ବ୍ରହ୍ମପୁର (କୈଳାଶ ଚନ୍ଦ୍ର ଚୌଧୁରୀ): ବ୍ରହ୍ମପୁର ସହର ଉପକଣ୍ଠ ତଥା ସଦର ଥାନା ଅର୍ନ୍ତଗତ ଗୁଣ୍ଠବନ୍ଧ ଗ୍ରାମର ମଶାଣି ପୋଖରୀରୁ ରମାକାନ୍ତ ନାୟକ ନାମରେ ଜଣେ ଯୁବକଙ୍କ ମୃତ ଦେହକୁ ସଦର ପୋଲିସ ଓ ଅଗ୍ନିଶମ ବିଭାଗ କର୍ମଚାରୀମାନେ ଉଦ୍ଧାର କରିଛନ୍ତି।
ଘଟଣାରୁ ଜଣାପଡିଛି ଯେ, ମୃତ ଯୁବକଙ୍କ ଘର ଜରଡା ଥାନା ଅର୍ନ୍ତଗତ ବି ତୁରୁବୁଡି ଗ୍ରାମରେ। ଗୁଣ୍ଠପଡା ଗ୍ରାମରେ ତା’ର ଶ୍ଵଶୁର ଘର। ଗତ ଶନିବାର ଦିନ ଶ୍ଵଶୁର ଘରକୁ ଆସିଥିଲା ଓ ଅପରାହ୍ନରେ ପୋଖରୀକୁ ଗାଧୋଇବାପାଇଁ ଯାଇ ବିଳମ୍ବିତ ରାତି ପର୍ଯ୍ୟନ୍ତ ଘରକୁ ଫେରି ନଥିଲା।ଯାହା ଫଳରେ ପରିବାର ଲୋକେ ଖୋଜାଖୋଜି କରି ରମାକାନ୍ତର ଖବର ପାଇ ନଥିଲେ। ସକାଳୁ ତାଙ୍କର ମୃତ ଦେହ ଭାସୁଥିବା ଖବର ପାଇ ପୋଲିସ ଘଟଣାସ୍ଥଳରେ ପହଞ୍ଚି ଅଗ୍ନିଶମ ବାହିନୀର କର୍ମଚାରୀମାନଙ୍କ ଜରିଆରେ ଶବ ଉଦ୍ଧାର କରି ବ୍ୟବଚ୍ଛେଦ ପାଇଁ ପଠାଇ ଘଟଣା ର ତଦନ୍ତ ଆରମ୍ଭ କରିଛନ୍ତି।
Tags: ବ୍ରହ୍ମପୁର ସହର, ଯୁବକର ମୃତ୍ୟୁ
