ଜୁଲାଇ ୨୦ରେ ପାଟକୁରା ବିଧାନସଭା ନିର୍ବାଚନ ଅନୁଷ୍ଠିତ ହେବ। ପାଟକୁରା ନିର୍ବାଚନ ନେଇ ଭାରତୀୟ ନିର୍ବାଚନ କମିଶନଙ୍କ ପକ୍ଷରୁ ବିଜ୍ଞପ୍ତି ପ୍ରକାଶ ପାଇଛି। ବିଜେଡି ପ୍ରାର୍ଥୀ ବେଦପ୍ରକାଶ ଅଗ୍ରଓ୍ବାଲଙ୍କ ମୃତ୍ୟୁ ପାଇଁ ପାଟକୁରାରେ ନିର୍ବାଚନ ଘୁଞ୍ଚିଥିଲା। ପରେ ପରେ ବାତ୍ୟା ଫନି ପାଇଁ ନିର୍ବାଚନ ତାରିଖକୁ ଘୁଞ୍ଚାଯାଇଥିଲା। ତେବେ ନୂତନ ନିର୍ବାଚନ ବିଜ୍ଞପ୍ତି ଜାରି କରାଯିବା ସହିତ କେନ୍ଦ୍ରାପଡ଼ା ଜିଲ୍ଲାରେ ଆଦର୍ଶ ଆଚରଣ ବିଧି ଲାଗୁ କରାଯାଇଛି। ଜୁଲାଇ ୨୦ରେ ଭୋଟ ଗ୍ରହଣ ଓ ଜୁଲାଇ ୨୪ରେ ଭୋଟ୍ଗଣତି ଅନୁଷ୍ଠିତ ହେବ। ବର୍ତ୍ତମାନ ପାଟକୁରା ପାଇଁ ବିଜେଡି ତରଫରୁ ସ୍ବର୍ଗତ ବେଦପ୍ରକାଶ ଅଗ୍ରୱାଲାଙ୍କ ଧର୍ମପତ୍ନୀ ସାବିତ୍ରୀ ଅଗ୍ରୱାଲା ପ୍ରାର୍ଥୀ ହୋଇଥିବା ବେଳେ ବିଜେପି ତରଫରୁ ବରିଷ୍ଠ ନେତା ବିଜୟ ମହାପାତ୍ର ପ୍ରାର୍ଥୀ ହୋଇଛନ୍ତି। ତାରିଖ ଘୋଷଣା ପୂର୍ବରୁ ଏହି ନିର୍ବାଚନ ପାଇଁ ବିଜେଡି ଓ ବିଜେପି ତରଫରୁ ପ୍ରସ୍ତୁତି ଆରମ୍ଭ କରିଦିଆଯାଇଛି। ବିଜୟ ମହାପାତ୍ର ଭୁବନେଶ୍ବର ଏମପି ଅପରାଜିତା ଷଡଙ୍ଗୀଙ୍କୁ ନେଇ ବିଭିନ୍ନ ସ୍ଥାନରେ ପ୍ରଚାର ଆରମ୍ଭ କରିଦେଇଛନ୍ତି। ସେହିପରି ବିଜେଡିର ଅନେକ ମନ୍ତ୍ରୀ ଓ ବିଧାୟକ ସେଠାରେ ବହୁଦିନ ଧରି ପ୍ରଚାର ଆରମ୍ଭ କରିଦେଇଛନ୍ତି।
