ନୂଆଦିଲ୍ଲୀ: ଭାରତ ସହିତ ଚାଲିଥିବା ତିକ୍ତତା ମଧ୍ୟରେ ବାଂଲାଦେଶ ସେନା ମୁଖ୍ୟ ୱକାର-ଉଜ-ଜମାନ ଏକ ବଡ଼ ବିବୃତ୍ତି ଦେଇଛନ୍ତି। ଭାରତ ଏବଂ ଚୀନ୍ ସହିତ ବାଂଲାଦେଶର ସମ୍ପର୍କ ଉପରେ ସେ ନିଜର ମତ ରଖିଛନ୍ତି। ସ୍ଥାନୀୟ ଖବରକାଗଜକୁ ଦିଆଯାଇଥିବା ଏକ ସାକ୍ଷାତକାରରେ ସେ କହିଛନ୍ତି ଯେ, ବାଂଲାଦେଶର ଭାରତ ସହ ସମ୍ପର୍କ ନେବା ଦେବା ଭଳି। ବାଂଲାଦେଶର ବିକାଶରେ ଚାଇନା ଅଂଶୀଦାର ବୋଲି ସେନା ମୁଖ୍ୟ ବର୍ଣ୍ଣନା କରିଛନ୍ତି। ସେ ସ୍ପଷ୍ଟ କରିଛନ୍ତି ଯେ, ବାଂଲାଦେଶ ଭାରତର ରଣନୈତିକ ସ୍ୱାର୍ଥକୁ ନେଇ ଭାରତ ବିରୁଦ୍ଧରେ କେବେ ବି ଯିବ ନାହିଁ। କିନ୍ତୁ ସେ ଆହୁରି ମଧ୍ୟ କହିଛନ୍ତି ଯେ, ଦୁଇ ଦେଶ ମଧ୍ୟରେ ସମ୍ପର୍କ ନିରପେକ୍ଷ ହେବା ଉଚିତ୍।
‘ବାଂଲାଦେଶ ଅନେକ କ୍ଷେତ୍ରରେ ଭାରତ ଉପରେ ନିର୍ଭର କରେ’:
ସେନା ମୁଖ୍ୟ ୱକାର ଉଜ-ଜମାନ କହିଛନ୍ତି ଯେ, “ଆମେ ଅନେକ କ୍ଷେତ୍ରରେ ଭାରତ ଉପରେ ନିର୍ଭରଶୀଳ। ଭାରତ ମଧ୍ୟ ଆମ ଦ୍ୱାରା ଉପକୃତ ହେଉଛି। ସେମାନଙ୍କର ଅନେକ ଲୋକ ବାଂଲାଦେଶରେ ଔପଚାରିକ ତଥା ଅନୌପଚାରିକ ଭାବରେ କାର୍ଯ୍ୟ କରୁଛନ୍ତି। ବାଂଲାଦେଶର ଅନେକ ଲୋକ ଚିକିତ୍ସା ପାଇଁ ଭାରତ ଯାଉଛନ୍ତି। ଆମେ ଅନେକ ଉତ୍ପାଦ ସେଠାରୁ କିଣୁଛୁ। ତେଣୁ ବାଂଲାଦେଶ ସ୍ଥିର ହେଉ, ଏହା ଭରତ ଚାହୁଁଛି।” ବାଂଲାଦେଶ ସେନା ମୁଖ୍ୟ କହିଛନ୍ତି ଯେ, ଯେତେବେଳେ ଦେଶମାନେ ପରସ୍ପରଠାରୁ ଲାଭବାନ ହେବାକୁ ଚେଷ୍ଟା କରନ୍ତି, ସେତେବେଳେ ଭଲ ସମ୍ପର୍କ କେବଳ ସମାନତା ଉପରେ ଆଧାରିତ ହେବା ଉଚିତ୍। ସେ କହିଛନ୍ତି ଯେ, ଲୋକମାନେ ଭାବିବା ଉଚିତ ନୁହେଁ ଯେ ଭାରତ ବାଂଲାଦେଶ ଉପରେ ଆଧିପତ୍ୟ ବିସ୍ତାର କରୁଛି କିମ୍ବା ଆମର ସ୍ୱାର୍ଥ ବିରୁଦ୍ଧରେ କିଛି କରୁଛି।
‘ବାଂଲାଦେଶର ବିକାଶରେ ଚୀନ୍ ଅଂଶୀଦାର’:
ପୂର୍ବତନ ପ୍ରଧାନମନ୍ତ୍ରୀ ଶେଖ ହସିନାଙ୍କ ବହିଷ୍କାର ପରେ ବାଂଲାଦେଶ ସେନା ମୁଖ୍ୟଙ୍କ ଏହା ପ୍ରଥମ ସାକ୍ଷାତକାର ଥିଲା। ସେ ବାଂଲାଦେଶ ସେନାରେ ଚୀନ୍ ଅସ୍ତ୍ରଶସ୍ତ୍ରର ବ୍ୟବହାର ବିଷୟରେ ମଧ୍ୟ ଉଲ୍ଲେଖ କରିଛନ୍ତି। ସେ କହିଛନ୍ତି ଯେ, “ସମସ୍ତଙ୍କ ସହ ବନ୍ଧୁତା, କାହା ସହ ଶତ୍ରୁତା ନାହିଁ … ଆମର ବୈଦେଶିକ ନୀତି ଉତ୍କୃଷ୍ଟ ଅଟେ। ଆମକୁ ସନ୍ତୁଳନ ସହ ଆଗକୁ ବଢିବାକୁ ପଡିବ। ବାଂଲାଦେଶର ବିକାଶରେ ଚୀନ୍ ଅଂଶୀଦାର ଅଟେ। ବାଂଲାଦେଶରେ ସେମାନଙ୍କର (ଚୀନ୍) ବହୁ ବିନିଯୋଗ ରହିଛି। ତେଣୁ ଚୀନ୍ ଆମ ପାଇଁ ଅତ୍ୟନ୍ତ ଗୁରୁତ୍ୱପୂର୍ଣ୍ଣ ବୋଲି ସେ କହିଛନ୍ତି।
ବାଂଲାଦେଶୀ ସେନା ଚୀନ୍ ଅସ୍ତ୍ର ବ୍ୟବହାର କରେ:
ବାଂଲାଦେଶ ସେନା ମୁଖ୍ୟ କହିଛନ୍ତି ଯେ, ଆମେ ଅନେକ ଚୀନ୍ ଅସ୍ତ୍ର ବ୍ୟବହାର କରୁଛୁ। ଆମର ବାୟୁସେନା ଏବଂ ନୌସେନା ବ୍ୟବହାର କରୁଥିବା ଚାଇନାର ଅସ୍ତ୍ର ଅନ୍ୟମାନଙ୍କ ତୁଳନାରେ ଶସ୍ତା ଅଟେ। ପୂର୍ବରୁ ବାଂଲାଦେଶରେ ଚୀନ୍ ରାଷ୍ଟ୍ରଦୂତ ସ୍ପଷ୍ଟ କରିଛନ୍ତି ଯେ, ତାଙ୍କ ଦେଶ ବାଂଲାଦେଶର ସ୍ଵାଧୀନ ବୈଦେଶିକ ନୀତିକୁ ସମର୍ଥନ କରିବ।