଛି।
ଇସ୍ରାଏଲ୍ ପ୍ରତିରକ୍ଷା ବାହିନୀ କହିଛି ଯେ, ଲେବାନନରୁ ତିନୋଟି ଡ୍ରୋନ୍ କ୍ଷେପଣ କରାଯାଇଥିଲା ଏବଂ ସେଥିମଧ୍ୟରୁ ଇସ୍ରାଏଲର କେସରିୟା ସହରର ଏକ ଘରକୁ ଟାର୍ଗେଟ କରାଯାଇଥିଲା। ଏହି ଡ୍ରୋନ୍ ପଡିଥିବା କୋଠାଟି ନଷ୍ଟ ହୋଇଯାଇଛି, କିନ୍ତୁ ଏହି ଆକ୍ରମଣରେ କୌଣସି ଆହତ ହେବାର ଖବର ନାହିଁ।
ସ୍ଥାନୀୟ ପୋଲିସ କହିଛି ଯେ, କେସରିୟା ଅଞ୍ଚଳରେ ବିସ୍ଫୋରଣର ଶବ୍ଦ ଶୁଣାଯାଇଥିଲା। ଲେବାନନରୁ ଏହି ବିମାନ ଦ୍ୱାରା ହୋଇଥିବା ଆକ୍ରମଣର ଅନୁସନ୍ଧାନ କରାଯାଉଛି। ଇସ୍ରାଏଲ୍ ମିଡିଆ ରିପୋର୍ଟ ଅନୁଯାୟୀ, ଏହି ଡ୍ରୋନଗୁଡିଡ଼ିକୁ ଆଇରନ୍ ଡୋମ୍ ଅଟକାଇବାରେ ଅସମର୍ଥ ହୋଇଛି। ଇସ୍ରାଏଲ୍ ଗଣମାଧ୍ୟମ ମଧ୍ୟ ଏହାକୁ ନେଇ ପ୍ରଶ୍ନ ଉଠାଇଛି। ରିପୋର୍ଟରେ କୁହାଯାଇଛି ଯେ, ଏକ ଡ୍ରୋନ୍ ସହଜରେ ଇସ୍ରାଏଲ ସୀମାରେ ପ୍ରବେଶ କରିଥିଲା। କୁହାଯାଉଛି ଯେ, ଏହି ଡ୍ରୋନ୍ ସେନା ହେଲିକପ୍ଟର ପାଖଦେଇ ଯାଇଥିଲା।
ଏଥି ସହିତ ଇସ୍ରାଏଲ୍ ସେନା ଅନୁଯାୟୀ, ତିନିଟି ଡ୍ରୋନ୍ ଲେବାନନରୁ ହାଇଫା ଆଡକୁ ଯାଇଥିଲା, ସେଥିମଧ୍ୟରୁ କେବଳ ଦୁଇଟି ଚିହ୍ନଟ କରାଯାଇ ଅଟକାଯାଇଥିଲା। ଏହି ସମୟରେ ତୃତୀୟ ଡ୍ରୋନ୍ କେସରିୟାରେ ଏକ କୋଠାକୁ ଧକ୍କା ଦେଇଥିଲା। ପ୍ରତ୍ୟକ୍ଷଦର୍ଶୀମାନେ କହିଛନ୍ତି ଯେ, ବିସ୍ଫୋରଣ ବହୁତ ବଡ ଥିଲା। ରିପୋର୍ଟ ଅନୁଯାୟୀ, ଡ୍ରୋନ୍ ଲେବାନନ୍ ଠାରୁ ପ୍ରାୟ ୭୦ କିଲୋମିଟର ଦୂରରେ ଉଡି କେସରିୟାର ଏକ କୋଠାକୁ ସିଧାସଳଖ ଧକ୍କା ଦେଇଥିଲା।
