ମାଲକାନଗିରି: ମାଲକାନଗିରି ଜିଲ୍ଲାର ଏମ.ଭି-୭୯ ଥାନା ଅନ୍ତର୍ଗତ କୁର୍ତ୍ତି ଜଙ୍ଗଲରୁ ପୋଲିସ ଜଣେ ମହିଳା ମାଓବାଦୀକୁ ଗିରଫ କରିଛି। ଗିରଫ ମାଓବାଦୀର ନାମ ଅନ୍ତି ମାଡ଼ବି ଓରଫ ଲାକେ ଓ ତାର ଘର ଛତିଶଗଡ଼ ରାଜ୍ୟର ବିଜାପୁର ଜିଲ୍ଲାର ପୁଲହାର ଗ୍ରାମ ବୋଲି ଜଣାପଡ଼ିଛି।
କୁର୍ତ୍ତି ଜଙ୍ଗଲରେ ମାଓବାଦୀଙ୍କ ଉପସ୍ଥିତି ଥିବା ଖବର ପାଇ ପୋଲିସ ପକ୍ଷରୁ ସଂପୃକ୍ତ ଅଞ୍ଚଳରେ କୂମ୍ବିଂ ଅପରେସନ ଆରମ୍ଭ କରାଯାଇଥିଲା। ଏହି ସମୟରେ ଜଣେ ମହିଳା ସନ୍ଦେହଜନକ ଭାବେ ଜଙ୍ଗଲରେ ବୁଲୁ ଥିବା ଦେଖି ଯବାନମାନେ ଅଟକ ରଖି ପଚରାଉଚରା କରିବା ପରେ ସେ ଜଣେ ମାଓବାଦୀ ବୋଲି ଜଣାପଡିଥିଲା।
ଗିରଫ ମହିଳା ମାଓବାଦୀ ଜଣକ ଗତ ୨୦୧୭ ମସିହାରେ ମାଓ ସଙ୍ଗଠନରେ ସାମିଲ ହୋଇଥିବା ବେଳେ ବର୍ତମାନ ସେ ମାଓନେତା ଉଦୟର ସୁରକ୍ଷା ଦଳରେ ପାର୍ଟି ମେମ୍ବର ଭାବେ କାର୍ଯ୍ୟ କରୁଥିଲା ଓ ଏକ ଏସ.ଏଲ.ଆର ବନ୍ଧୁକ ଧରୁଥିଲା। ତା ନାମରେ ଓଡିଶା ସରକାର ୨ ଲକ୍ଷ ଟଙ୍କା ପୁରସ୍କାର ରାଶି ଘୋଷଣା କରିଥିଲେ।
ସେ ଗତ ୨୦୨୧ ମସିହାରେ ମାଲକାନଗିରି ଜିଲ୍ଲାର ତୁଳସୀ ଓ ଦଲଦଲି ଜଙ୍ଗଲରେ ପୋଲିସ ସହ ଗୁଳି ବିନିମୟ ଘଟଣା ସହ ଛତିଶଗଡ଼ରେ ୫ ଟି ଗୁଳି ବିନିମୟ ଘଟଣା ଓ ଆନ୍ଧ୍ରପ୍ରଦେଶରେ ୨ ଟି ଗୁଳି ବିନିମୟ ଘଟଣା ସମେତ ମୋଟ ୯ ଟି ଘଟଣାରେ ସଂପୃକ୍ତ ଥିବା ଦକ୍ଷିଣା ପଶ୍ଚିମାଞ୍ଚଳ ଡି. ଆଇ. ଜି ନିତି ଶେଖର ଏକ ସାମ୍ବାଦିକ ସମ୍ମିଳନୀରେ ପ୍ରକାଶ କରିଛନ୍ତି।
ଏଥିରେ ଅତିରିକ୍ତ ଏସ. ପି ତପନ ନାରାୟଣ ରଥ, ଅତିରିକ୍ତ ଏସ.ପି ( ଗୋଇନ୍ଦା) ଡ.ରାଜ କିଶୋର ଦାସ, ଏସ. ଡି. ପି.ଓ ସଚିନ ପଟେଲ ପ୍ରମୁଖ ଉପସ୍ଥିତ ଥିଲେ।