ନୂଆଦିଲ୍ଲୀ: କାଜାଖସ୍ତାନରେ ଆଜେରବାଇଜାନ ଏୟାରଲାଇନ୍ସର ଏମ୍ବ୍ରାୟର-190 ବିମାନ ଦୁର୍ଘଟଣାଗ୍ରସ୍ତ ହେବା ପରେ ପ୍ରାଥମିକ ଅନୁସନ୍ଧାନ ଚାଲିଛି। ପ୍ରାରମ୍ଭିକ ଅନୁସନ୍ଧାନରୁ ଜଣାପଡିଛି ଯେ, ପକ୍ଷୀ ସହିତ ଧକ୍କା ହେତୁ ଏହି ଦୁର୍ଭାଗ୍ୟଜନକ ଘଟଣା ଘଟିଛି। ତେବେ ବିମାନ ଉପରେ ଆକ୍ରମଣ ପାଇଁ ରୁଷର ବାୟୁ ସେନା ଷଡଯନ୍ତ୍ର କରିଥିବା ଇଣ୍ଟରନେଟରେ ବ୍ୟାପିବାରେ ଲାଗିଛି। ଆଜେରବାଇଜାନର ବାକୁରୁ ରୁଷର ଚେଚନ୍ୟାର ଗ୍ରୋଜନି ଅଭିମୁଖେ ଯାଉଥିବା ଏମ୍ବ୍ରାୟର୍- 190 ବିମାନରେ 67 ଜଣ ଲୋକ ଥିଲେ। ପଶ୍ଚିମ କାଜାଖସ୍ତାନର ଅକତୌ ନିକଟରେ ବିମାନଟି ଦୁର୍ଘଟଣାଗ୍ରସ୍ତ ହୋଇଥିଲା ଏବଂ ଏହି ଦୁର୍ଘଟଣାରେ 38 ଜଣଙ୍କର ମୃତ୍ୟୁ ହୋଇଥିଲା।
ସୂଚନାଯୋଗ୍ୟ ଯେ, ଆଜେରବାଇଜାନ ଏୟାରଲାଇନ୍ସର ଏମ୍ବ୍ରାୟର- 190 ବିମାନ ଅକତୌ ବିମାନ ବନ୍ଦର ଉପରେ ଜରୁରୀକାଳୀନ ଅବତରଣ କରିବାକୁ ଅନୁମତି ଅପେକ୍ଷା କରିଥିଲା। ରିପୋର୍ଟରେ କୁହାଯାଇଛି ଯେ, ଜରୁରୀକାଳୀନ ଅବତରଣ କରିବାକୁ ଚେଷ୍ଟା କରୁଥିବା ବେଳେ ବିମାନଟି ଦୁର୍ଘଟଣାଗ୍ରସ୍ତ ହୋଇଥିଲା।
ଇଣ୍ଟରନେଟରେ ଗୁଜବ, ଅନେକ ଭିଡିଓ ଭାଇରାଲ:
ଏହି ଭୟଙ୍କର ଦୁର୍ଘଟଣା ପରେ ସୋସିଆଲ ମିଡିଆରେ କିଛି ଭିଡିଓ ଭାଇରାଲ ହେବାରେ ଲାଗିଛି। ଭାଇରାଲ ହେଉଥିବା ଭିଡିଓରେ, ବିମାନର ଫ୍ୟୁଜେଲେଜରେ ଅନେକ ଛୋଟ ଛିଦ୍ର ଦୃଶ୍ୟମାନ ହେଉଛି। ଗଣମାଧ୍ୟମ ଅନୁଯାୟୀ ବିମାନରେ ଦେଖାଯାଉଥିବା ଛିଦ୍ର ଯୋଗୁଁ ଇଣ୍ଟରନେଟରେ ଗୁଜବ ବ୍ୟାପୁଛି ଯେ, ଆଜେରବାଇଜାନ ବିମାନକୁ ରୁଷ ଖସାଇ ଦେଇଛି। ଲୋକମାନେ ବିଶ୍ୱାସ କରନ୍ତି ଯେ, ବିମାନରେ ଥିବା ଏହି ଛିଦ୍ରଗୁଡ଼ିକ ଗୁଳି ଚାଳନା ହେତୁ ହୋଇପାରେ। ତେବେ ଗଣମାଧ୍ୟମ ଏହି ସବୁ ଭିଡିଓକୁ ନିଶ୍ଚିତ କରି ନାହିଁ।
ସୂଚନା ଅନୁଯାୟୀ ବିମାନ କର୍ମଚାରୀମାନେ ବିମାନ ଉପରେ ଏକ ଶକ୍ତ ଧକ୍କା ଅନୁଭବ କରିଥିଲେ। ପ୍ରାରମ୍ଭରେ କର୍ମଚାରୀମାନେ ଏହା ଏକ ପକ୍ଷୀ ଧକ୍କା ବୋଲି ଭାବିଥିଲେ, କିନ୍ତୁ ପରେ ଏହା ଜଣାପଡିଥିଲା ଯେ, ବିମାନର କକ୍ପିଟ୍ ସହିତ ଲାଗିଥିବା ଏକ ଅମ୍ଳଜାନ ଟ୍ୟାଙ୍କର ବିସ୍ଫୋରଣ ହୋଇଛି। ରିପୋର୍ଟରେ କୁହାଯାଇଛି ଯେ, ଅମ୍ଳଜାନ ଟ୍ୟାଙ୍କରେ ବିସ୍ଫୋରଣ ଫ୍ୟୁଜେଲେଜରେ ବହୁ କ୍ଷତି ଘଟାଇଥିଲା ଏବଂ ବିମାନଟି ଖଣ୍ଡ ଖଣ୍ଡ ହୋଇଯାଇଥିଲା।
